Fətullah Gülənin Bakıdakı təhsil ocaqları yoxlanılır; Vergilər
Nazirliyi “Çağ” Öyrətim şirkətini cərimələyib, məhkəməyə verilib

Fətullah Gülənin Azərbaycandakı məktəblərinin bağlanması prosesi başlandı. Hələ ilk günlərdə “Gündəm-xəbər” olaraq bu məktəblərin bağlanacağı, bəzilərinin vergi və digər hüquqi problemlərlə üzləşəcəyi, Qafqaz Universitetinin isə ya adının dəyişəcəyi, ya da tələbə qəbulunun dayandırılacağını yazmışıq.
Qəzetimizin proqnozları özünü doğrultmaqdadır və Ərdoğanın səfərindən sonra hərəkata aid təhsil ocaqlarına qarşı güclü nəzarət başlayıb. Əldə etdiyimiz xəbərə görə, artıq “Çağ” Öyrətim İşlətmələri Şirkəti Vergilər Nazirliyi tərəfindən cərimə olunub.
Bu cərimənin səbəbləri vergi ilə bağlı olsa da, qeyri-rəsmi səbəbləri sırf “Hizmət” hərəkatının məktəblərinə qarşı hücuma keçməkdir. Qaynağımız iddia edir ki, “Çağ” Öyrətim bağlanmasa da, vergi ilə təzyiq altında saxlanır. Ümumiyyətlə, nazirliyə təlimat verilib ki, Gülən məktəblərini audit yoxlaması adı altında təzyiq altında saxlasınlar.
Bu şirkət də cərimə olunduğu üçün nazirliyi məhkəməyə verib. Mənbə qeyd edir ki, vergilər naziri bu işi birbaşa yuxarı eşelonda gedən müzakirələrdən sonra həyata keçirməyə başlayıb. Nurçularla bağlı son bir ayda gedən proseslər göstərir ki, hökumət bu məsələnin üzərinə ciddi şəkildə düşüb və özünün qarşısına qoyduğu tələbləri yerinə yetirməli, nəticələr əldə etməlidir. Görünür, tam nəticə hasil olmayıb. Odur ki, bir həftəlik aradan sonra yenidən nurçuluq qalmaqalı gündəmə gəlib, məmurlar vurulur, məktəblər yoxlanılır.
Mənbə iddia edir ki, hökumət tam istəyinə çatmayıb və Ərdoğanın gətirdiyi dosye üzrə əməliyyatlar davam edir. Yaxın gələcəkdə yekun nəticələr əldə oluna bilər. Daxili çəkişmələr dərinləşdiyi bir vaxtda bu hadisənin üstünə daha çox gedilməsi narahatlıqlardan xəbər verir. Amma cəmiyyətdə də süni şəkildə kampaniya aparılır. Media da bu oyunlara alət olur. Nurçu olan-olmayan hər kəsin adı çəkilir və qara yaxılır. Hakimiyyət isə prosesin əsl kökünü qazıyır və gerçək nurçuları axtarır. Onları “zərərsizləşdirmək” çünü çabalar sərf edir və məqsədinə çatdıqdan sonra əməliyyatlar dayanacaq.
Artıq nazirlik də “Çağ” şirkətinin məhkəmə məsələsini təsdiqləyib. Nazirik şirkətin onları məhkəməyə verməyə hazırlaşdığını etiraf edib. “Nazirliyə belə bir sorğu daxil olub. Lakin bunu şişirtmək lazım deyil. Güman ki, onlar nazirliyin hansısa vergi yoxlamaları ilə razılaşmadıqları üçün məhkəməyə müraciət ediblər”.
Bu barədə Vergilər Nazirliyinin Mətbuat xidməti sorğuya cavabında bildirib. Nazirliyin məlumatında deyilir ki, şirkətin məhkəməyə müraciət etməsi onların hüququdur: “Təkcə bu şirkət deyil, onlarla şirkət var ki, əlavə vergi hesablanıb, cərimə kəsilib.
Bununla razılaşmaya bilərlər və məsələnin məhkəmə qaydasında həll edilməsi onların hüququdur. Məsələləri məhkəmə müəyyən edəcək. Əslində bu sıradan olan hadisədir. Sadəcə olaraq bu şirkət son günlər diqqət mərkəzində olduğu üçün məsələ bu qədər gündəmə gəlib”. Məlumatda o da bildirilib ki, nazirlik bu məsələni tam aydınlaşdırdıqdan sonra ictimaiyyətə məlumat veriləcək.

Rəşad Hüseynov