İmişli sakinindən deputata sərt sözlər:
“Atası yaşında kişiyəm, heç olmasa ayıbına kor olub yerində otursun”

İmişli rayon sakini Dəmirov Sahib Xasay oğlu dövlət başçısı və ayrı-ayrı dövlət qurumlarına göndərdiyi məktubun surətini redaksiyamıza da göndərib. 2010-cu il Kür daşqınları zamanı ziyan çəkmiş vətəndaş deputat Çingiz Qənizadənin laqeyd münasibətindən və onlara dəymiş ziyanın ödənilməməsindən şikayətçidir. Məktubun bir hissəsini diqqətinizə çatdırırıq:
“Sel və qrunt sularının təsirindən uçmuş və hələdə tikilməmiş evim barədə kiloqramlarla məktublar yazmışam. Amma problemlərim həll olunmayıb. Ona görə də 13-16 mart 2012-ci il tarixdə bu yaşımda YAP üzvü olaraq aclıq aksiyası keçirdim. Məni ağrıdan Milli Məclisin üzvü deyilən Cingiz Qənizadənin 3 nəfərlə həyətimə gəlib keçmiş başçı Ə.Ağayevi müdafiə etmək üçün özü yazdırdığı sənədə qol çəkdirməsi və məni qoca vaxtımda şantaj etdirməsi oldu. Mən ondan soruşmaq istəyirəm, sən mənim millət vəkilim deyilsən, sənə nə düşübdür ki, mənim qapıma gəlmişdin, xanım deputat, millət vəkili Qənirə Paşayeva İmişlilərin millət vəkili deyil, amma hamıya kömək edib. Çingiz Qənizadənin mənim həyətimə gəlişindən sonra, məni axtaran olmadı. O, mənə kömək etmək əvəzinə Ə.Ağayevə kömək etdi. Çünki, Ə.Ağayev varlılara ev tikdirmişdi. Həm də Çingiz Qənizadə izah etmişdir ki, İmişli ərazisindən Kür-Araz keçmir. Amma O, yalan deyirdi. Qoca vaxtımda Cingiz Qənizadə məni evdən məhrum etdirdi.
01 fevral 2013-cü il yenidən İmişli RİH başçısının qəbuluna getdim. Məni Mirzə adlı şöbə müdiri qəbul etdi. Məhkəmə hakiminin və FHN-nin nümayəndəsi V.Hacıyevin dediklərini ona dedim. Yanında mer Nəsirovda var idi. Mirzə mənə dedi ki, Kamaləddin Heydərov deyir ki, İmişlidə sel olmayıb, prezidentdə bu işi bağlayıb. Daha sizlərə ev tikilməyəcək. Gedin oturun yerinizdə , bir də şikayət etməyin. Həm də mətbutda oxudum ki, Çingiz Qənizadə dedyirmiş ki, İmişlidə mitinq olmayıb. O, yenədə yalan deyir. Mitinqdə əsasən seldən zərərçəkən qadınlar, yaşlı insanlar, müharibə veteranları, şəhid ailələri olub. Bu Ç.Qənizadə keçmiş cəbhəçi , gələnə qardaş, gedənə yoldaş olub. O, keçmiş başçı Ə.Ağayevi də müdafiə edirdi. Ə.Ağayev çıxarılannan sonra onu tənqid etməyə başladı. O, belə yol tutub, atası yaşında kişiyəm, heç olmasa ayıbına kor olub yerində otursun.
Çingiz Qənizadə deyirmiş ki, Saşanın (mənə futbol baletşiki kimi Saşa deyirlər.)həyətində daş ev var. Bəli 2 oğlumun yarımçıq tikdirdiyi daş evdə müvəqqəti yaşayıram. Uçuq evimin divarları hələdə yerində durur, onun kərpiclərindən damxa tiksəmdə yaşayış üçün yarasızdır. Oğlanlarımın evi də yaşayış üçün normal deyil . Sizin sayənizdə İmişlidə çox insanlara 900-nəfər ailəyə ev tikilib, məndən də pul istəmişdilər, vermədim deyə mənə tikilmədi.
Odur ki, Sizdən növbəti dəfə yaşlı insan kimi xahiş edirəm, uçan evimin tilkilməsi barədə aidiyyatı orqanlara göstəriş verəsiniz. Axı mən Sizin YAP üzvü olaraq, dayağınızam. Mənə dayaq durmaq əvəzinə deputat Ç.Qənizadə arxamdan vurdu və mənə ev tikilmədi. Evlərin tikilməsinə isə 19 may 2010-cu il Siz prezidentimiz Sərəncam vermişdiniz. Və o Sərəncamın həm ağsaqqalığıma görə, həm yaşıma görə , həm də Ç.Qənizadələrdən qorunmaq üçün uçmuş eviminin tikilməsi mənə aid olmalı idi. Mən məcburam yenə aclıq aksiyasına başlayam. Ç.Qənizadə bizləri məcbur edir ki, haqqınızı belə istəyin. Onun məntiqi belə deyir.”