Abşeron icra başçısının kafe biznesi...
Z. Fərəcova aid olduğu iddia edilən kafe ətrafında özbaşınalıq hökm sürür


Azərbaycanda sahibkarlığın inkişafına prezident tərəfindən dəstək verilir. Lakin yerlərdəki məmurlar mərkəzdə oturan bəzi yüksək çinli vəzifəlilərin himayəsindən "bəhrələnərək", bu prosesdən əksər hallarda öz məqsədləri naminə istifadə etməyə çalışır. Onlar tutduqları vəzifəyə bir növ gəlir əldə etmək məqsədi ilə yanaşaraq, bir çox hallarda qanuna zidd olaraq özləri bizneslə məşğul olurlar. Belə biznesmen-icra başçılarından biri də Abşeron rayon icra hakimiyyətinin başçısı Zakir Fərəcovdur. Onu da qeyd edək ki, o da bir çox məmurlar kimi tutduğu vəzifədə uzun müddət oturanlardandır. Belə ki, artıq 9 ildir ki, rayonun icra başçısıdır. Belə ki, Z. Fərəcovun rayon ərazisində, xüsusən də onun mərkəzi Xırdalan şəhərində müəyyən obyektləri var. Hansı ki, adının hallanmasının qarşısını almaq üçün o, bu obyektlərini başqalarına icarəyə verir. Artıq iki ildən çoxdur ki, Xırdalanın Heydər Əliyev prospekti, Təcili Tibbi Yardım Mərkəzinə yaxın ərazidə yerləşən kiçik bir park ərazisində kafe işləyir. Adı da "Karvan" kafesidir. Əraziyə yaxın yerdə yaşayan əhalinin söylədiyinə görə, bu yerin gerçək sahibi icra başçısı Zakir Fərəcovdur. Sadəcə olaraq, həmin yeri adları məlum olmayan gənclərə icarəyə verib. Əvəzində hər ay onlardan müəyyən məbləğ icarə haqqı alır. Məhz bu faktın özü icra başçısının qanuna zidd fəaliyyət göstərməsindən xəbər verir. Belə ki, Azərbaycan qanunlarına görə, vəzifəli şəxslər bizneslə məşğul ola bilməzlər. Amma bura Azərbaycan olduğundan qanunları hər addımbaşı pozmaq məmurların sanki bir həyat fəaliyyətinə çevrilib. Xatırladaq ki, Zakir Fərəcov icra başçısı olmamışdan öncə, isə Sumqayıt bələdiyyəsinin sədri vəzifəsini tutub. Ölkəmizdə bələdiyyələrin fəaliyyəti haqqında xoş təəssüratlar isə yox dərəcəsindədir. Bələdiyyə sədrlərinin yerli insanların problemlərini həll etməkdən daha çox, öz maraqlarının təminatçısına çevrildiyi də sirr deyil. Belə ki, bələdiyyə sədri postu tutanların çoxunun, bu statusdan sui-istifadə edərək, özləri üçün müəyyən biznes şəbəkələri yaratdıqları barədə dəfələrlə mətbuatda məqalələr yer alıb. Bu mənada Z. Fərəcov da yəqin ki, məhz vaxtilə bələdiyyə sədri olarkən biznes şəbəkəsi qurmaq vərdişinə yiyələnib.
O ki, qaldı sözügedən "Karvan" kafesinə buranı işlədənlər də icra başçısının qoltuğuna sığındıqlarından, işçilərinin hüquqlarını hər an tapdalamaqda davam edirlər. Belə ki, fəaliyyət göstərdiyi 2 ildən artıq müddətdə burada çoxsaylı insanlar çalışıb, sonra oranı tərk etməli olublar. Vaxtilə həmin kafedə işləyən xanımlardan birinin dediyinə görə, vəziyyətin belə olmasının səbəbi obyekti icarəyə götürən şəxsin işçilərinə əmək haqqı verməməsidir: "Versə də çox cüzi həcmdə pul verir. Hansı ki, onunla dolanmaq mümkünsüzdür. Halbuki, səhər tezdən, gecə 2-3- qədər işləyirik. Başqa bir tərəfdən, işçiləri əmək müqaviləsi bağlamadan işlədirlər. Çoxları da bundan xəbərsiz olduğundan, müqavilə bağlamağı tələb də etmir. Bütün bunlara görədir ki, burada çalışan qızlar uzağı 2-3 həftə çalışır, sonra çıxmağa məcbur olurlar". İcra başçısının icarəyə verdiyi kafe ətrafında yaransn digər maraqlı məqam, onun avtomobil yoluna çox yaxın məsafədə yerləşməsidir. Yolla onun arasındakı məsafə 4-5 metr ola bilər. Halbuki, qanun belə obyektlərin yol kənarından xeyli aralı olmasını tələb edir. Kafeyə yeyib-içməyə gələnlər də avtomobillərini əksər hallarda həmin avtomobil yolunun üzərində saxlayırlar. Bəzən, həmin yolda 10-15 maşın belə dayanır. Nəticədə, Xırdalandan çıxaraq Bakı və digər istiqamətlərə hərəkət etmək üçün nəzərdə tutulan bu iki palasalı yolun bir palasası həmin avtomobillər tərəfindən tutulur. Belədə, bir sıra hallarda kafenin olduğu yol ərazisi tıxacın qurbanı olur. Həmin vəziyyət, xüsusən də, axşam saatlarında, kafeyə daha çox müştərinin gəldiyi anlarda özünü göstərir. Yol polisi isə, kafenin gerçək sahibi icra başçısı olduğundan bu prosesə də göz yumur. Düzdür, Abşeron Rayon Polis Şöbəsinə yenicə təyin olunan təzə rəis, hansı ki o, "Azəryolservis"in rəhbəri Cavid Qurbanovun qardaşıdır, avtomobillərin kafe ətrafındakı sözügedən yol kənarında dayandırılmasının qarşısını almaq istəyib. Ancaq, verilən məlumatlara görə, o da buna nail ola bilməyib. Çünki, obyekt icra başçısı Zakir Fərəcova məxsusdur.

Rəşad Hüseynov