Ailə üzvləri revmatizmlə mübarizədə

“Gündəm Xəbər”ə üz tutan, taleyinə köçkünlük həyatı yazılan soydaşlarımızdan biri, Kəlbəcər rayonu Qılınclı kənd həsrətli Yaşar Salmanovdur. O, bildirir ki, Sumqayıt şəhəri İnşaatçılar qəsəbəsi, 5 saylı yataqxanada məskunlaşıb. Yataqxanada o, 4 nəfərlik ailə üzvləri ilə birlikdə 12 kv.m sahəsi olan darısqal bir otaqda yaşayır. Əgər buna yaşamaq demək mümkündürsə?
Minlərlə ölkə vətəndaşı mental dəyərlərimizə baxmayaraq, bu gün 5-6, bəzən isə daha çox ailə üzvüləri bir otaqda, üst geyimində yatmaq məcburiyyətində qalırlar. Darısqal, cansıxıcı həyat şəraiti ilə bağlı, aidiyyəti qurumlara edilən müraciətlərə isə heç bir əhəmiyyət verilmir.
Qeyd olunan ünvanda yaşamaq Y.Salmanova, daxili orqanlarını itirmək bahasına başa gəlib. Artıq onun öd kisəsi əməliyyat edilərək çıxarılıb. Yayda rütubət, qışda soyuqdan bütün ailə üzvləri xroniki bronxid, nəfəs yollarının iltihabı, revmotizm kimi xəstəliyə düçar olublar.
Divarın əks tərəfində ümumi vanna otağı yerləşir. Arakəsmə divar gips məmulatı materialından hörüldüyündən, bütün rütubətliliyi özünə çəkərək otağın daxilinə ötürür. Otağın divarları, tavanı və döşəməsi rütubətlilikdən göbələk atıb, divar kağızının altı isə kiflənərək qopub.
Tibbi ədəbiyyatlarda göstərilir ki, əgər daimi yaşayış sahəsində rütubət göbələyi (divar, döşəmə, tavan) varsa, ağ ciyər vərəminə yoluxma risqi 99.09 faiz qaçılmazdır.
Vətəndaşların şikayət və müraciətini laləyanaq məmurların, peysərlərinə almaları artıq vərdiş halını da alıb.
Y.Salmanov dəfələrlə ərazi üzrə MİS-ə müraciət etməsinə baxmayaraq, “problemimə əncam çəkən yoxdur deyir. Yalnız, MİS rəisi “evimizə” dalandar (küçə süpürən) göndərərək, onun vasitəsilə ev şəraitimizlə tanış olub.
Ailənin gündəlik tələbatını ödəyə bilməyən Y.Salmanov, bu gün nə edəcəyini bilmir və tərəddüd içindədir.
Özü və ailə üzvlərinin müalicəsi üçün, həkimin yazdığı dərmanları almaq gücündə də deyil. Dərmanları almaq üçün, o, yaxınlarından borc pul almaq məcburiyyətində qalıb.
Y.Salmanov onu da bildirir ki, “ümumiyyətlə yaşadığımız inşaatçılar qəsəbəsi, dövlət tərəfindən unudulub. Bir ara dedilər ki, qəsəbə söküləcək və yerində qaçqın şəhərciyi tikiləcək. Xeyli müddət vaxt keçib, hələ ki, bir iş görülməyib. İH başçısı E.Əzizov ancaq prezident keçən yolların ətrafındakı evləri bəzəməklə məşğuldur.
22 ildir yaşadığım qəsəbənin heç çala-çuxuruna da baxan yoxdur. İnşaatçılar qəsəbəsi 2-ci Dünya Müharibəsində əsir götürülən almanlar tərəfindən salınıb. Almanlardan sonra, qəsəbədə daşı-daş üstə qoyan olmayıb. İnşaatçılar qəsəbəsinə E.Əzizov heç gözünün ucu ilə də baxmır.”
Y.Salmanov üzləşdiyi problemlə bağlı, dəfələrlə İH başçısı E.Əzizova müraciət etməsinə baxmayaraq, onun şikayətinə cavab verilməyib.
Ailənin iki ildən sonra hərbi xidmətə yollanacaq Anar adlı oğlu var. Normal dövlətdə gəncliyin sağlamlığı ən vacib qayğılardandır. Ölkədə strateji milli məsələlər arxa planda olduğu kimi, gəncliyin sağlamlığı da elə bir önəm daşımır.
Y.Salmanovun “mənzilin”də olarkən bir neçə dəqiqəlik vaxt ərzində doğrudan da özümüzü rütubətli, havasız bir zirzəmidə hiss etdik.
Y.Salmanov Qaçqın və Məcburi Köçkünlərlə İş Üzrə Dövlət Komitəsinin sədri (həm də baş nazirin müavini) Əli Həsənova müraciət edib. Müracətindən aylar ötsə də, hələ ki cavab yoxdur.
Missiyamızızsa qərəz deyil. “Gündəm Xəbər” olaraq problemləri araşdırıb tənqid edirik ki, “şəffaf” fəaliyyət göstərəsiniz.
Hörmətli cənablar! Bu rəzil günə qoyduğunuz VƏTƏN-i, yağı düşməndən qoruyan kasıb balalarıdır. Sizlərin törəmənizə vətən təəssübü, hərbi xidmət, ana dilimiz onsuz da yaddır. Əlinizdə görəv (sizin təbirinizcə:girəvə)varkən, saysız-hesabsız günahlarınızdan təmizlənin!
İndiki halda vaxt itkisi, özünüməhvə bərabərdir!

Şakir Həsənsu