Bakı Baş Təhsil İdarəsinin hər ay məktəblərdən müxtəlif ad və əməliyyatlarla bir neçə milyon pul topladığına dair faktlar var

«Varlı ailənin dəcəl» uşaqlarının qafasına uyğun olmayan idarəçilik məktəb direktorlarını kütləvi istefaya sürükləyir

Bakı Baş Təhsil İdarəsinin yarıtmaz və təlim-tədris prosesinə səriştəsiz yanaşması paytaxtın təhsil müəssisələrindəki vəziyyəti daha da ağırlaşdırıb. Artıq elə bir vəziyyət yaranıb ki, Bakı təhsili keçmiş kolxozçuların dili ilə desək, zootexnik səviyyəsində idarə olunur. Elə bunun nəticəsidir ki, Bakı məktəblərinin böyük əksəriyyətində tədrisin keyfiyyəti kəskin aşağı düşüb, təlim-tərbiyə sıfır vəziyyətdədir. Müəllim-şagird, müəllim-direktor, direktor-idarə münasibətlərindən isə danışmağa dəyməz. Bütün bunların kökündə isə Bakı Baş Təhsil İdarəsi və onun rəhbərliyi dayanır. Onlar məktəb direktorlarını tam səlahiyyətsizləşdiriblər.

Bu barədə «Gündəm Xəbər»i məlumatlandıran Təhsil Nazirliyinin adının çəkilməsini istəməyən əməkdaşlarından biri deyib ki, Bakı Təhsil İdarəsinin rəhbərliyi məktəblərə «zootexnik» və ya «aqronom» düşüncəsi ilə yanaşırlar:

«Mikayıl Cabbarov bu idarənin əsas vəzifələrinə təcrübəsiz, metodik və fundamental təhsil və müəllim-şagird münasibətlərindən anlayışsız, ancaq «varlı ailənin dəcəl» uşaqlarını təyin eləyib. Təbii ki, belə bir adamlar illərin peşəkar müəllim və direktorları ilə münasibətləri tənzimləmək, məktəblərdə mütərəqqi inkişafı təmin etmək, şagirdlərin bilik səviyyəsinin yüksəldilməsi üçün yeniliklər gətirmək qabiliyyətində deyillər. Bunu etmək gücü və qafasında olmayan Bakı Baş Təhsil İdarəsinin rəhbər şəxsləri, tam əksinə, keçmiş rəhbərliyin müəyyən qədər stabil saxladığı sistemi də məhv ediblər. Nəticə etibarı ilə, paytaxt Bakının təhsil sistemi tamamilə uçuruma yuvarlanıb».

Müsahibimiz deyir ki, hazırda paytaxt məktəblərində korrupsiya və rüşvət halları da mərkəzləşdirilib: «İndi məktəblərdə bəzi fənlər üzrə müəllimlərin ştatı, maaşı olduğu kimi saxlanılsa da, ancaq həmin fənni tədris edən müəllimləri sinif otaqlarında görmək mümkün deyil. Bakı Baş Təhsil İdarəsindən Bakı məktəblərinə laqeydsizlik, hər şeyi pulun gözü ilə görmək «xəstəliyi» səbəbindən əvvəllər məktəblərdə olan növbətçi müəllimlər də yoxa çıxarılıb. Daha dəqiqi, onların da maaşları mənimsənilir, amma özlərini məktəbdə görmək hər şagirdə nəsib deyil. Təbii ki, bu, təkcə təhsilin keyfiyyətinə təsir etmir, həm də uşaqların dərsdən yayınma hallarını kəskin artırır. Belə ki, şagirdlər dərs saatları sərbəst qaldıqlarından məktəbi özbaşına tərk edib, tərbiyələrinə mənfi təsir göstərən internet klublara ayaq açırlar. Məhz bunlara görə də məktəblərdə tez-tez əxlaqsız hallara, hətta qətl və intihar hallarına rast gəlmək olur. Səlahiyyətsiz duruma salınan direktorlar da buna qarşı tədbir görməkdə acizdirlər. Belə ki, direktorun bir az sərt davranışı və ya tələbi idarə rəhbərliyinin qəzəbinə səbəb olur, nəticədə direktorlar postlarını itirmək təhlükəsi ilə üz-üzə qalırlar. Pisi budur ki, direktorları Əmək Məcəlləsinin ən ağır maddəsi ilə cəzalandıracaqları ilə hədələyirlər. Bu isə onların məktəbdə nizamlı idarəçiliyi təmin etmək həvəsi və istəklərini də əngəlləyir».

