Müraciətdə deyilir: ''Yarandığı gündən icra hakimiyyətinin əlavəsinə çevrilmiş bələdiyyələrin yerli idarəetmədən uzaq formal fəaliyyət göstərdiyi şəraitdə artıq dördüncü dəfədir ki, ölkəmizdə bələdiyyə seçkiləri keçiriləcəkdir.

Zəruri qanunvericilik bazasının olmaması, mövcud qanunların icra edilməməsi və seçkilərin saxtalaşdırılması nəticəsində hakimiyyət orqanlarının maraqlarına uyğun formalaşan bələdiyyələr yerlərdə real gücü olmayan əhəmiyyətsiz qurumlara, icra hakimiyyətlərinin əlavəsinə çevrilmişdir.

Ölkədə azad, şəffaf və ədalətli seçkilərin keçirilməməsi yerli idarəetmə orqanlarının normal formalaşmasına imkan vermir. Ölkəmizdəki bütün seçkilər, o cümlədən bələdiyyə seçkiləri, kütləvi qanunsuzluqlarla keçirildiyindən bələdiyyələr icra hakimiyyətlərinin maraqları əsasında formalaşır.
Seçkilər bütün mərhələlər üzrə kobud qanun pozuntuları şəraitində, qeyri demokratik mühitdə keçirilir. Seçki qanunvericiliyi yarıtmaz, seçki əraziləri qanuna zidd, seçki komissiyaları bir qrupun nəzarətində, seçici siyahıları gerçəklikdən uzaq, qeyri-demokratik seçkiqabağı mühit, total saxtakarlıqla müşahidə edilən seçki günü, şikayətlərin obyektiv araşdırılmaması, ümumiyyətlə tamamilə icra hakimiyyətlərinin maraqları çərçivəsində və nəzarətində keçirən seçkilər son iyirmi altı ilin acı gerçəkliyidir.

Klassik Xalq Cəhəsi Partiyası:
1.Seçki Məcəlləsində beynəlxalq təşkilatların tövsiyələrinə uyğun dəyişiklik aparılmaması, seçki komissiyalarının siyasi qüvvələrin iştirakı ilə formalaşmaması, seçici siyahılarının dəqiqləşməməsi, seçkiqabağı demokratik mühitin yaradılmaması, seçki günü saxtakarlıqların qarşısının alınmaması, seçki şikayətlərinin obyektiv araşdırılmasının təmin edilməməsi və icra hakimiyyəti orqanlarının seçkilərə qanunsuz müdaxilələrinin qarşısının alınmaması, seçki pozuntuları ilə bağlı Avropa İnsan Haqları Məhkəməsinin çoxsaylı qərarlarının icra edilməməsi səbəbindən 2019-cü il bələdiyyə seçkilərini seçkilərini baykot edir.
2.Siyasi partiyaları, vətəndaş cəmiyyətini, ziyalıları, gəncləri, qadınları, cəmiyyətin bütün təbəqələrini 2019-cü il bələdiyyə seçkilərini baykot etməyə çağırır.

KXCP Ali Məclisi.
18 oktyabr 2019-cu il.