Günahsız Məhbub Zülfüqarovu isə cəzalandırır...



gundemxeber.az saytına İmişli şəhəri L. Vəliyev küçəsi, 38 sayl evdə yaşayan Məhbub Əvəz oğlu Zülfüqarov tərəfindən şikayət ərizəsi daxil olub. Burada o, cinayətkarların təmizə çıxarılması ilə yanaşı, özünə qarşı rayondakı bəzi məmurlar tərəfindən heç bir əsas olmadan qanunsuzluğa yol verildiyini diqqətə çatdırıb: "Prezidentin səlahiyyətləri içərisində cinayətkarları axtarmaq yoxdur. Bu hüquq-mühafizə orqanlarının işidir. Prezident dövlətin simvoludur. Ali təhsilimə, ziyalılığıma bu qədər həqarəti, alçalmağımı, dövlətim adına ayıb saydığım üçün, dövlətin simvolu kimi, cənab prezident sizdən kömək istəyirəm.
Sizə, nazir və komitə sədrlərinə yazdığım şikayətlərə və KİV-dəki çıxışlarıma görə təqib olunduğumu qeyd edirdim. 6 iyul 2014-cü ildə isə çıxışımda, təqibi təşkil edən və reketlərin adlarını belə dəqiq çəkmişdim. 10 iyul 2014-cü il tarixində isə sifarişlə ünvanıma təhqir, təhdid yağdıran Əlimuxtar Həsənov adlı birisi, Mərkəzi Poçtun qarşısında yerləşən qəzet köşkünə gələrək, burada məni soruşaraq, tapıb maşınının baqajına qoyub «Araz»ın (çay nəzərdə tutulur) qırağına apararaq, bir də yazmaması üçün sındıracağını elan edir.
19 iyul 2014-cü il tarixdə isə həmin şəxs Mərkəzi Poçtun qarşısında mənə hücum etdi. Ona bircə kəlmə dedim: «Ağzım orucdur, sənə baş qoşmayacağam». Məni itələdi və yenə də təhqirlə dolu, əxlaqına uyğun ifadələrlə söyərək, ordan aralandı. Bilirdim ki, 3 aydır Əmlak Kotmitəsinin Şirvan Regional İdarəsinin rəisi, Məhəmməd Qanbayev onun himayə etdiyi, kupça verdiyi Səbail Rayon Məhkəməsinin hakimi Azad İmanov, İmişlidə çoxsayşlı mağaza və mülklər sahibi olan qardaşı Fuad İmanov bu «tərbiyəli», yazıb-poza bilməyən, sifariş yerinə yetirən reketi notariusla özlərinə qanuni nümayəndə seçiblər. İyunun 16-da isə həmin reket İmişli RİN-nin yaxınlığında, su idarə rəisləri Mirqoca Mirişov, Allahvedi müəllim, Təhsil şöbə müdüri R. Əmirov, yazıçı jurnalist Məryəm Şahverdiyevanın və bəndənizin yanına gələrək yenə də mənə qarşı təhqiramiz ifadələrə yol verdi. Baş verən bu olaylar barədə “Gündəm Xəbər” qəzetində yazı dərc etdirdim, habelə, sizə və nazir, komitə sədrlərinə məktubla müraciət ünvanladım. Həmin vaxt bu reket və sifarişçilər layiqli cəzalarını alsaydı, onlar başqalarının hüquqlarını tapdalamaz, əxlaqsız, tərbiyyəsiz hərəkətlərə yol verməzdilər. 19 iyul tarixində İmişli Rayon Polis Şöbəsinə yazılı ərizə ilə müraciət etdim. Bu barədə məlumatı "Turan” İA-yi də yayıb. Amma DİN-in mətbuat xidməti məlumat verdi ki, şikayətim daxil olmayıb.Əlacsız qalıb 102 xidmətinə zəng etdim. 3 gün sonra İmişli Rayon Polis Şöbəsinin sahə rəisi Əliş Xəlilovla görüşdüm. O isə şikayətimi geri götürməyi təklif etdi. Sözsüz ki, onun bu təklifi ilə razı olmadım.
