Klassik Xalq Cəbhəsi Partiyasının bələdiyyə seçkilərinin sonu ilə bağlı bəyanatı

Kütləvi qanun pozuntuları və total saxtakarlıqla son 21 ildə növbəti seçki yola verildi. Atıq dördüncü dəfədir ki, hakimiyyət orqanları saxta seçkilərlə yeni “bələdiyyələr” formalaşdıraraq yerli idarəetmə orqanlarının normal formalaşmasına imkan vermədi.
Bələdiyyə seçkiləri bütün mərhələlər üzrə kütləvi qanun pozuntuları şəraitində, qeyri demokratik mühitdə, demokratik tələblərdən uzaq seçki qanunvericiliyi ilə, məmurların maraqları əsasında formalaşmış seçki ərazilərində, hakim partiyanın tam nəzarətində olan seçki komissiyaları vasitələriylə, gerçəkliyə uyğun olmayan seçici siyahıları əsasında, qeyri-demokratik seçkiqabağı mühitdə, namizədlərin qeydiyyatını tam nəzarətdə saxlayan icra hakimiyyəti orqanları seçki gününü total saxtakarlıqla başa çatdıraraq nəticələri Mərkəzi Seçki Komissiyasının qeydiyyatından keçirtdi.
Seçki komissiyaları, icra hakimiyyətləri strukturları, polis və digər dövlət orqanları tərəfindən hətta, nüfuzlu adamlar və din yetkililəri vasitəsilə seçki hüququndan istifadə etmək istəyənlərə, onların ailə üzvlərinə, yaxın adamlarına süründürməçilik, şirnikləndirmə, xahiş,
bezdirmə, qorxuzmaq kimi üsullarla çeşidli təzyiqlər göstərərək kütləvi surətdə müxtəlif qeyri-qanuni tələblər həyata keçirilmişdir.
İctimaiyyətin geniş kütləsi bələdiyyə seçkilərindən xəbərsiz qaldı. Yerli idarəetmə ilə müqayisədə heç bir əhəmiyyətə malik olmayan, əksinə, neftin qiymətdən düşməsi ilə daha böyük problemlərlə üz-üzə qalan ölkəmizə astranomik vahidlərlə ölçülən maliyyə vəsaitinə başa gələn “2015-ci il Avropa oyunları”na qalan vaxtı ən kiçik zaman vahidinə qədər reklam edən hakimiyyət, görüntü xarakterli bəzi tədbirlər keçirsə də, bələdiyyə seçkilərini mümkün vasitələrlə ictimaiyyətin geniş kütləsindən gizli saxladı.
Nəticə etibarı ilə seçki günü: seçici fəallığı çox aşağı olmuş, karusellər təşkil edilmiş, seçki qutuları topa bülletenlərlə dolrurulmuş, seçki məntəqələrinə müdaxilə edən polislərlə seçicilər arasında qarşıdurmalar yaranmış, işıqlar söndürülmüş, ən əsası isə seçki məntəqələrində səsvermənin nəticələrinə dair yekun protokollar yazılmamışdır.
İcra hakimiyyəti nümayəndələrinin və seçki komissiyaları üzvlərinin yaxın qohumlarından təşkil edilmiş namizədlərdən “seçilmiş” bələdiyyə üzvləri sıralarında, Sovetlər dövründə olduğu kimi, süni yollarla “gender bərabərliyi”, təhsil mütənasibliyi yaradılmışdır.
Seçki komissiyaları və dövlət orqanları Nərimanov, Qazax, Masallı, Kürdəmir, Saatlı və digər rayonların ərazilərindəki seçkilərdən edilən şikayətlərə obyektiv cavab verməmiş, qanun pozuntularını aradan qaldırmamışlar. Mərkəzi Seçki Komissiyası şikayətlərdə qoyulan problemləri ört-basdır etmiş, əməkdaıları şikayətlərə rəsmi cavab vermək əvəzinə şikayətçilərə telefon açaraq hüquqa zidd söhbətlər aparmış, qaynar xətt (115) isə seçki günü saat 21.00-dan sonra telefon çağrılarına cavab verməmişdir.
Kütləvi şəkildə baş verən qanun pozuntuları, ədalətsiz, qeyri-azad, bərabərlikdən uzaq, şəffaf olmayan, qeyri-demokratik, hakimiyyətin tam müdaxiləsi ilə total saxtakarlıq şəraitində keçirilən və cəmiyyətə "bələdiyyə seçkiləri" adı ilə təqdim edilən bu proses seçki ilə bağlı görsəntidən başqa bir şey deyildir.
KXCP, 23 dekabr 2014-cü il tarixində keçirilmiş bələdiyyə seçkilərini azad olmayan,
şəffaflıqdan uzaq, ədalətsiz və qeyri demokratik hesab edir, seçkinin nəticələrini tanımır və
bələdiyyə seçkilərinin yenidən keçirilməsini tələb edir.