Ləğv olunmuş torpaq komitəsi Göyçay rayon şöbəsinin müdiri cənab Nofəl Fərzəliyev, vətəndaşın sahəsini qanunsuz yolla başqasına satıb, məhkəmə qərarına isə məhəl qoymur; prezidentin xitamını verdiyi qurumda yoxlamalar gedir

Göyçay rayonu, Cəyirli kənd sakini Feyzullayev Rahim “Gündəm-xəbər”in redaksiyasına şikayət məktubu ilə müraciət edib. Kənd sakini prezidentin sərəncamı ilə ləğv edilən torpaq komitəsinin yerli şöbəsindən şikayətçidir.

R.Feyzullayev müraciətində yazır: “14 nəfərlik ailəmizə Azərbaycan Respublikasının Dövlət Torpaq və Xəritəçəkmə Komitəsi, Göyçay rayon şöbəsinin müdiri Nofəl Fərzəliyev və Göyçay rayon İcra Qrupu birlikdə ziyan vurublar. Qəsdən hüquqlarımızı pozmaqla, hər iki qurum tərəfindən bizə küllü-miqdarda zərər də dəyib.

Belə ki, Göyçay rayon Aqrar İslahatlar Komissiyasının 28 avqust 1998-ci il tarixli 1 nömrəli qərarı ilə bizim ailəyə verilmiş 0,68 hektar torpaq sahəsini, Dövlət Torpaq və Xəritəçəkmə Komitəsinin Göyçay rayon Şöbəsinin müdiri Nofəl Fərzəliyev başqa şəxslərə qanunsuz yolla satıb.

Uzun müddətli məhkəmə çəkişmələrindən sonar, torpağımızın zəbt olunması təsdiq edildi və sahənin özümüzə qaytarılmasına dair, Şəki İnzibati-İqdisadi Məhkəməsi 25.11.2014-cü il tarixdə qərar çıxarıb”.

Vətəndaş bildirir ki, Şəki İnzibati-İqtisadi Məhkəməsinin 25.11.2014-cü il tarixli qərarının qanunu qüvvəsini almasına və icraya yönəldilməsinə baxmayaraq, Göyçay rayon İcra Qrupu məhkəmə qərarını heç bir vəhclə yerinə yetirmir.

“Çünki, Torpaq Şöbəsinin müdiri Nofəl Fərzəliyev məhkəmə qərarının icrasına icazə vermir. Bu da məhkəməyə tabe olmamaq, birbaşa özbaşınalıqdır. Bu adam o qədər harınlayıb ki, dövlət adından əhaliyə verilmiş pay torpağı sahələrini, qanunsuz olaraq başqa-başqa şəxslərə satır.

Nofəl Fərzəliyevin qanunsuz əməllərindən, çoxlu sayda rayon sakinləri əziyyət çəkirlər. Belə mübahisəli işlər məhkəmələrdə yüzlərlədir. Hətta, torpağımızı zəbt etmiş şəxs bizə çəkinmədən dedi ki, mən torpağı qaytarmayacam, çünki Nofəl Fərzəliyevə 100.000 manat pul verib bu torpağı almışam”.

Şikayətçi əlavə edir ki, ümid ölkə başçısına qalıb: “Bütün bunlara baxmayaraq onun barəsində qanunu tədbir görülmür ki, nəticədə də o, azğınlaşıb. Uzun illərdi ki, torpağımız zəbt olunub və buna görə də əkib-becərə bilmirik. Bizə bu yolla küllü miqdarda ziyan dəyir. Buna görə də yoxsulluq həddində yaşayırıq.

Sevindik ki, məhkəmə torpağımızın özümüzə qaytarılmasına dair qərar çıxarıb. Ancaq buna baxmayaraq məhkəmə qərarını Göyçay rayon İcra Qrupu icra etmir, daha doğrusu icra edə bilmir. Biz bu qanunsuzluq əməlləri barədə, ədliyyə naziri cənab Fikrət Məmmədova şikayətlər də göndərmişik.

Mən mətbuat vasitəsi ilə cənab prezidentimiz İlham Əliyevə müraciət edirəm. Cənab Prezident! Sizin dünən imzaladığınız Dövlət Torpaq və Xəritəçəkmə Komitəsinin ləğv edilməsinə dair sərəncamınıza ailəmiz çox sevindi. Atdığınız addım, yüzlərlə kasıbın haqqını yeyən Nofəl Fərzəliyevin bütün

fəaliyyətini obyektiv yoxlama imkan verir. Göyçayda torpaqlar qarış-qarış satılır. İnanırıq ki, bundan sonra bu istiqamətdə müsbət irliləyişlər olacaq.

