Məmmədovlar imperiyası rəsmən diz çökdürülür, jurnalistin
döyülməsinin ifşası bu klanı bitirir, nazir qardaşı oğluna qəzəblidir;
Elton Məmmədovdan onu cəzalandırmasını tələb edib

Nəqliyyat naziri Ziya Məmmədov bu dəfə jurnalisti döymək sifarişi ilə gündəmə gətirildi. Onun deputat qardaşı Elton Məmmədovun oğlunun “Yeni Müsavat”ın reportyoru Fərahim İlqaroğlunu döydürməsinin üstü açılması ciddi mətləblərdən xəbər verir.
Etibarlı qaynaqlardan daxil olan xəbərdə qeyd olunur ki, Ziya Məmmədov olduqca qəzəblidir və bu özfəaliyyətə görə qardaşından oğlunun cəzalandırılmasını tələb edib. İlin-günün bu vaxtında, onsuz da Məmmədovlara qarşı kompaniyanın dərinləşdiyi ərəfədə deputat oğlunun onların başına dərd açması yerinə düşməyib.
Z.Məmmədov jurnalistin döyülməsinin ifşa olunmasını ona qarşı olan dairələrin sifarişi hesab edir. Adi vaxtda heç zaman jurnalisti döyənlər nə həbs edilərdi, nə də tapılardı. Amma bu dəfə nazir hədəfə gəldiyi üçün mərkəzi hakimiyyətin iki güclü qanadı birləşərək ona qarşı əməliyyat təşkil edib.
Nazir ötən gün təfsilatını araşdırıb və öyrənib ki, bu məsələ özfəaliyyət dərnəyi olub. Yəni, qardaşı oğlu Aynar Məmmədov heç kəslə məsləhətləşmədən bu qərarı verib ki, jurnalistə bir-iki şillə-təpik vurulsun.
İşin üstünün açılmasından sonra atası Elton Məmmədov onu yanına çağırıb, vəziyyətin dramatik şəkil aldığını dilə gətirib, avtoxuliqanlıqdan sonra bu işin də üzə çıxmasını heç də yaxşı perspektiv vəd etmədiyini söyləyib.
Mənbə qeyd edir ki, Məmmədovların ətrafındakı halqa daralır, onlara qarşı kompaniya daha geniş vüsət alır, rəqibləri müttəfiq olur, siyasi rəhbərlikdə onunla bağlı müzakirələr gedir və “Gündəm xəbər”in yazdıqları təsdiqlənməyə doğru gedir. Gerçəkdən də Ziya Məmmədovun “torbası tikilir” və onun klanı istefaya göndəriləcək.
Qeyd edək ki, Bakı Şəhər Baş Polis İdarəsi (BŞBPİ) jurnalistin döyülməsi faktı ilə bağlı rəsmi məlumat yayıb. Məlumatda deyilir ki, mayın 6-sı Nizami Rayon Polis İdarəsi və 24-cü polis bölməsi əməkdaşlarının keçirdiyi əməliyyat-axtarış tədbirləri nəticəsində jurnalisti döyən Siyəzən rayon sakini, Bakıda kirayə yaşayan 1990-cı il təvəllüdlü Feyruz Termişi metronun “Memar Əcəmi” stansiyasının yaxınlığında tutulub.
Bu cinayətdə iştirak edən Orxan adlı ikinci şəxs də saxlanılıb. Saxlanılanlar bir müddət dirəndikdən sonra F.İlqaroğlunu döymək sifarişini Tural Bayramov adlı şəxsdən aldıqlarını etiraf ediblər. T.Bayramovun K-1 döyüş növü (“qaydasız döyüş”) üzrə tanınmış idmançıdır. 72 kiloqram çəki dərəcəsində çıxış edən T.Bayramov dəfələrlə beynəlxalq yarışlara qatılıb.
Deyilənə görə, peşəkar döyüşçü vaxtilə Azərbaycan Kikboksinq Federasiyasının prezidenti, deputat Adil Əliyevin ətrafında olub. Onun Facebook-da Adil Əliyevlə mehriban pozlarda şəkilləri də var. İddialara görə, T.Bayramov daha sonra Adil Əliyevdən ayrılıb, nəqliyyat naziri Ziya Məmmədovun deputat qardaşı Elton Məmmədovun oğlu Aynar Məmmədovla dostluq etməyə başlayıb.
Onların birlikdə fotosu da üzə çıxıb. Ümumiyyətlə, 7 may gününü ölçən zaman irəlilədikcə belə bir xəbər gəldi ki, Tural Bayramov bir sıra zənginlər üçün nəzarətində olan idmançıların vasitəsilə sifarişlə adam döymə işlərini təşkil edirmiş. Artıq Tural Bayramov da həbs edilib.
Mənbə qeyd edir ki, Ziya Məmmədov və yaxın ətrafı ilə bağlı gərgin həftələr başlayıb. Çox böyük ehtimalla Ziya Məmmədov və rəhbərlik etdiyi nazirliyin son 3 ildəki fəaliyyəti rəsmi şəkildə dərindən araşdırılacaq.
Mənbənin sözlərinə görə, son bir neçə ay ərzində Ziya Məmmədov, oğlu Anar Məmmədov, deputat qardaşı Elton Məmmədov və onun övladları haqda mətbuata ötürülən kompromatların artması və üstəlik jurnalistin döyən idmançının nəqliyyat nazirinə yaxın çıxmasının operativ aşkarlanması da təsadüfi deyil. Artıq Ziya Məmmədovla bağlı “düymə” basılıb.
Nəqliyyat naziri Ziya Məmmədov və yaxın çevrəsinin təsir dairələri nəinki azaldılır, hətta onların qurduğu iqtisadi və siyasi təsir imperiyasının tamamilə çökdürülməsi də qaçılmaz hala gəlib. Bunun əsas səbəbi isə Ziya Məmmədovun hakimiyyətlə bağlı buraxdığı çox ciddi siyasi səhvdən qaynaqlanır.
Hakimiyyətdə artıq inanırlar ki, Ziya Məmmədov prezident seçkiləri ərəfəsində Rusiyada təşkilatlanmış “Milyarderlər ittifaqı” ilə gizli təmasa keçib. Bir neçə gün əvvəl Ağdaşda səfərdə olan prezident İlham Əliyevin də Ziya Məmmədova sərt irad bildirməsi də yuxarıda söylənilən rəylə əlaqəlidir.
Əgər şəhərdaxili nəqliyyat Hacıbala Abutalıbovun sərəncamına verildisə ,bu dəfəki həmlədə isə Ziya Məmmədov Ramil Usubova məğlub etdirildi. Belə ki, Nazirlər Kabinetinin qərarı ilə “Azərbaycan Respublikasının ümumi istifadədə olan avtomobil yolları ilə iri qabaritli və ağır çəkili nəqliyyat vasitələrinin hərəkət etməsi və onların hərəkətinə xüsusi icazənin verilməsi Qaydası”nda dəyişiklik olundu.
Rafiq Qara