Musa Pənahovun nurçularla əlaqəsinə görə istefası istənilir,
nazir isə müavininə qahmar çıxıb deyilənlərə inanmır

Nəqliyyat naziri Ziya Məmmədovun müavini Musa Pənahov yaxın müddətdə istefaya göndəriləcək. Bu barədə “Gündəm-xəbər”ə mötəbər qaynaqdan verilən məlumatda iddia olunur. Mənbə iddia edir ki, M.Pənahovun adı nurçularla birgə hallanır. O, Fətullah Gülən camaatı ilə əlaqələrə malikdir. Bundan xəbər tutan mərkəzi siyasi hakimiyyət dərhal nazirə tapşırıq verib.
Xəbərdə deyilir ki, Ziya Məmmədov buna etiraz edib. Nazir müavinini qurban vermək istəməyib. Z.Məmmədov M.Pənahova qahmar çıxaraq onu axıra qədər müdafiə edəcəyini açıqlayıb. Mənbə deyir ki, nazir müavininin nurçularla əlaqəli olmasına da inanmır. O, bunu cəfəngiyyat sayır və kompaniyanın bir tərkib hissəsi hesab edir.
Nazir M.Pənahovun peşəkar mütəxəssis olduğunu deyərək onu müdafiə etməyə çalışıb. Lakin Z.Məmmədovdan israrla tələb edilir ki, müavinini təhvil versin, onu işdən çıxarsın. Hələ ki, dirəniş göstərən nazir müavini barədə qərara imza atmayıb. Qarşıdakı günlərdə məsələ tam aydınlaşacaq. Mənbə deyir ki, M.Pənahov həqiqətən də nurçu deyil. Amma ona qarşı olan qüvvələr nədənsə bu fürsətdə ortaya belə iddia atıb, onun istefasına nail olmaq istəyirlər.
Qeyd edək ki, Musa Pənahov 2004-cü ildən nazir müavini vəzifəsini icra edir. Bu vaxta qədər isə o, 1984-1988-ci ildə Azərbaycan Dövlət Dəmir Yolunun Bakı dəmir yol hissəsinin Plan-iqtisad şöbəsinin rəisi, 1988-1993-cü illərdə Azərbaycan Dövlət Dəmir Yolunun Baş iqtisadçısı - Maliyyə xidmətinin rəisi, 1993-2004-cü illərdə Azərbaycan Dəmir Yolu İdarəsinin iqtisadi məsələlər üzrə müavini vəzifəsində çalışmışdı. Mətbuatda nazir müavininin biznesinin bir hissəsinin Moldovada olması barəsində də informasiya yayılıb. Onun həmçinin Moldovanın eks-prezidenti Vladimir Voroninlə də quda olduğu bildirilir.
Rafiq Qara