“Mən danışsam çoxlarının canı yanacaq”

Abdulla Abdullayev: “25 il əziyyət çəkmişəm, sonda da adımı dələduz qoyublar”

Dünən Bakı Ağır Cinayətlər Məhkəməsində “AMAY” ticarət mərkəzinin həbsdə olan rəhbəri Abdulla Abdullayev, Heydər Rzayev, Mehman Məmmədxanlı, Elşən Novruzov, Vidadi Qurbanov və Nadejda İlyasovanın barəsində olan cinayət işi üzrə məhkəmə prosesi davam etdirilib.

Abdulla Abdullayev və digər təqsdirləndirilən şəxslərin cinayət işi üzrə məhkəmə propsesi saat 11.00-a təyin olunsa da, məhkəmə prosesinin vaxtında başlanması baş tutmayıb. Hakim Əfqan Hacıyev bildirib ki, təqsirləndirilən şəxslərin vəkillərinin bəziləri məhkəmə iclasında iştirak etmirlər. Hakim qeyd edib ki, vəkillər saat 12.30-da məhkəmədə olacaqlarını bildiriblər və bu səbəbdən prosesdə fasilə elan olunub. Saat 12.30-da yenidən məhkəmə iclası başlasa da, yenə də vəkillər prosesdə iştirak etmirdilər. Hakim qeyd edib ki, prosesdə iştirak etməyən vəkillər – Yunis Vəliyev və Şöhlət Allahmanovdur. Hakim onu da bildirib ki, bu vəkillər təqsirləndirilən şəxslərin müdafiə etməsi üçün dövlət vəsaiti hesabına ayrılıb.

Abdulla Abdullayev dövlət vəsaiti hesabına ayrılan vəkillərdən imtina edilməsini təqsirləndirilən şəxslərə bildirib. Hakim yenə də məhkəmə iclasını günün ikinci yarısına qədər təxirə salıb.

Günün ikinci yarısında davam etdirilən prosesdə hakim məhkəmə iclasına vaxtında gəlməyən vəkillərə etirazını bildirib. Daha sonra

Abdulla Abdullayevin vəkili Osman Kazımov vəsatətlə çıxış edib. O, bildirib ki, məhkəmənin hazırlıq iclasında 4 vəsatətlə çıxış edib. Onun sözlərinə görə, Abdulla Abdullayevin barəsində olan cinayət işinə xitam verilməsi, barəsində seçilmiş həbs qətimkan tədbirinin dəyişdirilməsi barədə vəsatət verib.

Osman Kazımov bildirib ki, zərərçəkmişlərin sübutlar siyahısından çıxarılması, cinayət işində olan sənədlərin müdafiə tərəfinə təqdim edilməsi ilə bağlı vəsatətlər verilsə də, hakimlər həmin vəsatətlərin baxılmamış saxlanılması barədə qərar açıqlayıblar: “Amma hazırlıq iclasının qərarında həmin vəsatətlərin rədd edilməsi göstərilib. Biz həmin qərarda qeyd olunan faktlara etiraz edirik və bunun protokola qeyd edilməsini istəyirik. Belə olan halda “Kişi sözü” filimində bir epizodun günə düşürük. Orada müxbir gəlib müsahibə göstərir, sonra da deyir ki, baxın məni televizorda göstərəcəklər, onun yerinə heyvan göstərirlər. Məhkəmə zalında vəsatətlərin baxılmamış saxlanılması elan olunur. Amma hazırlıq iclasının qərarının təsviri hissəsində vəsatətlərimiz rədd edilməsi qeyd olunur. Ehtimal edirik ki, bu texniki səhvdir. Amma biz yenə də etirazımızı protokola qeyd olunmasını istəyirik”.

Osman Kazımov daha sonra deyib ki, Abdulla Abdullayevin məhkəmə zalında qeydlər etmək, vəsatət vermək üçün hazırlaşmaq imkanı yoxdur: “Bu səbəbdən Abdulla Abdullayevin dəmirbarmaqlıqlar arasından çıxarılması, onun müdafiəçiləri ilə yanaşı əyləşdirilməsini istəyirik. Həmçinin prosesin video çəkilişinin aparılması da vacibdir. Bu məhkəmə prosesin şəffaf aparılması üçün vacibdir”.

