Vidadi İsgəndərli:
“Səfirlikdə görüşdə ABŞ prezidenti, Dövlət Departamenti və Konqresə ünvanlanan etirazımı çatdırdım”

Dünən hüquq müdafiəçisi Vidadi İsgəndərli ABŞ-ın Bakıdakı səfirliyində olub. Bu barədə məlumat verən hüquq müdafiəçisi bizimlə söhbətdə görüşün təfərrüratları barədə danışdı: "Bu gün (dünən-red.) ABŞ-ın Azərbaycandakı səfirliyində oldum. Burada səfirliyin siyasi məsələlər üzrə müşaviri Daniel Sleşşerlə görüşdüm. Bu görüşümün əsas məqsədi son bir ildə mənə olan hədələrlə bağlı olub. Görüşdə həmin hədələrin məqsədi və kimlər tərəfindən törədildiyi barədə səfirlik əməkdaşını məlumatlandırdım. Bir saat davam edən görüşdə nəqliyyat naziri Ziya Məmmədov tərəfindən təşkil olunan mütəşəkkil cinayətkar dəstə tərəfindən terror edilməyimlə bağlı bütün materialları və kasetləri ona təqdim etdim. Həmçinin ona, ABŞ prezidenti və Dövlət Departamenti və Konqresə ünvanlanan etirazımı da çatdırdım. Burada qeyd etmişəm ki, vaxtilə həbsdə yatanda Amerikanın dünya üzrə ən populyar jurnalı Vidadi İsgəndərlini demokratiya uğrunda mübarizə aparan qəhrəman kimi təqdim etsə də, bu gün hədələrlə üzləşməyimə baxmayaraq, onlardan həmin dəstəyi görmürəm. Necə olur ki, demokratiyanın keşiyində duran bir ölkə, hüquq müdafiəçisinə qarşı təzyiqlərə yol verən bir şəxsi müdafiə edir? Səfirlikdən xahiş etdim ki, mənə qarşı təzyiqlərə yol verən bu şəxsin Amerika banklarındakı, mənimsədiyi milyardlarla dollar hesabı dondurulsun və onlar arzuolunmaz şəxs elan edilsin. Səfirlikdən əmin etdilər ki, məsələ Avropa ölkələrinin səfirləri ilə də müzakirə ediləcək və məlumat Vaşinqtona çatdırılacaq. Səfirlikdə son sözüm bu oldu ki, belə qanunsuzluqlara yol vermək olmaz. Korrupsiya ağır cinayətdir. Necə olur ki, xalqın milyardlarla dollar pulunu mənimsəyib, sonra da Amerikada müəyyən şəxslərə xərcləyib özlərinə dost tuturlar? ABŞ səfirliyinin nümayəndəsi qarşısında həmçinin, siyasi dustaqlarla bağlı məsələni qaldırdım. NİDA-çı gənclər, Tofiq Yaqublu, İlqar Məmmədov barədə fikirlərimi çatdırdım və iradımı bildirdim ki, vaxtilə özüm həbs olunanda ABŞ Konqresi qanunsuz həbsim barədə müzakirə aparmışdı. Bəs niyə indi həmin dövlət Azərbaycandakı siyasi dustaqlara sayğı göstərmir. faktiki olaraq heç bir müdafiə tədbiri görmür?"
Hüquq müdafiəçisi onu da qeyd etdi ki, dünən (sıragagün-red.) Daxili İşlər Nazirliyinin İctimai Təhlükəsizlik İdarəsinin rəisi də zəng edərək, artıq nazirliyin göstərişi ilə ailəsinin təhlükəsizliyinin təmin edilməsi istiqamətində tədbirlər görüldüyünü söyləyib: "Göyçayda Emil Məmmədov barəsində toplanılan materialın Bakıya göndərilməsinə dair göstəriş də verilib”. Burada DİN rəsmisi onu da söylədi ki, mənə qarşı edilən terror hərəkətləri, iki idmançının sui-qəsdi, gizlin telefon zəngləri ilə ailəm və özünü hədəmələri haqda materiallar toplanılıb, DİN-də araşdırılması qərarına gəlinib.
Məsələ ilə bağlı olaraq V. İsgəndərli dövlət başçısına da müraciət edib. Burada o, prezidentdən siyasi iradə göstərilməsini xahiş edib: "Xahiş etdim ki, siyasi iradə göstərərək, mənə qarşı olan terror hadisəsini araşdırmaq üçün DİN-ə, Milli Təhlükəsizlik Nazirliyinə göstəriş versin. Bu gün Vidadi İsgəndərliyə qarşı terror edilirsə, sabah onun digərlərinə qarşı olacağı da istisna edilmir. Azərbaycanda qanunçuluğu bərpa etmək lazımdır. Yerlərdə polis orqanları çox zəifdir, qanunları qoruya bilmirlər. Mübarizəmin nəticəsini gözləyəcəyəm. Bundan asılı olaraq, tədbir görülməsə, başqa addımlar atmalı olacağam. 3 mindən çox hüquq müdafiə təşkilatı, mətbuat orqanlarına Ziya Məmmədovun dəstəsi tərəfindən mənə qarşı törədilən cinayət barədə məlumat verilib. Vətəndaşı olduğum dövlətimdə qanun hakimdirsə, cinayətkarlar layiqli cəzasını almalıdır. Bu məsələ ilə bağlı başqa yerdə kömək axtarmalı deyilik. Amma bunun olmaması üçün ölkədə qanunların işləməsi vacibdir. Amma təəssüf ki, ölkənin baş prokuroru, Milli Təhlükəsizlik Nazirliyi susur. Daxili işlər naziri də qismən susur".
H.İSLAMOV