Müsahibimiz müəllimlərin də ağır şərtlər altında işlədiklərini etiraf edib:

«Razıyam ki, ayrı-ayrı adamların Təhsil Nazirliyinə və ya Bakı Baş Təhsil İdarəsi ilə «gizli anlaşmaları» nəticəsində məktəblərə dərslik adı ilə müxtəlif test kitablarının sürətlə ayaq açmasına səbəb olur. Bu məktəbli çantasının nəzərdə tutulduğundan ağır olması ilə yanaşı, şagirdlərin həddən artıq yüklənməsinə səbəb olmaqla, onların dərsləri qavrama prosesinə mənfi təsir göstərir. Eyni zamanda, ağır vəziyyətdə çalışan müəllimləri də hərtərəfli çətin vəziyyətə qoyur. Onların şagirdlərlə aralarının açılması isə nizam-intizama həddən artıq pis təsir göstərir. Bəli, məktəblərdə dərs rejimi çox aşağı səviyyədədir. Maaşların azlığı, düzgün idarəçiliyin olmaması və sair hallar müəllimlərin də dərsə laqeyd yanaşması ilə müşaiyət olunur. Bundan əlavə, repititorluq edən müəllimlər zəif nəzarətdən istifadə edərək, şagirdləri özlərinə cəlb edirlər ki, pul qazansınlar. Hazırlığın bir ayının qiyməti 5 fənndən azı 500 manatdır. Bu isə hər ailənin ödəyəcəyi vəsait olmadığından Azərbaycan təhsilinin son illər daha ciddi uçurumda olduğunu söyləmək olar».

Ölkədə savadsızlaşmanın sürətlə vüsət aldığını deyən müsahibimizin sözlərinə görə, valideynlərin böyük əksəriyyəti məktəblərdə dərs keçirilməməsini, 9-cu sinifdən sonra şagirdlərin özbaşına buraxılması hallarına görə övladlarını tədrisdən tam ayırmaq məcburiyyətində qalırlar:

«Bakı Baş Təhsil İdarəsinin yenilənən rəhbərliyinin nəzarətsizliyi və korupsiyaya həddən artıq meylliyi belə vəziyyət yaradıb. Çünki belə vəziyyətə görə yuxarı siniflərin hər bir müəllimindən “aylıq hesab” yığılır. Bunu isə Bakı məktəblərinin ümumi sayına vurduqda isə ay ərzində çox böyük pulların toplandığını mübaliğəsiz demək olar».

Müsahibimiz onu da deyir ki, Bakı Baş Təhsil İdarəsinin belə fəaliyyətindən həddən artıq narazı qalan və özünə hörmət edən məktəb direktorlarının əksəriyyəti üsyan həddinə yetişiblər: «Direktorlar idarə rəhbərliyinin onlara zootoexnik və ya aqranom kimi yanaşmasını qəbul eləyə bilmirlər. Bu sahədə təcrübəsiz adamların məktəb direktorlarının bəziləri ərizə yazaraq işdən getmək niyyətlərini də gizlətmirlər. Sizə onu da deyim ki, bir müddət əvvəl əsassız bir əmrlə Bakı məktəblərində təhsil səviyyəsini yuxarı qaldıran 40 Qərbi Azərbaycan kökənli direktorların işdən azad olunmaları da, yeni rəhbərliyin hansı xislət və niyyətdə olduğunu təsdiqləyən önəmli faktorlardan biridir».

Bakı təhsilində korrupsiyanın tüğyan etdiyini də bildirən müsahibimizin sözlərinə görə, elə bir neçə il əvvəl Respublika Baş Prokurorluğunun Bakı şəhər Təhsil İdarəsinin Binəqədi-Nəsimi xidmət bölməsinin bir qrup maddi-məsul şəxslərinin cinayət əməllərinin ifşa edilməsi haqqında məlumatı da deyilənləri təsdiqləyə bilər:

«Həmin vaxtı Baş Prokurorluğun mətbuat xidmətindən verilən məlumata görə, Bakı şəhər sakinlərinin Bakı şəhər Təhsil İdarəsinin əməkdaşlarının dövlət əmlakını mənimsəmələri barədə müraciətləri Baş prokuror yanında Korrupsiyaya qarşı Mübarizə İdarəsində araşdırılıb. Araşdırma zamanı müəyyən edilib ki, Bakı şəhər Təhsil İdarəsinin Binəqədi-Nəsimi xidmət bölməsinin bir qrup maddi-məsul şəxsləri qabaqcadan razılaşmaqla, orta məktəblərdə işləyən müəllim və texniki işçilərin faktiki əmək haqqı məbləğlərinin şişirdilməsi yolu ilə, habelə, həmin təhsil müəssisələrində işləməyən ayrı-ayrı şəxslərin adlarını orta məktəb işçilərinin ümumi siyahısına əlavə etməklə hesablanmış əmək haqlarını onların adlarına alınmış ödəniş kartları vasitəsilə müxtəlif banklara məxsus bankomatlardan ümumilikdə 695.0 min manat çıxarmaqla külli miqdarda dövlət vəsaitini mənimsəyiblər. Elə bu fakt yuxarıda deyilənləri təsdiqləyir. Əminliklə deyə bilərəm ki, bu hal indi daha rüsvayçı vəziyyətdə davam etdirilir. Yəni hər ay bəlkə də bir neçə milyon elə saxta əmək haqqı adı ilə mənimsənilir».

Cəfər