Komitə sədrinin kölgədəki biznesi de-şifrə edilir

Dövlət Əmlak Komitəsinin sədri Kərəm Həsənovun son vaxtlar ali hakimiyyətdə arzuedilməz şəxsə çevrilməsi ilə bağlı ölkə mətbuatında kifayət qədər məklumat dərc olunub. Bugünlərdə redaksiyamızla əlaqə saxlayan özəl mənbə son vaxtlar komitə sədrinə qarşı yeni hücum kampaniyasına start verildiyini bildirib. Mənbənin sözlərinə görə, hakimiyyətin yuxarı eşalonunda təmsil olunan şəxslər komitə sədrinin gizli biznesinə əl qoymağa qərar verib: “Siyasi elitanın ona olan etimadını sürətlə itirən və sonucda müdafiəsiz qalan K.Həsənov bugünlərdə yeni bir problemlə üzləşib. Belə ki, K.Həsənovun Sumqayıtdakı zavodlarının əlindən alınmasından sonra komitə sədrinin gizli biznesinin də aşkarlanaraq ələ keçirilməsi prosesinə start verilib. Məlumat üçün qeyd edək ki, əmlak komitəsinin rəhbəri kimi fəaliyyət göstərdiyi uzun illər ərzində nəhəng biznes imperiyası formalaşdırmağa nail olan K.Həsənov özünün bütün yaxın əhatəsini də bu məsələyə cəlb edib. Məhz bu səbəbdən də bu gün K.Həsənov və onun qardaşı Malik Həsənova məxsus olan xeyli sayda obyekt komitə sədrinin qohumlarının və tanışlarının adına sənədləşdirilib. Bununla öz sərvətini başqa şəxslərin fəaliyyəti altında gizlətməyə çalışan K.Həsənov yad soyadlar altında nəhəng biznes şəbəkəsi yaratmağa müvəffəq olub. Ümumiyyətlə, qeyd edək ki, komitə sədrinin görünməyən biznesi görünən biznesindən daha böyükdür. Lakin son vaxtlar K.Həsənovun vuulması kampaniyasının fonunda komitə sədrinə məxsus məlum gizli biznesin de-şifrə edilərək əlindən alınması prosesi başladılıb. Artıq bunun fonunda komitə sədrinə məxsus bir çox obyektlərin onun əlindən alınaraq başqalarının adına sənədləşdirilib”.

Komitə sədri ona məxsus mini sexləri də itirib

Mənbənin sözlərinə görə, məlum kampaniya gedişində K.Həsənova məxsus, əsasən Bakı və Sumqayıt şəhərində yerləşən xeyli sayda mini sex də komitə sədrinin əlindən alınıb: “K.Həsənov daha böyük və daha gəlirli biznesə malik olsa da, onun Bakı və Sumqayıt ətrafındakı mini sexlərdən də ciddi gəlir əldə etdiyi şübhəsiz idi. Komitə sədri kimi dövlətin ona verdiyi yetkidən istifadə edərək Abşeron yarımadasındakı əksər orta və mini sexləri öz əlində cəmləşdirən K.Həsənov bir çox sahədə olduğu kimi bu sahədə də çoxsaylı rəqiblərlə mübarizədə diktə edən tərəf kimi çıxış edirdi. Lakin Heydər Əliyev Mərkəzindəki yanğın və çöküntüdən sonra siyasi kariyerasının tənəzzülünə qədəm qoyan K.Həsənovun bir çox sərvəti kimi mini sexləri də komitə sədrinin əlindən alınıb. Proseslərin bu şəkildə davam edəcəyi təqdirdə K.Həsənovun mərhələli şəkildə bütün əmlakından məhrum ediləcəyi, əmlaksız əmlak sədrinə çevriləcəyi qaçınılmaz olacaq”.

Kərəm Həsənovun seçki gözləntisi

Komitə sədrinin cari ilin oktyabr ayında keçiriləcək prezident seçkiləri ilə bağlı ciddi planlara malik olduğunu söyləyən mənbə, K.Həsənovun nəyin bahasına olursa-olsun öz kreslosunu qorumağa çalışdığını vurğuladı: “Qarşıdakı prezident seçkiləri siyasi hakimiyyətdə təmsil olunan bir çox məmur kimi K.Həsənovun da əsas maraq dairəsindədir və komitə sədri seçki öncəsi yaranan həsas şəraitdə ciddi manevrlər etməklə öz vəzifəsini qoruyub saxlamağı proqnozlaşdırır. Siyasi elitanın ondan yetərincə narazı olduğunu bilən K.Həsənov, özünün 16 oktyabr seçkilərinə qədər sığortalandığı qənaətindədir. Komitə sədri hesab edir ki, “yuxarılar” onun nöqsanlarından boğaza yığılsa da, bütün diqqət və potensialın oktyabr seçkilərinə cəlb olunduğu bir ərəfədə hakimiyyət düşərgə daxilində şübhə və tərəddüdə yol verməmək üçün onu işdən azad etməyəcək. Başqa sözlə desək, komitə sədri heç deyilsə oktaybr seçkilərinə qədər toxunulmazlığa malik olduğu qənaətindədir. K.Həsənovun fikrincə, seçki öncəsi və seçkidən dərhal sonra hakimiyyət daxilində müəyyən manevrlər hesabına öz mövqeyini möhkəmləndirə bilər ki, bu da ona daha bir müddət sahib olduğu kreslonu qoruyub saxlamağa kömək edə bilər. K.Həsənovun məlum gözləntilərində nəzəri baxımdan müəyyən məntiq olsa da, əslində hakimiyyətin seçkiyə qədər komitə sədri ilə haqq-hesab çəkəcəyi daha məntiqli və inandırıcı görünür. Ola bilsin ki, hakimiyyət K.Həsənov və daha bir neçə şəxsi özündən uzaqlaşdırmaqla oktyabr seçkilərinə daha etibarlı və güvənli komanda ilə qatılmaq istəsin. Əgər belə olarsa, o zaman K.Həsənov öz kreslosu ilə vaxtından daha tez vidalaşmalı olacaq”.

Komitə sədrini bitirən daha bir səbəb

Mənbənin məlumatına görə, hakimiyyətin K.Həsənovla bağlı narazılığının digər bir səbəbi komitə sədri və onun qardaşı Malik Həsənovun əməllərinin sosial narazılığa səbəb olması il bağlıdır: “K.Həsənovla siyasi elita arasındakı ilkin bağlılığın qopmasının bir çox səbəbi var ki, bunlardan da biri komitə sədri və onun qardaşı M.Həsənovun fəaliyyətlərinin sadə vətəndaşlar tərəfindən narazılıqla qrşılanmasıdır. Hakimiyyət hesab edir ki, ölkədaxili vəziyyətin indiki həssas məqamında Həsənov qardaşlarının sosial narazılığı görükləməsi bütövlükdə hakim düşərgə üçün acınacaqlı nəticələrə səbəb ola bilər. İstər Cəlilabad, istərsə də Bakı sakinlərinin ölkə mətbuatı vasitəsi ilə ölkə başçısı və digər əlaqədar yetkililərə ünvanladıqları şikayət məktubları, erirazlar Həsənov qardaşlarının xalqı hakimiyyətdən kifayət qədər narazı saldığını göstərir. Bu baxımdan hakimiyyət hesab edir ki, K.Həsənovun vəzifədən uzaqlaşdırılması bu narazılıqların da aradan qalxmasına, vətəndaşların hakimiyyətə olan inamının möhkəmlənməsinə səbəb ola bilər”.
İlqar Rəsulov