Gundemxəbər.az saytının mötəbər mənbədən aldığı məlumata görə, Goranboy rayonunun Safıkürd kənd sakini, Müzəffər kişinin oğlu Rafiq Hüseynov ailə münaqişəsi zəminində cinayət hadisəsi törədib. Mənbənin bildirdiyinə görə, Allahyar adında başqa bir kişinin Südabə adlı qızı ilə evli olan bu adam evdə yoldaşı ilə bərk dalaşır. Hansı ki, bu dava da sonda qətl hadisəsilə nəticələnir: "Bu davadan sonra, qız qaçıb anasıgilə gedir. Müzəffərin oğlu da qayatasıgilə gələrək, yoldaşının geri qaytarılmasını tələb edib. Qaynana isə buna razı olmayıb. Belə olan halda, ər yoldaşını qaytarmasalar, hamını öldürəcəyi ilə hədələyir. Sonda təəssüf ki, dediyi kimi də edir. Belə ki, heç kəsin güman etmədiyi halda, bu gün (dünən-red.) səhərə yaxın, saat 4.00-da qaynatasıgilə gələrək, evə qumbara atıb. Nəticədə verilən məlumata görə, bir ailənin 7 üzvü həlak olub.


Safıkürd kənd İcra Nümayəndəliyinin rəhbəri Eldəniz Həsənəliyevin mətbuata verdiyi məlumata görə isə, qətliamı törədən şəxs Südabə Hüseynovanın ikinci həyat yoldaşı Rafiq Hüseynovdur: “Daha əvvəl bir dəfə ailə həyatı quran Rafiq həyat yoldaşından boşandıqdan sonra 30 yaşlı Südabə Hüseynova ilə evlənib. İki ayın gəlini olan Südabə ailə münaqişə zəmində atası evinə qayıdıb. Arvadını evinə qaytarmaq məqsədi ilə qayınatasıgilə gələn Rafiq Südabəni evə dönməyə razı sala bilməyib. Əliboş geri qayıdan Rafiq gecə saatlarında evdəki ov tüfəngini götürüb və yenidən qayınatası evinə üz tutub. Sonra isə məlum qətliam baş verib”.

İcra nümayəndəsi Hüseynovların 4 qardaş olduğunu da bildirib: "Rafiqin qardaşı Şaiq Hüseynov da 2005-ci ildə ailə münaqişəsi zəmində özünü asaraq intihar edib. Həmin vaxt da intihara səbəb arvadının onu tərk etməsinə Şaiqin dözə bilməməsi olub. Bundan başqa kənd sakinləri R.Hüseynovun əyyaş və narkoman olması haqqında fikirləri qəbul etmirlər. Sakinlərin bildirdiyinə görə, Rafiq ancaq məclisdən-məclisə spirtli içki qəbul edib.
Onun daha bir qardaşı Cinayət Məcəlləsinin oğurluq maddəsi ilə məhkum edilib. Rafiqə gəlincə, onun adı əvvəllər hər hansı cinayət əməlində hallanmayıb.
Araşdırmamız əsasında məlum olub ki, qatil setka sexində fəhlə işləyirmiş.
Rayon Polis Şöbəsindən mətbuata verilən məlumata görə, evə olunan silahlı hücum nəticəsində qətlə yetirilən şəxslər-1958-ci il təvəllüdlü Diləzbər Alı qızı Məmmədova, 1983-cü il təvəllüdlü Fərqanə Allahyar qızı Məmmədova, 1951-ci il təvəllüdlü Ofelya İsa qızı Məmmədova, 1963-cü il təvəllüdlü Həvayət Xanlar qızı Məmmədova, 1984-cü il təvəllüdlü Südabə Allahyar qızı Hüseynova, 1989-cu il təvəllüdlü Namiq Allahyar oğlu Məmmədov və 2011-ci il təvəllüdlü İsa Elvin oğlu Məmmədovdur.
Silahlı insident zamanı daha iki nəfər- 1986-cı il təvəllüdlü Namiq Məmmədova və 1988-ci il təvəllüdlü Günel Məmmədova yaralanıb.
Həyata keçirilən tədbirlər nəticəsində hadisəni törədən şəxs-Rafiq Müzəffər oğlu Hüseynov saxlanılıb.

Həsən