Eyvaz Hüseynov əkin sahələrini kimlərə peşkəş edib; məcburi köçkünlərin mənzil təminatının da şübhəli yollarla həll olunduğu iddia olunur

Xocavənd rayon İcra Hakimiyyətinin başçısı Eyvaz Hüseynov, təkcə rayonun məcburi kökçünlərinin evlə təminatı məsələsini alverə çevirməyib. O, həm də Nazirlər Kabinetinin qərarı ilə, rayona Beyləqan və Ağcabədidən ayrılmış əraziləri satmaqda, böyük bir saxtkarlığa imza atıb.

Mövvzuya keçməzdən əvvəl qeyd edək ki, «Qaçqınkom»un Xocavənd üzrə birbaşa nümayəndəliyi olmadığından, icra başçısı məcburi köçkünlərin mənzil təminatını çox rahatlıqla həyata keçirir: «Xocavəndlilərin mənzillə təminatı ancaq və ancaq, icra başçısı Eyvaz Hüseynovun barmağının işarəsindən aslıdır. Onun barmağı isə, ancaq və ancaq iki min manatdan başlayan rüşvətlə qalxıb, enir. Nə qədər qəribə səslənsə də, icra başçısının bu «kampaniya»sında, nə başçının humanitar məsələlər üzrə müavini Əfsanə Quliyeva, nə köməkçisi, nə də ərazi idarəetmə və yerli orqanlarla iş şöbəsinin müdiri Allahverdi Qaraşov iştirak edir. Ev, mənzil şəraitinin yaxşılaşdırılması üçün, köçkünlərlə «söhbəti» birbaşa başçının aqrar məsələlər üzrə müavini Rəfael Müstafayev aparır. O, Eyvaz Hüseynovun müavini olmaqla yanaşı, özünü «Qaçqınkom»un Xocavənd üzrə rəsmi nümaynədəsi kimi də aparır. Açıq şəkildə Xocavəndli köçkünlərin mənzil təminatı üçün pul yığırlar. Sözsüz ki, bu birbaşa hörmətli Əli Həsənovun nüfuzuna zərbədir. Amma, adıçəkilən şəxsləri komitə sədrinin nüfuzu və dövlətiun apardığı uğurlu işlər maraqlandırmır. İcra başçısının əsas düşüncəsi İqtisad Universitetində oxuyan oğlunun gələcək təminatıdır».

Məlumatda iddia olunur ki, Eyvaz Hüseynovla Rafael Mustafayev hətta Bakıda rəsmi qeydiyyatda olan bəzi şəxslərin, Ağcabədidə xocavəndli köçkün kimi çoxotaqlı mənzil almasına şərait də yaradıblar: «Halbuki, qanun və mövcud təlimatlar buna imkan vermir. Lakin belə bir faktlar da mövcuddur. Bakıda illər uzunu kirayə qalan məcburi köçkünlərə, belə imkan tanınmayıb. Eyni zamanda, icra başçısı ilə müavini mənzil bölgüsündə ailə tərkibinə də əhəmiyyət vermirlər».

Müsahiblərimiz bildirir ki, Eyvaz Hüseynovun əməlləri bununla da bitmir. Başçı və onun aqrar məsələlər üzrə müavini, rayona məxsus örüş sahələrini Bakıda yaşayan iş adaamlarına satıblar: «Onlar da torpağın təyinatını dəyişərək, əkin məqsədilə istifadə edirlər. Təbii ki, bu qanunsuzluqda keçmiş aqranom, hazırkı müavin Rafael Müstafayevin rolu az deyil. Düşünürük ki,

kənd təsərrüfatı naziri Heydər Əsədov, rayon üzrə yoxlama aparmaqla, bu vəziyyəti qaydaya qoya bilər. Çünki, bu barədə prezident İlham Əliyev son müşavirədə xəbərlarlıq etdi. Dövlət başçısı əkin və örüş sahələrinin ayrı-ayrı adamların istifadəsinə verildiyini deyərək, bunlardan səmərəli istifadə edilmədiyini də bildirdi. Bəli, bu, həqiqətdir. Özü də Xocavənd üzrə yoxlama başlayarsa, dəqiq bilinəcək ki, Eyvaz Hüseynov rayonun Beyləqan və Ağcabədi də yerləşən ərazilərini kimə və hansı əsaslarla peşkəş edib. Hətta icra başçısının qadın biznesmenlərdən birinə niyə torpaq sahəsi ayırması da maraqlı mövzudur. Elə siz də araşdırma aparıb, üzə çıxara bilərsiniz ki, ümumiyyətlə, bu ərazilər təiynatına uyğun istifadə olunurmu? Və yaxud Xocavənddə ötən il ayrılan subsidiyaların sənədləri şəffaf olubmu? Bu və ya digər məqamları nəzərə alaraq, əminliklə deyə bilərik ki, Eyvaz Hüseynovun fəaliyyəti yoxlanılsa, o, tutduğu vəzifəsindən azad olunmayacaq, həm də istintaqa cəlb ediləcək. Biz rayon sakinləri də bunu gözləyirik».

Yazıda qeyd olunan ittihamlarla bağlı rayon rəhbərliyin də mövqeyini dərc edə bilərik.

Yeri gəlmişkən, Eyvaz Hüseynov 23 ildir icra başçısı vəzifəsində işləyir. O, 02 iyul 1992-ci ildə Xocavənd rayon İcra Hakimiyyətinin başçısı təyin edilib.

Cəfər MƏRDANOĞLU