Abdulla Abdullayevin müdafiəçisi cinayət işində olan zərərçəkənlərin adlarının sübutlar siyahısından da çıxarılmasını istəyib. O, bildirib ki, Abdulla Abdullayevə mənzil tikintisi ilə bağlı ittihamın verilməsi düzgün deyil. Onun sözlərinə görə, cinayət işində olan sübutlar siyahisi müdafiə tərəfinə təqdim edilməyib: “Biz bununla bağlı əvvəlki prosesdə vəsatət vermişik. Amma əsassız olaraq bizim vəsatətimiz təmin olunmayıb. Amma qanunda birbaşa göstərilib ki, cinayət işində olan sübutlar siyahisi tərəflərə təqdim edilməlidir. Cinayət işində çoxsaylı sənədlər var, bu sənədlərin də çoxunun Abdulla Abdullayevlə əlaqəsi yoxdur. Bu sübutlarla, sənədlərlə tanış olmaq bizim hüququmuzdur. Amma həm ibtidai istintaq orqanı, həm də məhkəmə həmin hüququ əlimizdən alıb. Eyni zamanda burada kreditlərin verilməsi ilə bağlı ittihamlar da var. Bu ittihamlardan görünür ki, müqavilə əsasında tərəflərin arasında olan məsələdir. Belə olan halda müqavilə ilə bağlanmış məsələlər üzrə cinayət işi başlana bilməz. Lakin prokurorluq bununla bağlı qanunsuz olaraq cinayət işi başlayıb və korrupsiya idarəsində cinayət işini araşdırandan sonra materiallar məhkəməyə göndərilib. Qanunsuz olaraq iş hakim icraatına götürülüb. Amma bu məsələlər tərəflər arasında mülki qaydada həll olunan məsələdir. Bildirmək istəyirik ki, Abdulla Abdullayevə qarşı qanunsuz cinayət işi açılıb. Bu işdə məhkəmədə icraata götürülüb”.

Vəkil daha sonra qeyd edib ki, cinayət işi üzrə olan ittiham aktı düzgün tərtib edilməyib. Vəkilin sözlərinə görə, ittiham aktında bəzi ittihamlar fərziyələrlə göstərilib: “İttiham aktında 144 milyon manat istintaqa məlum olmayan mənbə tərəfindən əldə edilib və mənimsənilməsi göstərilib. Bundan başqa, Abdulla Abdullayevin

İran islam Respublikasında olan biznesi də istintaqa məlum olmadığı qeyd olunub. Belə olan halda cinayət işinə məhkəmədə baxılması mümkün deyil. İstintaq belə nəticəyə gəlib ki, guya Abdulla Abdullayev istintaqa məlum olmayan mənbədən əldə etdiyi vəsaiti “AMAY”-ın binasının tikintisinə sərf edib. O da qeyd edilib ki, bütün bu məlumatlarda ittiham aktında mövcud olmadığı göstərilir. Mövcud olmayan cinayət işinə məhkəmədə necə baxıla bilər? Biz istəyirik ki, istintaq orqanı mövcud olan cinayət işini, sübutları müdafiə tərəfinə təqdim etsin. Abdulla Abdullayev bu gün nədə ittiham olunduğunu başa düşmür. Bunun üçün də cinayət işində olan sübutlar Abdulla Abdullayevə təqdim olunmalıdır ki, nədə ittiham olunduğumuzu bilək”.

Prokuror Həbib Nağıyev bildirib ki, cinayət işi üzrə ittiham aktı qanunla nəzərdə tutulmuş qaydada tərtib edilib. Onun sözlərinə görə, ittiham aktının tərtib edilməsi zamanı qanundan kənara çıxılmayıb. Prokuror zərərçəkənlərin sübutlar siyahısından çıxarılması üçün əsas görməyib: “Zərərçəkənlərə ziyanın dəyib-dəyməməsi məhkəmə istintaqı zamanı müəyyən edilən məsələdir. Məhkəmədə zərərçəkənlər ifadə verməlidirlər və bundan sonra onlara ziyanın dəyib-dəyməməsi araşdırılmalıdır. Buna görə də cinayət işində olan zərərçəkənlərin məhkəmədə dindirilməsi vacibdir”.

Prokuror vəkilin hazırlıq iclasının qərarında vəsatətlərin rədd edilməsi ilə bağlı ittihamlarına belə cavab verib: “Hazırlıq iclasının qərarı Baş prokurorluğa daxil olsa da, həmin qərarın təsviri hissəsi ilə tanış ola bilməmişəm. Bu səbəbdən vəkilin qərarda nəyin düzgün, nəyin səhv yazılmasına münasibət

bildirmək istəmirəm. Bu məsələni məhkəmənin mülahizəsinə buraxıram”.

Prokuror daha sonra qeyd edib ki, cinayət işinin məhkəmə baxışına verilməməsi üçün əsaslı faktlar yoxdur. Onun sözlərinə görə, ittiham tərəfinin sübutları ittiham aktı çərçivəsində məhkəməyə təqdim olunub: “Həmin çərçivədə də işə məhkəmədə baxılacaq. əgər sübutlar təkzib olunarsa, təqsirləndirilən şəxs barəsində bəraət hökmü çıxarıla bilər. Əks halda isə ittiham hökmü çıxarılacaq”.

