Təhsil naziri Mikayıl Cabbarovun dəfələrlə rektorlara təhsil ocaqlarında imtahanların şəffalığını və qanunlara müvafiq keçirilməsini təmin etmək məqsədilə xəbərdarlıq etməsinə baxmayaraq, bir sıra ali məktəblərdə vəziyyət olduğu kimi qalır. Xüsusən bəzi özəl ali məktəblərdə imtahanlar üçün "pul yığımı” yenə işləkdir. Bu siyahıda həmişə olduğu kimi, yenə də Təfəkkür Universiteti "lider”dir.gundemxeber.az-a daxil olan məlumata görə sözügedən universitetdə imtahan öncəsi yenə də rüşvət yığımına başlanılıb. Məlumatda qeyd olunur ki, artıq sessiya öncəsi rektor Müşviq Atakişiyevin adından dekanlar vasitəsilə tələbələrdən pul yığılıb. Hər bir tələbədən imtahan sessiyasını "yola vermək” üçün 500-1000 manat istənilir.
Ümumilikdə hər imtahanın qiyməti 150-200 manat civarında dəyişir. Amma elə tələbə var ki, bu pulu ya verə bilməyib ya da verməkdən imtina edib. Məhz bu səbəbdən də rektor göstəriş verib ki, həmin tələbələrdən imtahan ciddi şəkildə götürülsün. İmtahanlara pul verməyən tələbələrin gundemxeber.az-a ünvanladığı müraciətdə qeyd olunur ki, imtahanlara yalnız pul verməyən tələbələr gəlir. Pul verənləri isə imtahan maraqlandırmır. Tələblər bildirir ki, bu vəziyyətə etiraz etdikdə və ya təhsil nazirliyinin "qaynar xətt”inə şikayət edəcəklərini dedikdə onlara "olan sizə olacaq, ondansa pulunuzu verib, işinizi həll edin” şəklində reaksiya verilir. Ən maraqlısı isə odur ki, öz biliyi ilə fərqlənən tələbələrə belə güzəşt olunmur. Onlara "heç olmasa hər imtahana 50 manat ödəyin” şəkilində xəbərdarlıq edilib. İmtahanlara ciddi hazırlaşan tələbələrə isə "oxuyursunuz özünüz üçün, biz sizə onsuzda güzəşt edirik” kimi absurd fikirlər səsləndirlilib.
Təfəkkür Universiteti tələbələrinin gundemxeber.az-ın elektron poçtuna göndərdiyi məktubda daha ilginc məqamlar da yer alıb. Belə ki, yeni il tətilindən sonra bu ali məktəbdə maraqlı olay yaşanıb. Tələbələrin sözlərinə görə yanvarın 6-da Universietin İqtisadiyyat və nəqliyyat fakültəsində imtahan keçirilmişdir. İmtahana tələb olunan rüşvəti verəcəyini söz verən tələbələrdən biri həmin gün pulu gətirməyib. Həmin tələbənin adını məlum səbəblərdən çəkməyən şikayətçilər gundemxeber.az-a hadisəni belə təsvir edir: "Tələbə yoldaşımızın bütün yalvarışlarına baxmayaraq ona qiymət yazılmadı. Hərçənd ki, həmin tələbə pulu bir neçə saat sonra çatdıracağını bildirirdi. Nəhayət imtahandan sonra imtahan vərəqəsini bağlamadılar və həmin tələbənin adının qarşısını boş saxlayaraq pulun gətirilməsini gözlədilər. Pul gətirilənədək isə tələbə otaqlardan birində bağlı qapı arxasında girov vəziyyətində saxlandı."
Qarşı tərəfin də mövqeyini dərc etməyə hazırıq.