Dini komitə rəhbərinin “vurulmasında” QMİ sədrinin rolunun olduğu iddia edilir,
Paşazadə nurçu və vəhhabi mövzusunda yenidən danışmaqla eyham vurdu

“Elşad İsgəndərovun vəzifədən alınmasında Şeyxin rolu olub. Şeyxlə onun münasibətləri gərgin idi. İsgəndərov komitəyə rəhbərlik etdiyi dövrdə Paşazadə ilə yola getməyib. Hətta ona problem yaratmağa çalışıb.
Bundan əlavə, İsgəndərovun vəhhabilərə münasibətdə tolerant və loyal davranışı Şeyxin xoşuna gəlməyib. Təbii ki, böyük təcrübəyə və əlaqələrə malik olan Paşazadə üçün bu gənci əzmək çətin iş olmayıb”.
Bu sözləri “Gündəm-xəbər”ə deyən mənbə iddia edir ki, Qafqaz Müsəlmanları İdarəsinin sədri Allahşükür Paşazadə ilə Dini Qurumlarla İş üzrə Dövlət Komitəsinin sabiq rəhbəri Elşad İsgəndərov arasında toqquşmalar yaşanıb. Tərəflərin çəkişməsində uduzan tərəf sabiq komitə sədri olub. Mənbə qeyd edir ki, vəhhabilər məsələsində anlaşılmazlıq Şeyxi qəzəbləndirib və məsələ ciddi şəkildə müzakirə olunub.
Elşad İsgəndərovun vəhhabilərə geniş əl-qol açma imkanları yaratdığı bəzi dairələrə çatdırılıb. Bu da İsgəndərovun vəzifədən uzaqlaşdırılması ilə nəticələnib. Şeyx mərkəzi hakimiyyətə nümayiş etdirib ki, o haqlıdır və qətiyyən bu adam komitəyə rəhbərlik edə bilməz. Elşad İsgəndərov isə nurçuluq məsələsinə görə işdən azad olunmadığını gözəl bilir. Burada vəhhabi faktoru böyük rol oynayıb. Maraqlıdır ki, Şeyx də Suriyaya gedənlərlə bağlı danışıb.
“Axundlar, imamlar islamı elə çatdırmalıdırlar ki, heç bir təfriqə olmasın”. Bunu QMİ sədri Allahşükür Paşazadə deyib. O bildirib ki, Azərbaycanın bütövlüyü və dövlətçilik hər şeydən önəmlidir: “İstər vəhhabi, istər nurçu, istər digər cərəyanlar olsun, dövlətçiliyə qarşı mübarizə aparanlara qarşı amansızlıqla mübarizə aparacağıq. Burada səfirlər də var, mən mövqeyimi açıq deyirəm. Azərbaycan dövlətçiliyi bizim üçün ən önəmlisidir”.
A.Paşazadə xatırladıb ki, 33 ildir şeyxülislamdır: “Mən təkmilləşdirmə kursundakı insanlara öz övladlarım kimi baxıram. Onları Azərbaycan dövlətçiliyinə, həqiqi islama xidmət edən insanlar kimi görmək istəyirəm”.
Amma hakimiyyətin siyasi kursundakı dəyişikliklər təkcə nurçuların, medianın iddia etdiyi kimi, “Ərdoğanın siyahısı” ilə təmizlənməsi ilə yekunlaşmır. Buna paralel olaraq daha diqqətçəkən proseslər baş verməkdədir ki, onların təhlili hakimiyyətin əslində daha ciddi dəyişikliklərə hazırlaşdığının anonsu sayıla bilər.
Yəni iqtidar prosesin birmənalı olaraq nə nurçular, nə rusiyapərəstlər, nə də çox şişmiş məmurlardan can qurtarmaq kimi izah edilməsini arzulamır. Məsələn, gənc kadrların işdən çıxarılmasının “köhnə qvardiyanın” qalibiyyəti kimi qələmə verilməsinin qarşısını almaq üçün “vurulanlar” işsiz qoyulmur.
Maraqlıdır ki, istefasında dərhal sonra Dini Qurumlarla İş üzrə Dövlət Komitəsinin sabiq sədri Elşad İsgəndərov təyinat aldı.
O, Dialoq və Əməkdaşlıq uğrunda İslam Konfransı Gənclər Forumunun (DƏ İKGF) Baş katibi təyin edilib. Dialoq və Əməkdaşlıq uğrunda İslam Konfransı Gənclər Forumunun (DƏ İKGF) İstanbuldakı Baş Qərargahından verilən məlumata görə, Elşad İskəndərov yenidən bu beynəlxalq qurumun Baş katibi vəzifəsinə seçilib.
İslam Əməkdaşlıq Təşkilatına (İƏT) bağlı beynəlxalq qurum olan Forumun İdarə heyətinin bu barədə müvafiq qərarını DƏ İKGF-nin Prezidenti Əli Sarıkaya 6 may 2014-cü il tarixində imzalayıb. Qərarda həmçinin Elşad İskəndərova Forumun Baş katibi vəzifəsi ilə yanaşı, qurumun bu il keçiriləcək Baş Assambleyasının Təşkilat Komitəsinə başçılıq etmək də həvalə edilib.
E.İskəndərov 2012-2014 cü illərdə Azərbaycan Respublikası Dini Qurumlarla İş üzrə Dövlət Komitəsinin sədri olduğu dövrdə Forumun Baş katibi vəzifəsinin icrasını dayandırıb. Qeyd edək ki, İƏT-nin 57 üzv ölkəsindən 41-nin təmsil olunduğu Forum beynəlxalq təşkilat statusunda fəaliyyət göstərir.
Qurumun Baş Qərargahı Türkiyədə, Avrasiya Regional Mərkəzi isə Azərbaycanda diplomatik təsisat kimi akkreditasiyadan keçib. İKGF-nin Prezidenti Əli Sarıkaya isə həm də Türkiyə Baş nazirinin müşaviri vəzifəsində çalışır.
RAFİQ