Komitə sədri nə zamana qədər iş başında qalacaq?

Əmlak Məsələləri Dövlət Komitəsinin yerlərdəki məmurları Bakıdakı hamilərinin dəstəyindən tam arxayın olaraq dövlət mülikiyyətini talan edirlər
Dəfələrlə Əmlak Məsələləri Dövlət Komitəsinin yerlərdəki məmurlarının yol verdikləri total korrupsiya faktları ilə bağlı məlumatlar yaysa da, Əmlak Məsələləri Dövlət Komitəsi yol verilən talansılıq və ağlasığmaz korrupsiya faktlarına susmaqla reaksiya verir.
Kərəm Həsənovun məmurları, «susmaq qızıldır», prinsipi ilə çıxış edərək məhz susqunluqla Komitədə baş verən total korrupsiya faktlarını ört-basdır etməyə cəhd edirlər.
Bu arada Əmlak Məsələləri Dövlət Komitəsinin yerlərdəki Ərazi İdarələrinin total korrupsiya faktları ilə bağlı ilginc məlumatlar daxil olmaqda davam edir. Daxil olan məlumatda göstərilir ki, Komitənin Beyləqan Ərazi İdarəsinin qeydiyyat şöbəsinin müdiri Zaman İmanovla birləşərək Dövlət Torpaq və Xəritəçəmkə Komitəsinin Ağcabədi, İmişli, Füzuli rayon şöbələrinin müdirləri ilə əlbir olaraq bir çox qanunsuz işləri həyata keçiriblər. Qanunsuz saxta əməliyyatların əsas iştirakçılarından birinin də Əmlak Məsələləri Dövlət Komitəsinin 11 saylı İmişli ərazi şöbəsinin rəisi olduğu bildirilir. Daxil olan məlumatda xüsusi olaraq vurğulanır ki, bütün bu şəbəkəyə Daşınmaz Əmlakın Reyster xidmətinin rəisi, Zaman İmanovun qardaşı Məhəmməd İmanov rəhbərlik edir.
Məlumata əsasən Komitənin 6 saylı Beyləqan Ərazi İdarəsinin rəisi Ramiz Əliyev faktiki olaraq öz vəzifə səlahiyyətlərini həyata keçirmir. Onun bütün səlahiyyətləri və möhürü idarənin qeydiyyat şöbəsinin müdiri Zaman İmanovda olduğu qeyd olunur. Səlahiyyətsiz idarə müdiri olan Ramiz Əliyev elə bu üzdəndə ayda bir dəfə işə çıxaraq müxtəlif sənədlərə imza atır. Buna görə isə Zaman İmanovdan aylıq paket aldığı qeyd olunur.
Daxil olan məlumatda göstərilir ki, yuxarıda sadalanan rayonların Ərazi İdarələrinin müdirləri Zaman İmanovla birlikdə bələdiyyə torpaqlarına qeyri qanuni olaraq «forma-1» sənədi hazırlayaraq reyster şöbəsində təsdiq edirlər. Belə ki, prezident İlham Əliyevin 2007-ci il dekabr ayınja imzaladığı sərəncama əsasən Bələdiyyələrin özbaşaına torpaq satması qadağan olunub. Yəni Bələdiyyə sədrlərinin özbaşına dövlət torpaqlarını satması, hansısa bir sənəd verməsi qeyri qanunidir.
Məlumatlı mənbə bildirir ki, qeydiyyat şöbəsinin müdiri Zaman İmanov, qardaşı Məhəmməd İmanovla birlikdə bu işdən pul qazanmaq üçün yeni üsul tapıblar. Belə ki, Bələdiyyələrin qanunsuz olaraq satdığı həyətyanı torpaq sahələri qeyri qanuni olaraq Dövlət Torpaq və Xəritəçəkmə Komitəsinin İmişli, Ağcabədi, Füzuli rayon şöbələrinin müdirləri tərəfindən təsdiq olunur, möhürlənir və reyster şöbəsi tərəfindən qeydiyyata alınaraq həmin torpaqlara «forma-1» verilir. Mənbə idda edir ki, həyata keçirilən «forma 1» əməliyyatlarında Füzuli rayon torpaq və xəritəçəkmə şöbəsinin müdiri Tapdıq Quliyev, Ağcabədi rayon torpaq və xəritəçəkmə şöbəsinin müdiri Abbas Süleymanov və İmişli rayon torpaq və xəritəçəkmə şöbəsinin müdiri Vuqar Məmmədov da aktiv iştiak edirlər və bu işdən yaxşı qazanc əldə edirlər. Şəbəkənin göstərdiyi «xidmət» sayəsində isə yüz hektarlarla torpaq sahəsi qanunsuz olaraq ayrı-ayrı fiziki və hüquqi şəxslərə satılıb. Əvəzində isə külli miqdarda rüşvət pulu toplanıb.
Qeyd edək ki, Zaman İmanov və qardaşı Əmlak Məsələləri Dövlət Komitəsi yanında Daşınmaz Əmlakın Dövlət Reyster Xidmətinin rəisi Məhəmməd İmanovlun Bakıda və rayonlarda çoxlu
sayda əmlakı, mal-mülkləri barədə, həmçinin bir çox dövlət obyektlərini qeyri qanuni olaraq ucuz qiymətə sənədləşdirərək ələ keçirmələri barədə məlumat vermişdik.
İmanov qardaşlarının həyata keçirdikləri qanunsuz əməllərlə bağlı isə redaksiyamıza göndərilən yeni məlumatdada qeyd olunur ki, Zaman İmanov Beyləqan şəhərinin kənarında, məşhur Xanqızı arxının yanında olan yağ pendir zavodunu çox ucuz qiymətə sənədləşdirərək qaynı Bəbir adlı şəxsin adına sənədləşdirib. Eyni zamanda Beyləqan şəhərinin çıxışında Xanqızı arxının yanında tikilən dəbdəbəli, qiyməti 1 milyon manata yaxın olan və 1 hektardan çox ərazisi olan restoran Zaman İmanova məxsus olsada, sənədlərdə qaynı Bəbirin adı qeyd olunub.
Məlumatda bildirilir ki, Zaman İmanovun Xanqızı kanalının yaxınlığında tikdirdiyi restoran da qeyri qanunidir. Çünki qanunvericiliyə əsasən kanalların təmizlənməsi üçün onların yaxınlığında hər hansı bir obyektin tikintisi qadağandır. Amma Zaman İmanov qanunu saymayaraq istədiyi kimi Xanqızı kanalının ətrafını zəbt edib. Məlumatda göstərilir ki, Zaman İmanov ələ keçirdiyi əmlakların çoxusunu öz yaxın qohumlarının adına sənədləşdirib. Yazıda adı keçən şəxslərin mövqeyini dərc etməyə hazırıq…
İsmayıl BAĞIRZADƏ