İşğal altındakı Kəlbəcər rayonu ərazisində Ermənistan tərəfindən girov götürülən Azərbaycan vətəndaşlarının Hüquqlarını Müdafiə Komitəsi bu gün mətbuat konfransı keçirdi.
Virtualaz.org saytının tədbirdə iştirak edən müxbirinin verdiyi məlumata görə, komitənin yaradılmasında məqsəd bir neçə gün əvvəl əsir düşmüş Azərbaycan vətəndaşları Dilqəm Əhmədov, Şahbaz Quliyev və Həsən Həsənovun (sonuncunun ermənilər tərəfindən qətlə yetirildiyi bildirilir) hüquqlarının müdafiəsini təmin etmək, onlara qarşı yol verilən qanunsuzluqları beynəlxalq ictimaiyyətə çatdırmaq və sağ qalan azərbaycanlı girovların azadlığını tələb etməkdir.
Müdafiə Komitəsinin sədri Elxan Salahov bildirdi ki, məqsədləri əsir düşmüş azərbaycanlıların hüquqlarını müdafiə etmək, onlara qarşı yol verilən zorakılıqları dünya ictimaiyyətinə çatdırmaqdır.

E.Salahov yerli mətbuatda da əsir düşmüş azərbaycanlılarla bağlı yer alan xəbərlərin bəzən həqiqəti əks etdirmədiyini və bu informasiyaların ictimaiyyətə çatdırılmasının yanlış olduğunu diqqətə çatdırdı. Komitə sədri əsir düşən 3 azərbaycanlının Kəlbəcərə getməkdə məqsədlərinin yaxınlarının məzarlarını ziyarət etmək olduğunu söylədi.
Tədbirdə çıxış edən YAP-çı deputat Aydın Mirzəzadə ermənilərin bu əməlinin beynəlxalq hüquq normalarına sığmadığını, əsir düşmüş azərbaycanlıların öz torpaqlarına getmək hüquqlarının olduğunu diqqətə çatdırdı: “Əsir düşən Azərbaycan vətəndaşları sərhədi yox, sadəcə olaraq cəbhə xəttini keçiblər. Heç kim bir azərbaycanlının öz torpaqlarını ziyarət etməsinə qadağa qoya bilməz”.
Deputat əsir düşənlərin bu addımını qəhrəmanlıq nümunəsi kimi qiymətləndirib bunun vətənə, torpağa bağlılıq olduğunu diqqətə çatdırdı: “Dilqəm Əhmədov, Şahbaz Quliyev və Həsən Həsənovun öz torpaqlarını ziyarət etmək üçün Kəlbəcərə getməsi namus-qeyrət məsələsidir. Onların bu addımı qəhrəmanlıq kimi qiymətləndirilməlidir. Ramil Səfərov, Mübariz İbrahimov kimi bu üç vətəndaşımızın addımını da qəhrəmanlıq hesab etmək lazımdır”.

A.Mirzəzadə üç Azərbaycan vətəndaşından birinin gözünün çıxarılması haqda mətbuatda yer alan məlumatlara da münasibət bildirdi.
“Əsir düşmüş vətəndaşlarımızdan birinin görüntülərini izlədim. Onun gözlərindəki qorxmazlığı gördüm. O, heç bir halda geri addam atan insana oxşamır. Görünür, o, ermənilərə cavabını layiqincə verib deyə onun gözünü çıxarıblar”- deyə A.Mirzəzadə söylədi.
Deputat beynəlxalq qurumların, ATƏT nümayəndələrinin bu məsələyə münasibət bildirməsinin vacib olduğunu, vətəndaşlarımızın əsir düşməsinə dövlət səviyyəsində ciddi reaksiya veriləcəyini diqqətə çatdırdı.
Mətbuat konfransında çıxış edən hərbi ekspert Üzeyir Cəfərov əsir düşən azərbaycanılarla bağlı dövlət tərəfindən iş görülməsi sahəsində ləng addımlar atıldığını söylədi.
Tədbir sonradan işıqların sönməsi ilə yarımçıq saxlanıldı. Tədbir iştirakçıları və jurnalistlər buna ciddi etiraz etsə də təşkilatçılar tədbiri davam etdirmədilər.
Qeyd edək ki, Dilqəm Əhmədovun yaxınları onun qardaşının və oğlunun da konfransda iştirak etdiyini dedilər. Lakin sonradan bildirildi ki, onlar tədbir başlamazdan əvvəl binanı tərk ediblər.
Komitə sədri Elxan Salahov isə əsirlərin ailə üzvlərinin tədbiri tərk etməsinin səbəbini belə izah etdi: “Yəqin işıqların sönməsi və yaranan texniki problemlərdən sonra ailə üzvləri hansısa bir təxribatın olacağını, tədbirdə jurnalistlərin təxribatçı suallar verəcəyini (?-red.) düşünərək tədbiri tərk ediblər”.

İşıqların sönməsini və yalnız bir dəqiqə vaxtlarının olmasını əsas gəıtirən təşkilatçılar hazırladıqları müraciəti oxumadan tədbir zalını tərk etdilər.
Tədbirdə iştirak edən jurnalistlər və digər şəxslər buna ciddi etiraz etsələr də vəziyyət dəyişmədi.
Deputat Aydın Mirzəzadə də tədbiri yarımçıq tərk etdi. Müdafiə Komitəsinə üzv seçilən digər deputatlar – Qənirə Paşayeva, Fazil Mustafa və digərləri, ictimaiyyət nümayəndələri isə tədbirə əvvəldən qatılmamışdılar. Beləliklə də tədbir yarımçıq saxlanıldı.