Ticarət mərkəzləri Həsənov qardaşlarının badına gedir

gundemxeber.az Qəzetimizin ötən saylarının birində “Laçın” və “Xalqlar Dostluğu” ticarət mərkəzlərinin yaxın vaxtlarda söküləcəyindən bəhs etmişdik. Bu günlərdə məlum məsələ ilə bağlı redaksiyamıza müraciət edən özəl mənbə ticarət mərkəzlərini hədələyən təhlükənin siyasi tərəfinə aydınlıq gətirib. Mənbənin bildirdiyinə görə, adıçəkilən ticarət mərkəzlərinin sökülməsinin digər bir səbəbi də K.Həsənovun tutduğu vəzifədən getməsilə bağlıdır: “Məlumat üçün qeyd edək ki, istər “Laçın”, istərsə də “Xalqlar Dostluğu” ticarət mərkəzlərində K.Həsənovun Əmlak Komitəsinin sədri kimi öz payı var və bu pay şəriklik səviyyəsinə qədər yüksəlir. Lakin komitə sədri öz şəxsi biznesini genişləndirmək istiqamətində ənənəvi mübarizəsini davam etdirdiyindən, artıq “zəbt edilən” obyektlərin fəaliyyətinə nəzarət etmək imkanı məhduddur. Məhz bu səbəbdən də komitə sədri “Laçın” və “Xalqlar Dostluğu” ticarət mərkəzlərinə nəzarət etməyi qardaşı M.Həsənova həvalə edib. Lakin son vaxtlar K.Həsənova qarşı ali hakimiyyətin münasibətinin mənfiyə doğru dəyişməsi, komitə sədrinin vəzifəsilə yanaşı, obyektlərini də təhlükə qarşısında qoyub. Buraya K.Həsənova məxsus obyektlərlə yanaşı, onunla şərikliyi olan obyektlər də daxildir”.
Mənbənin sözlərinə görə, Həsənov qardaşlarının sözügedən ticarət mərkəzlərilə əlaqəyə malik olduğu “yuxarılara” məlum olduğu üçün, komitə sədrilə hesablaşma əməliyyatına “Laçın” və “Xalqlar Dostluğu” ticarət mərkəzləri də daxildir: “K.Həsənov uzun illərdir ki, komitə sədri kimi tutduğu mühüm dövlət postundan istifadə edərək, sadəcə külli miqdarda torpaq və obyektləri ələ keçirməmiş, həmçinin özünü bir çox obyektlərə də basqı yolu ilə şərik etmişdir. Komitə sədrinin “Laçın” və “Xalqalar Dostluğu” ticarət mərkəzlərinə şərikliyi də məhz bu əsnada reallaşmışdır. Ancaq bu gün məlum şəriklik yalnız K.Həsənovun deyil, həmçinin sözügedən ticarət mərkəzlərinin də başağrısına çevrilib. Başqa sözlə desək, hər iki ticarət mərkəzinin tikilməsində K.Həsənovun zəhməti olmasa da, sökülməsindəki xidməti misilsizdir”.
Ticarət mərkəzlərinin yeni ildən sonra söküləcəyini vurğulayan mənbə, söküntü prosesilə bağlı maraqlı məqamlara toxundu: “Çox güman ki, məhz yeni ildən sonra “Laçın” və “Xalqlar Dostluğu” ticarət mərkəzlərinin sökülməsi prosesinə start veriləcək. Nə qədər ilginc olsa da, söküntü prosesinin, məhz K.Həsənov tərəfindən aparılması ehtimalı yüksəkdir. Belə ki, siyasi elitanın qənaətincə, adıçəkilən ticarət mərkəzlərindən illər uzunu məhz K.Həsənov faydalandığı üçün, onun sökülməsi prosesinin də komitə sədri tərəfindən reallaşması məqsədəuyğundurr. Onların fikrincə, belə yanaşma məntiqi baxımdan daha doğru və daha ədalətlidir. Şübhəsiz, K.Həsənova məxsusluğu olan obyektlərin elə onun özünə sökdürülməsi məsələsi, həm də, komitə sədrinə qarşı ikiqat cəza xarakteri daşıyır”.
Söküntü işləri başa çatdıqdan sonra yol və səkilərin əhəmiyyətli dərəcədə genişləndiriləcəyini bildirən mənbə piyada və nəqliyyatın gediş-gəlişinin də asanlaşacagını vurğuladı: “Artıq müəyyənləşən layihəyə əsasən, ticarət mərkəzləri söküldükdən sonra istər avtomobil, istərsə də piyadalar üçün nəzərədə tutulan yol xeyli genişlənəcəkdir. Yolların genişləndirilməsilə bağlı proses başa çatdıqdan sonra, qalan ərazidə çoxmərtəbəli binaların inşasına start veriləcək”.
Mənbənin bildirdiyinə görə, “Laçın” və “Xalqalar Dostluğu” ticarət mərkəzlərinin söküləcəyilə bağlı yayılan xəbərlərin ciddiliyi bəzi arendator və satıcıları ərazidəki qonşu obyektlərə axın etməyə vadar edib: “Ticarət Mərkəzlərinin söküləcəyi ilə bağlı informasiyalar hələlik praktiki baxımdan öz təsdiqini tapmasa da, vəziyyətin ciddiliyi bir çox insanı köç tədarükünə hazırlaşmağa vadar edib. Artıq indidən “Laçın” və “Xalqlar Dostluğu” ilə vidalaşan bir qrup icarədar yaxınlıqdakı qonşu obyektlərdə dükan sahibi olmağa çalışır. Onların fikrincə, “Laçın” və “Xaqlar Dostluğu” ticarət mərkəzləri söküldükdən sonra birdən-birə yüzlərlə insan qonşu obyektlərdə iş axtarışına çıxacaq ki, bu zaman normal şərtlərlə iş tapmaq imkansız olacaq. Buna görə də, indidən öz bizneslərini sığortalamağa çalışan bəzi icarədarlar, söküntü prosesi başlamazdan öncə, qonşu obyektlərdə mövqelərini möhkəmləndirməyə cəhd edirlər”.
Mövzunu diqqətdə saxlayacayıq

İlqar Rəsulov