«Azərenerji» rəhbərinın korrupsiya pramidasının detalları açıqlandı

«Azərenerji» Açıq Səhmdar Cəmiyyətinin sədri Etibar Pirverdiyevin yaxın ətrafı vasitəsilə yol verdiyi milyardlıq korrupsiya sistemi ilə bağlı redaksiyamıza olduqca maraqlı məlumatlar verilib.

«Gündəm Xəbər»ə verilən məlumata görə, son vaxtlar adı ölkə mətbuatının gündəmindən düşməyən Etibar Pirverdiyev və onun yaxın ətrafının nələrə sahib olması haqda araşdırmalara başlanılıb: “Bu araşdırmaların nəyə hesablandığı dəqiq bilinməsə də, fakt budur ki, Etibar Pirverdiyev və onun yaxın ətrafının mülklərindən tutmuş, iş fəaliyyətlərinə qədər müəyyən dairələr araşdırmaya start veriblər. Deyə bilərəm ki, araşdırma ciddi aparılarsa, bu, Pirverdiyev və yaxın ətrafına sərt gələcək vəd edəcək. Elə təkcə bir neçə il əvvəl bayraq meydanının tikintisi zamanı, Etibar Pirverdiyev və yaxın qohumlarının yol verdikləri özbaşınalıqlar və mənimsəmələr araşdırılsa, məncə kimlərinsə həbsxanaya düşməsi qaçılmaz olacaq.

Sizə bir fakt deyim. Meydanın tikintisində faktiki işi icra edən əvvəlcə Azərenerji»nin tabeliyində olan «Azərenerjitikinti» MMC olub. Tikintiyə başladıqdan 5-6 ay sonra isə, Etibar Pirverdiyev «qeyri-adi ənənəvi iş metodu»na söykənərək, sözügedən MMC-ni ləğv edib, onun bazasında «Azenco» ASC-ni yaratdı. Tikinti işləri də ASC-nin sərəncamına verildi. Həmin vaxtı bu dəyişikliyin səbəbini ondan soruşan olmadı. Halbuki, o, bununla «Azərenerjitikinti» MMC-də məsul şəxs olan bacısının həyat yoldaşı Ramiz Güləliyev, həmçinin, təchizatın rəisi olan tələbə yoldaşı Əbülfət Kamilovun (hal-hazırda «Azenco»da idarə rəisidir) dövlət vəsaitlərini mənimsənilməsindən bəhs edən fırıldaqlarını bu yolla ört-basdır elədi. Hələ Pirverdiyevin müavini olan Marlen Əsgərovun kürəkəni, «Azenco»da idarə rəisi işləmiş Kamil Mirzəyevin Dövlət Bayrağı Meydanındakı tikintidə nə işlə məşğul olduğunu araşdırsanız, şoka düşərsiniz. Bu adam vəzifə öhdəliyini unudub, meydandakı qazıntı zamanı çıxan dəmir, mis və s. kimi metalları toplayıb, satmaqla məşğul idi. Hansı ki vaxtilə «Sumqayıt TS-2»nin söküntüsündə də eyni işləri görüb”.

«Azərenerji»nin saxta tender oyunları və ya Çinlə kimlərin əlaqəsi var?

Müsahibimiz Etibar Pirverdiyevin digər bir böyük oyunundan da söz açıb. Bildirib ki, Etibar Pirverdiyev tender keçirmədən, yalnız müqavilə ilə «Azərenerji»nin bütün layihələrini «Azenco»ya verir və bu məqsədlə də milyonlarla manatı ASC-nin hesabına köçürür: «Maraqlı məqamlardan biri də budur ki, həmin ASC də təmir-tikinti, həmçinin, enerji layihələrində istifadə olunan bütün mal-materiallar, həmçinin sayğaclar, Etibar Pirverdiyevin nəzarətində olan özəl firmalardan alınır. Sonradan isə, izi azdırmaq üçün Pirverdiyev yenə maraqlı üsullardan istifadə edir. O, ya həmin firmaların fəaliyyətinə xitam verdirir, ya da həmin firmalarla işləyən müəssisələri əmrlə ləğv edərək, onun bazasında başqa bir idarə yaradır. Bununla da korrupsiya izi dolanbaca salınaraq, ört-basdır edilməyə hesablanır. Elə bir neşə ay əvvəl “Azeco”da aparılan struktur islahatlarının əsl səbəblərini araşdırsalar, bunun mahiyyəti açılacaq. O zaman bilinəcək ki, Çindən gətitilən keyfiyyətsiz mallar neçəyə “Azərenerji”yə satılır və burada kimlər milyonlarla manat qazanc əldə edirlər. Digər maraqlı məqam isə, həmin malların başqa ölkənin markası ilə “Azərenerji”yə satılmasıdır. Düşünürəm ki, bu məsələ də diqqətdən qaçmamalıdır”.

Tələbə yoldaşının əli ilə qazanılan milyonlar…

Müsahibimiz deyir ki, Çindən alınan məhsulların bir qismi, xüsusilə SMARTkart tipli sayğaclar illərdir ki, Pirverdiyevin tələbə yoldaşı, hazırda «Azenço»da idarə rəisi vəzifəsində işləyən Əbülfət Kamilov tərəfindən ölkəmizə gətirilir: «Bu faktı ona görə xatırladım ki, Pirverdiyev tələbə yoldaşları və qohumlarını iri maliyyə dövriyyəsinə nəzarət etmək üçün vəzifə başına gətirmir, həm də özəl biznesini çiçəkləndirmək üçün onlardan yararlanır. Təsəvvür edin ki, Çindən gətirilən sayğacların hər biri «Azenço»ya dəyərindən 5-10 dəfə artıq «sırınır». Əgər bu gün Azərbaycanın Bakı istisna olmaqla, bütün rayonlarının sayğaclaşdırma işinin Əbülfət Kamilovun rəhbərlik etdiyi idarənin sərəncamında olduğunu, həmçinin, 5-6 milyon abonentin sayğacla təminini nəzərə alsaq, ortada artıq milyonların deyil, milyardların dövr etdiyini görmək çətin deyil”

Bu və ya digər məlumatları redaksiyamızla verən mənbə deyir ki, Etibar Pirverdiyevin Bakı və ətraf kəndlər də daxil olmaqla, Şimal zonasında sahib olduqları daşınar və daşınmaz əmlakların sayı-hesabı yoxdur. Biz isə mövzunu davam etdirəcəyimizi qeyd etməklə yanaşı, qarşı tərəfi də dinləməyə hazır olduğumuzu bildiririk.

Cəfər MƏRDANOĞLU