Rayon sakini Rahim Feyzullayevin 68 hektar torpaq sahəsi zəbt olunub, məhkəmə ərazinin başqasına qanunsuz satılması haqda qərar çıxarsa da, İcra Qrupu qətnaməni icra etmir

Göyçay rayonu sakini “Gündəm xəbər”ə müraciət edib. Rayonun Cəyirli kəndi sakini Rahim Feyzullayev tərəfindən daxil olan məktubda ölkə başçısından və ədliyyə nazirindən kömək istənilir. Məktub müəllifi yazır ki, mətbuatda Göyçay rayon İcra Qrupunun qanunsuzluğu ilə tanış olub:

“Biz də mətbuat vasitəsi ilə Ədliyyə Naziri cənab Fikrət Məmmədova müraciət etməyi qərara aldıq. Göyçay Rayon İcra Qrupunun səriştəsizliyindən, qanunsuzluğundan bizim ailə də əziyyət çəkir. Hətta bu barədə Göyçay rayon Regional Ədliyyə Şöbəsinə etdiyimiz şikayətlərə də baxılmır.

Çünki bunları qanunlara riayət etmək yox, ciblərini doldurmaq maraqlandırır. Nəticədə isə vətəndaşlar süründürməçiliyə məruz qalıb, əziyyət çəkirlər. Göyçay Rayon Aqrar İslahatlar Komissiyasının 28 avqust 1998-ci il tarixli 1 nömrəli qərarı ilə bizim ailəyə verilmiş 0,68 hektar torpaq sahəsi başqa şəxslərə qanunsuz olaraq satılıb. Uzun müddətli məhkəmə çəkişmələrindən sonra həmin torpağımızın zəbt olunması təsdiq edimiş, özümüzə qaytarılmasına dair Şəki İnzibati-İqdisadi Məhkəməsi 25.11.2014-cü il tarixdə qərar çıxarıb”.

R.Feyzullayev qeyd edir ki, Şəki İnzibati-İqtisadi Məhkəməsinin 25.11.2014-cü il tarixli qərarı qanunu qüvvəsini almasına və icraya verilməsinə baxmayaraq, Göyçay rayon İcra Qrupu məhkəmə qərarını qanunsuz olaraq icra etmir: “Çünki qarşı tərəfdən pul alıb. Məhkəmə qətnaməsini icra etmirlər. Sevindik ki, məhkəmə torpağımızın özümüzə qaytarılmasına dair qərar çıxarıb. Buna baxmayaraq, məhkəmə qərarını Göyçay Rayon İcra Qurupu icra etmək istəmir. Aldığı pulun üstündən icra etsə, qarşı tərəf də onu ifşa edə bilər.

Nəticədə də biz süründürməçiliyə məruz qalmışıq. Bu özbaşınalığı, süründürməçiliyi yaradan vəzifəli şəxslər qəsdən cinayət əməli törədirlər. Məhkəmə qərarını icra etməmək cinayət məsuliyyəti yaratsa da, bu vəzifəli şəxslər barəsində qanuni tədbirlər görən yoxdur.

Mətbuat vasitəsi ilə biz də Ədliyyə Naziri Fikrət Məmmədova müraciət edib xahiş edirik, Şəki İnzibati-İqtisadi Məhkəməsinin 25 noyabr 2014 -cü il tarixli qərarının icra edilməsini təmin edilməsinə tapşırıq verəsiniz və məhkəmə qərarını qanunsuz olaraq icra etməyən Göyçay Rayon İcra Qrupu barədə qanuni, ciddi tədbirlər görəsiniz”.