“Azəryolservis” ASC vətəndaşa çatmalı olan 1.674.207 manat pulu ödəməkdən imtina edir

Bir çox dövlət məmurlarının tutduqları vəzifə kürsüsünün verdiyi səlahiyyətlərdən istifadə edərək sadə vətəndaşları incitməsi, onların konstitusion hüquqlarını kobud şəkildə pozması adi hal alıb. Belə məmurlar və onların himayə etdikləri dövlət və özəl müəssisələri heç bir hüquqi əsas olmadan insanların halal haqqını əllərindən alır, min-bir yolla onları süründürməçiliyə məruz qoyur, öz şəxsi maraqlarını təmin edirlər. Daha çox dövlət əhəmiyyətli layihələrin həyata keçirilməsi zamanı vətəndaşların mülkiyyət hüquqları pozulur, onlara çatmalı olan kompensasiyalar müxtəlif yollarla mənimsənilir. Öz haqqını tələb edən insanlar isə yüksək çinli məmurların yaratdıqları süni maneələri aşa bilmir, hətta məhkəmə qətnamələri olduğu halda belə hüquqlarını təmin etməkdə aciz qalırlar.
Konstitusion hüquqları pozulan və illərdir ki, tapdalanmış haqqlarını bərpa etmək üçün döymədiyi qapı qalmayan belə vətəndaşlardan biri də Kərimov Səid Yusif oğludur. Bakı şəhəri, Xəzər rayonu, Mərdəkan qəsəbəsində yaşayan Səid Kərimovun mülkiyyət hüquqları pozulub.
Əzizbəyov (Xəzər) rayonu, Qala qəsəbəsi 46 ünvanında yerləşən Metallurgiya Dövlət Şirkətinin Sınaq Təcrübə Bazası özəlləşdirildikdən sonra yerində “Qala” STB ATSC yaradılıb. S. Kərimov “Qala” STB ATSC nə məxsus olan səhmlərin 15 faizini 2007-ci ildə qanuni şəkildə Milli Depozit Mərkəzindən alaraq payçıya çevrilib. Lakin, onun əsas problemləri Bakı ətrafı “Dairəvi yol”un çəkilişinə start veriləndən sonra başlayıb. Yolun çəkilişi ilə əlaqədar olaraq “Qala” STB ATSC məxsus olan özəl zavod sökülmüşdür. Elə əsas çətinliklər də S. Kərimov üçün o vaxtdan başlayıb. Zavodun sökülməsi zamanı payçılara kompensasiya ödənilməli olduğu halda işin icrası ilə məşğul olan “Azəryolservis” ASC S. Kərimova çatacaq məbləği ödəməkdən imtina edir, onu hədələməkdən, qorxutmaqdan belə çəkinmir. “Sınaq Təcrübə Bazası”nın “Azəryolservis” ASC tərəfindən sökülən ərazisinə daxil olan tikililəri bazar qiymətlərinə müvafiq olaraq 11. 161.380 manat dəyərində qiymətləndirilib. Həmin ərazidə qanuni olaraq 15 faiz paya malik olan S. Kərimova bu məbləğdən 1.674.207 manat çatmalı olduğu halda cavabdeh tərəf - “Azəryolservis” ASC məbləği ödəməkdən hər vasitə ilə imtina edir. İddiaçı tərəf müxtəlif dövlət orqanlarına müraciət etməsinə baxmayaraq hüquqlarını təmin edə bilmir, çünki qarşı tərəf heç bir dövlət qanununa məhəl qoymur. Bakı İnzibati- İqtisadi Məhkəməsin 1 noyabr 2013-cü il tarixli 2(82)-21-2011 saylı qətnaməsi ilə iddiaçı Kərimov Səid Yusif oğlunun cavabdehlər Azərbaycan Respublikası Nəqliyyat Nazirliyinə, Nəqliyyat Nazirliyinin “Azəryolsevis” ASC-nə və müstəqil tələblər irəli sürməyən 3-cü şəxs “Chronos” MMC-nə qarşı tələbləri təmin edilib. Qətnamədə göstərilir ki, “Sınaq Təcrübə Bazası”nın sökülən ərazisinin yol tikintisi ərazisinə əlavə edilməsi ilə əlaqədar zavod ərazisinə daxil olmuş tikililərin bazar qiyməti ilə 11.161.380 manat dəyərindən 15 faiz, yəni 1.674.207 manatın cavabdehlər tərəfindən iddiaçı Kərimov Səidə ödənilməsi qət edilmişdir. Qətnamə üzrə 2 saylı Bakı İnzibati-İqtisadi Məhkəməsi tərəfindən 19 dekabr 2013-cü il tarixli 2(82)-1616-2013 saylı icra vərəqəsi icra edilməsi üçün Yasamal rayon icra şöbəsinə rəsmi qaydada verilib. “Azəryolservis”ASC iddiaçıya ünvanladığı K-4/16-1489 saylı 27.03.2013-cü il tarixli məktubda göstərilir ki, məhkəmə prosesi başa çatdıqdan sonra məhkəmənin qəbul edəcəyi qərara uyğun olaraq məsələ öz həllini tapacaqdır. Göründüyü kimi, məhkəmə Səid Kərimovun iddiasının təmin olunması ilə bağlı qərar qəbul etdiyi halda cavabdeh tərəf verdiyi sözü tutmayaraq məbləği ödəməkdən imtina edib.