Məhkəmə qərarını qanunsuz icra etməyən Göyçay rayon İcra Qrupu və Göyçay rayon sakinlərinin torpaqlarını saxtakarlıqla satıb mənimsəmiş, torpaq şöbəsinin müdiri Nofəl Fərzəliyev barəsində ciddi tədbirlər görməyinizi Sizdən çox-çox xahiş edirik”.

Qeyd edək ki, ləğv olunmuş komitənin rəhbəri cənab Qərib Məmmədova cinayət işi açıla bilər. Onun torpaq alqı-satqısında yol verdiyi nöqsanlar, qanunsuz torpaq satışı və digər əməlləri təftiş olunur.

Əldə etdiyimiz məlumatlara görə ölkə rəhbəri cənab İlham Əliyev, Dövlət Torpaq və Xəritəçəkmə Komitəsinin ləğv olunması haqqında fərman imzaladıqdan sonra, bu qurumda araşdırmalar başlanılıb. Bu araşdırmalar komitə rəhbərinin büdcə vəsaitlərini şəffaf xərcləmək və digər istiqamətlərdə aparılır.

Əgər aparılan araşdırmalar zamanı ciddi qanun pozuntularının aşkarlansa və birbaşa Q.Məmmədovun məsuliyyəti qiymətləndirilsə, onun barəsində cinayət işinin başlana biləcəyi ehtimal var. Üstəgəl, Azərbaycanın istənilən bölgəsində, torpaq şöbələrinin müdirlərinin alverlə məşğul olmaları danılmaz faktdır.

Ölkənin elə bir yeri yoxdur ki, orada torpaq şöbəsindən şikayət olunmasın. Göyçayda sadəcə min nümunədən biridir. Onu da deyək ki, hazırda Masallı, Astara, Tovuz-Qazax, Quba-Xaçmaz, habelə Şəki-Zaqatalada şıdırğı torpaq alveri gedir.

Vətəndaşların saysız-hesabsız şikayətləri yuxarı dairələrdə dosye şəklində toplanıb. Q.Məmmədovun və kadrlarının fəaliyyəti yenidən yoxlanılır. Ən çox korrupsiyaya bulaşmış qurumlardan olan bu komitənin ləğvi təqdir edilir. Təkliflər səslənir ki, struktur islahatları davam etdirilsin.

Onu da deyək ki, Dövlət Torpaq və Xəritəçmə Komitəsinin sədri ölkənin bütün bələdiyyələrindən, bələdiyyə mülkiyətində olan torpaqların xəritəsini və qeydiyyat sənədlərini vermək üçün rüşvət tələb edirdi.

İddia olunurdu ki, komitə ölkənin rayonlarında bələdiyyələrin mülkiyyətində olan torpaqlara rəsmi əmlak xəritəsi və qeydiyyat sənədi, həmçinin torpaqların qiymətlədirilməsi ilə bağlı normativ sənədlər vermədiyinə görə, vətəndaşların torpaq alması, satması, tikilən yeni evlərə pasport alınması və.s zamanı problemlər ortaya çıxırdı. Məhz, komitənin bələdiyyələrə əmlak xəritəsi verməməsi də, minlərlə vətəndaşı çətin vəziyyətə salırdı.

Ölkənin demək olar ki, əksər rayonlarında bələdiyyələrə əmlak xəritəsi verilməyib. Dövlət başçısı İlham Əliyevin bələdiyyə torpaqlarının sənədləşdirilməsi ilə bağlı rəsmi sərəncamı və göstərişləri var. Ancaq Qərib Məmmədovun rüşvət istəyi, dövlət başçısının verdiyi sərəncamın icrasını yubadırdı. Komitənin ləğvindən sonra, bu problemin də həllini tapacağı ümid edilir. O da gözlənilir ki, yoxlamalar zamanı, bəzi faktlara da toxunulacaq.

Xatırladaq ki, Hesablama Palatası Kollegiyasının növbəti iclası keçirilib. Palatanın mətbuat xidmətindən bildirilib ki, kollegiya iclasında dövlət büdcəsindən Dövlət Torpaq və Xəritəçəkmə Komitəsinə və tabeliyində olan qurumlara ayrılan vəsaitlərin istifadəsinə, həmçinin büdcədənkənar vəsaitlərin formalaşması və istifadəsinə dair, audit tədbirinin nəticələri barədə hesabat və rəy, müzakirə olunaraq müvafiq qərarlar qəbul edilib.