Əlimuxtar Həsənov öz təhqiredici ifadələrinə görə, 2010-cu ildə 15 günlük həbs cəzasına da məhkum edilmişdi. Bu reket həmçinin, dəfələrlə narkotik üstündə həbsxanada yatıb.
İyul 30-da olayla bağlı olaraq İmişli Rayon Məhkəməsində məhkəmə baş tutdu. Hakim Ülvü Qənbərov Əlimuxtar Həsənovu, eləcədə heç bir əsas olmadan məni 296-cı maddə ilə ittiham etdi. Bu zaman zərərçəkən olaraq, şikayətçi oduğumu onun diqqətinə bir daha çatdırdım. Reket Ə. Həsənov isə burada da utanıb çəkinmədən bağıra-bağıra ünvanıma təhdidlər danışır, nalayiq sözlər dedi. Bu zaman hakimin səssizliyi onu daha da cürətləndirirdi. Hakimə etirazımı bildirdim. Amma bu barədə hökmdə heç bir qeyd yox idi. Belədə zərər çəkən və şikayət edən olsam da, hakimin hökmü ilə “zərərçəkən” qismində Ə. Həsənov göstərildi. Mənə isə 50 manat cərimə kəsildi.
Cinayətkarın, “mələk” elan edildiyi, ziyalının aşağılandığı bir dövlətin vətəndaşı olmağımdan dəhşətə gəldim. Dövlətimin, iç siyasəti budursa, axı niyə burada yaşayıb ədalətdən danışaq. Məgər yalan yazmışdım ki, H. Əliyev parkında otel tikmək olmaz? MRX-a qarşısındakı parkı özəlləşdirib 14 hektar ərazini sotunu 3 min manatdan satırlar. Mafiya birləşdi, daha şikayət etməyim yersiz. Belə çıxır ki, mafiyanın girovuyam. Ə. Həsənovu “zərərçəkən” elan edən polis, hakim qanunlara, dövlətə, onun vətəndaşı olan mənim kimi insanlara terror etdi. Bu əməlin adı hüquqi nihlizimdir. Belə çıxır ki, bu ölkədə bəzi məmurların nəzərində haqqı tələb etmək cinayətkarlıqdır. Onlara görə, əzilən qətiyyən haqqını tələb etməməli, mətbuatda səs salmamalıdər. Bunu edərsə, əlişlərin vasitəçiliyi ilə etmədiyi halda xuliqanlıqda, zorlama, narkotika, qətldə suçlanacaqdır. Prezident Adminstrasiyası və DİN-ə göndərdiyim şikayətlərə vaxtında cavab verilsəydi heç kimsə bu qədər ədalətsiz davrana bilməzdi. Bu qurumlar araşdırmaq üçün müraciətimi İmişli Rayon Polis Şöbəsinə göndərmişlər. Amma nə araşdırıldı?
Bu rayonda tədbir görmək lazım gələrsə, onu cinayətkara münasibətdə deyil, zərərçəkmişə münasibətdə həyata keçirirlər. Baş Prokurorluğdan kiçik bildiriş göndəriblər. Ədliyyə nazirliyindən cavab yoxdur, Əmlak Komitəsi Şirvan Regional idarə rəisi M. Qambayevi mələyə çevirən iki məktub göndərib".
Sonda şikayətçi prezidentə müraciət edərək 6 və 24 iyul, 19 avqust 2014-cü il tarixlərdə ünvanladığı şikayətlərin araşdırmasını vicdan əzabı çəkərək xahiş edir.
Qeyd edək ki, Məhbub Zülfüqarov bu şikayət ərizəsini prezident İlham Əliyevə, baş prokuror Zakir Qaralova, daxili işlər naziri Ramil Usubova, Ədliyyə Nazirliyi yanında Məhkəmə Hüquq Şurasına və bir sıra digər qurumlara ünvanlayıb.
Həsən