“Azəryolservis” ASC-nin Layihə İşçi Qrupunun direktoru Faiq Məmmədov deputat Cavid Qurbanovun köməkliyi ilə qüvvəyə minmiş məhkəmə qətnaməsinin icra olunmasına hər vasitə ilə mane olur. Ortada kifayət qədər keçərli hüquqi sənədlərin olmasına baxmayaraq, vətəndaşın mülkiyyət hüququ tapdalanır, məbləğ ödənilmir. İddiaçı tərəfin bildirdiyinə görə, ona çatacaq pulu ala bilməsə də Faiq Məmmədovun bu pullardan necə “yararlandığını” yaxşı bilir. Faiq Məmmədov Kürdəxanı qəsəbəsi, Ləhiş bağları massivində özü və yaxın qohumu olduğu bildirilən Yunis adlı şəxs üçün Əliyeva Səkinəxanım Məmmədqasım qızının və Babayeva Esmira Aslan qızının adına bağ-torpaq sahələri alaraq dəbdəbəli imarətlər ucaltmışdır. Bütün əmlakını başqalarının adına rəsmiləşdirən F. Məmmədov ondan qanuni haqqını tələb edən Səid Kərimova isə hər dəfə hədə-qorxu gəlir, təhdid edir. Onun iddaçıya dediyi sözlər isə qanunlara olan “hörmət və ehtiramının” ifadəsidir. Dəfələrlə bildirib ki, “Azəryolservis” ASC-yə heç kimin gücü çata bilməz. Çünki, Milli Məclisin deputatı Cavid Qurbanov kimi himayədarları var. Heç bir məhkəmə qətnaməsi onlara mane ola bilməz.
Haisələrin gedişi göstərir ki, Faiq Məmmədov həqiqətən də “haqlıdır”. Belə olmasaydı Ədliyyə Nazirliyinin Nəsimi rayon şöbəsi məhkəmə qətnaməsini icra etməkdə aciz qalmazdı. Qanunun aliliyi gözlənilsəydi, Səid Kərimovun Əmlak Məsələləri Dövlət Komitəsinə, Nəqliyyat Nazirliyinə, Maliyyə Nazirliyinə, “Azəryolservis” ASC-yə etdiyi çoxsaylı müraciətlərə cavab verən tapılardı.
“Dairəvi yolun” tikintisi zamanı mülkiyyətçilərin qanuni pullarını ödəməyən “Azəryolservis” ASC nədənsə digər “mülkiyyətçilərin” pulunu məmuniyyətlə ödəyib. Sabunçu rayonu, Kürdəxanı qəsəbəsi ərazisinə düşən “Dairəvi yol”un tikintisi zamanı”guya” plana düşən bağ-torpaq sahələri dövlət ehtiyacları üçün alınmış və bir sot torpaq sahəsi 6 min manat qiymətləndirilərək “Kapital Bank”ın Sabunçu rayon filialı vasitəsi ilə “vətəndaşlara” ödənilmişdir. Maraqlıdır ki, Nazirlər Kabinetində “Tikinti və Kommunal-Təsərrüfat” şöbəsinin müdiri Şahin Salahov Rasim oğlunun kürəkənləri olan maliyyə işçi qrupunun direktoru Faiq Məmmədov və Yunis adlı şəxs elə həmin ərazidə özləri üçün yayayış kompleksi tikdiriblər. Görəsən mövcud olmayan torpaq sahələrinə səxavətlə pul ayıran “Azəryolservis” ASC vətəndaşa çatacaq qanuni vəsaiti hansı əsaslarla ödəmir? Korrupsiya hesabına böyük var dövlət sahibi olan məmurlar nə vaxta qədər ölkə qanunlarından güclü olacaqlar?
Hüquqları pozulan Səid Kərimov hələ də aidiyyatlı dövlət qurumlarından lazımi dəstəyi ala bilmir. Məhkəmənin hüquqi qətnaməsi olduğu halda hələ ki, “Azəryolservis” ASC ölkə qanunlarına məhəl qoymur, sadə vətəndaşların mülkiyyət hüquqlarını tapdalamaqda davam edir. Maraqlıdır ki, bu işdə adları hallandırılan Cavid Qurbanov və Şahin Salahov da problemin həll olunması istiqamətində heç bir tədbir görmürlər. Məsələni diqqətimizdə saxlayacağıq.
Nicat Mahmudov