Yerində müşavirə keçirən hakim heyəti vəkilin vəsatətlərini baxılmamış saxlayıb. Hakim bildirib ki, müdafiəçinin qaldırdığı məsələlər hazırlıq iclasının qərarında şərh olunub. Hakim əlavə edib ki, prokurorluğun sübutları ittiham aktından ibarətdir, bu da müdafiə tərəfinə təqdim edilib: “Biz məsələyə belə münasibət bildiririk, kim necə başa düşür, öz işidir”.

Daha sonra çıxış edən Abdulla Abdullayev bildirib ki, bundan əvvəl bir neçə vəsatət versə də, məhkəmə həmin vəsatətləri təmin etməyib. Onun sözlərinə görə, vəsatətlərindən biri zərərçəkənlərlə arasında olan mənzil verilməsi ilə bağlı müqavilələrdir: “Tərəflə bağlanan müqavilə əsasında cinayət işinin başlanması mümkün deyil. Çünki tərəflə aramızda müqavilə əsasında öhdəlik olub. Həmin öhdəliklə bağlı işimiz aparılır. Bizim işimizi korrupsiyada qanunsuz aparıblar. Burada insan taleyindən söhbət gedir. Bir qədər əsəbiyəm, bu səbəbdən fikirlərimi cilovlaya bilmirəm. Bu gün bizim vəsatətlərimiz rədd edilir. Belə görünür ki, biz ədalətə nail ola bilməyəcəyik.

Hörmətli hakim! Burada oturanların bəzilərinə əvvəllər 11 il iş vermisiz. Onların ailəsini başsız qoyubsuz. Hər bir vətəndaşın hüququ var. Mənim də danışmaq hüququm var. Məni hər kəs tanıyır. Eyni zamanda yuxarıda oturanlar da tanıyır. Mən danışsam yaxşı olmayacaq. Hər kəsin canı yanacaq. Onda heç kim deməsin ki, Abdulla niyə danışdı”.

Abdulla Abdullayev daha sonra bildirib ki, hüquqlarının bərpa edilməsi üçün Avropa Məhkəməsinə də şikayət edəcək: “Mən öz hüquqlarımı bərpa edəcəm. Bu gün çox şey danışmıram. Çünki Azərbaycan dövlətçiliyinə hörmət edirəm. Sabah danışsam, deməyin ki, niyə danışdın. 25 il əziyyət çəkmişəm, sonda da adımı dələduz qoyublar. Tikintiləri 5 ildir təhvil verə bilmirəm. Buna imkan vermirlər. Korrupsiya idarəsi mülki qaydada olan işə əl qoyub”.

Hakim bildirib ki, Abdulla Abdullayevin səsləndirdiyi fikirlər məhkəmənin gedişində həll olunan məsələdir. Buna görə də onun səsləndirdiyi fikirlərə bağlı hər hansı qərar açıqlanmır.

Daha sonra prosesdə çıxış edən prokuror ittihamnaməni elan edib. İttihamlara münasibət bildirən Abdulla Abdullayev özünü təqsirli bilməyib. O, ittihamların saxta olduğunu qeyd edib. Digər təqsirləndirilənlər Heydər Rzayev, Mehman Məmmədxanlı, Elşən Novruzov, Vidadi Qurbanov və Nadejda İlyasova da ittiham üzrə özlərini təqsirli bilməyiblər.

Qeyd edək ki, Abdulla Abdullayev və digərləri Cinayət Məcəlləsinin 179.3.2 (mənimsəmə və ya israf etmə) və 308.2-ci (vəzifə səlahiyyətlərindən sui-istifadə) maddələri ilə

təqsirləndirilir. Təqsirləndirilən şəxslərdən yalnız Abdulla Abdullayev barəsində həbs qətimkan tədbiri seçilib, digər şəxslər isə zamindədirlər.

Onu da qeyd edək ki, yanvarın 29-da keçirilən iclas zamanı hakim Əfqan Hacıyev deyib ki, hazırda təqsirləndirilənlərdən Elşən Novruzov barəsində olan başqa bir cinayət işinə onların iştirakı ilə baxılır və o iş də bu cinayət işi ilə əlaqəlidir. Ə. Hacıyev bu səbəbdən hakim heyətinin özlərinin özlərinə etiraz verdiklərini açıqlayıb.

Etiraz baxılması üçün Bakı Apellyasiya Məhkəməsinə göndərilib. Həmin etiraza Bakı Apellyasiya Məhkəməsində baxılıb və təmin edilməyib. İş yenidən hakim Əfqan Hacıyevin icraatına qaytarılıb.