Qazax ƏSMM-nin direktoru vətəndaşların şikayətlərini qulaq ardına vurur

Qazax rayon ƏSMM-nin fəaliyyətində yer almış ciddi qanun pozuntularına dair məlumatlar əks olunmuş tənqidi materiallar dərc etmişdik. Qeyd etməliyik ki, həmin məlumatlar bizə yerli sakinlər, bu mərkəzin fəaliyyətindən şikayətçi düşən vətəndaşlar və Qazaxda olan digər mənbələr tərəfindən təqdim olunmuşdur. Materialda biz qeyd etmişdik ki, Qazaxdan daxil olan məlumatlarda rayon ƏSMM-nin direktoru Yasin Mürsəlovun özbaşınalıqlarına son qoyulması məqsədilə təcili tədbirlərin görülməsi tələbi irəli sürülür. Məlum olduğu kimi, son vaxtlar Qazax ƏSMM-nin fəaliyyətində yer almış ciddi qanun pozuntularına dair müxtəlif açıqlamalar müxtəlif kütləvi informasiya vasitələrinə ünvanlanan şikayət məktublarında tez-tez öz əksini tapmaqdadır.

Bu xüsusda redaksiyamıza daxil olan məlumatlarda da bildirilir ki, Qazax ƏSMM-də yoxsul ailələrin vaxtında ünvanlı sosial yardım almasına kağız süründürməçiliyi, bürokratik əngəllər, məmurların rüşvətxorluğu mane olur. Lakin bu günlərdə redaksiyamıza daxil olmuş digər bir məktubda Qazax ƏSMM-nin fəaliyyətində çeşidli nöqsanların yer ailmasına dair irəli sürülən bütün iddialar qətiyyətlə rədd edilir. Həmin məktubda bildirilir ki, materiallarda əks olunan faktlar böhtan xarakterlidir və və heç bir əsası yoxdur.

Əlbəttə ki, bu məktubda yazılanlar bizi də maraqlandıra bilərdi. Əgər həmin məktub Qazaxın sadə vətəndaşları tərəfindən imzalansaydı... Lakin redaksiyamıza daxil olmuş bu məktub ƏSMM-nin direktoru Yasin Mürsəlov tərəfindən imzalanıb. Yasin müəllim öz məktubunda vətəndaşlara verilən plastik kartların təqdim olunmasında da heç bir qanun pozuntusuna yol verilmədiyini və Milli Məclisin deputatı Əhməd Vəliyevlə də heç bir qohumluq əlaqəsinin olmadığını təkidlə bildirir.

Gördüyünüz kimi, biz obyektivliyə riayət edərək Mərkəz rəhbərliyinin mövqeyini də dərc edirik. Lakin bizim üçün sıravi vətəndaşlardan aldığımız məlumatlar həm daha etibarlı, həm də daha daha önəmlidir. Vətəndaşlar tərəfindən təqdim olunan məlumatlarda isə tam fərqli iddialar irəli sürülür. Bildirilir ki, Yasin Mürsəlovun rəhbərlik etdiyi bu mərkəzdə korrupsiya halları artıq kütləvi xarakter almışdır. Mənbələrin dediyinə görə ki, keçmiş mərkəz rəhbərinin qeyri-qanuni olaraq ünvanlı sosial yardım təyin etdiyi vətəndaşlarla korrupsiya sövdələşməsinə girməsi və bu əsasda dövlət vəsaitlərinin mənimsənilməsi halları indi də sürəkli şəkildə Yasin Mürsəlov tərəfindən həyata keçirilir.

Həmçinin qeyd olunur ki, bundan əvvəl Qazax ƏSMM-də müfəttiş kimi çalışan yeni direktorun əslində bu sahədə yetərincə iş təcrübəsi belə yoxdur. Mərkəzin işlərini isə elə əvvəlki qayda-qanunlara riayət olunmaqla, direktorun müavini Elxan Vəkilov aparır. Buna görə də daxil olan şikayət məktublarında Qazax sakinləri eynilə ƏSMM-nin keçmiş rəhbərliyi dövründəki yaramazlıqlardan şikayətçidirlər. Məlumatlarda vurğulanır ki, bu gün də Qazaxda müxtəlif maxinasiyalar hesabına sosial yardımdan yararlanan insanlar əslində buna ehtiyacı olmayanlardır.

Bu sahədə ədalət prinsiplərinin pozulması səbəbindəndir ki, Mərkəzin özünün, həm də ünvanlı sosial yardım sektorunun fəaliyyətində şəffaflıq indi də təmin olunmur, yardımları təyin edən komissiyaların işində ictimaiyyətin iştirakına yol verilmir.Yasin Mürsəlov isə öz məktubunda tələb edir ki, qəzetimizdə bu məlumatları təkzib edək. Əks halda isə o, qəzetimizi məhkəməyə verəcəyi ilə hədələyir. Nə deyə bilərik? Əgər əsil həqiqətlər məhkəmə araşdırması nəticəsində ortaya çıxacaqsa, biz buna iki əllə razıyıq. Təki Qazax ƏSMM-nin fəaliyyətindən sadə vətəndaşlar razı qalsınlar.

Rəşad Hüseynov