İmişli aksiyası ilə bağlı Vilyam Hacıyev
və Çingiz Qənizadə rəzaləti- FOTO FAKT...

Çərşənbə günü səhər saatlarında İmişli rayonunun yüzlərlə sakini rayonun Heydər Əliyev prospektində “Çobanlar Evi”-nin qarşısına toplaşaraq nəqliyyatın hərəkətini bağlayıblar. Onlar sosial problemlərin həlli tələbi ilə bağlı aksiya keçiriblər. Azadliqnews.tv- ın hadisə yerində olan əməkdaşının verdiyi məlumata görə aksiya iştirakçıları arasında bir neçə ay öncə prezidentin bölgəyə səfəri ərəfəsində rayonda aparılan tikinti və abadlıq işləri zamanı iş görüb pulunu ala bilməyən sahibkarlar, 2010-cu ilin Kür Araz daşqınları zamanı zərər çəkənlər, həmçinin digər sosial, kommunal problemlərin həllini tələb edən sakinlər olub.
Analoji problemləri olan və məmurların özbaşınalığından, dövlət orqanlarının korrupsiyasından əziyyət çəkən başqa vətəndaşlar da onlara qoşulub. Yarım saatdan artıq davam edən aksiya zamanı çəkilən video və fotogörüntülər internet saytlarında yayımlanıb. Polisin müdaxiləsindən və İmişli RİH başçısı Vilyam Hacıyevin aksiya iştirakçıları ilə görüşüb müəyyən vədlər verməsindən sonra aksiyaçılar sakitləşib. Aksiya ilə bağlı diqqət çəkən məqamlardan biri İmişli-Beyləqan zonasından deputat olan Çingiz Qənizadənin və İmişli RİH başçısı Vilyam Hacıyevin aksiyanın keçirilməsi ilə bağlı verdiyi təkzib reaksiyaları olub;

"İmişli rayonunda heç bir aksiya olmayıb. Bu tamamilə yalan məlumatdır. Sadəcə üç şikayətçi qadın evinin qəzalı olması ilə bağlı rayon icra hakimiyyətində olublar. Onların şikayəti əsassızdır. Bundan sonra həmin qadınlar küçəyə çıxıb qışqırıblar. Başqa heç nə olmayıb. Nə aksiya olub, nə də saxlanılan var. Saytlarda yayılan şəkillər də köhnədir və İmişlidə belə inzibati bina yoxdur”.
Bu sözləri musavat.com-a açıqlamasında İmişli-Beyləqan zonasından deputat olan Çingiz Qənizadə bildirib. Onun sözlərinə görə, İmişlidə əhalinin mərkəzi yolu bağlayıb mitinq keçirməsi barədə yayılan xəbərlər yanlışdır. İmişli rayon icra hakimiyyətinin başçısı Vilyam Hacıyev də rayonda etiraz aksiyasının başlaması ilə bağlı mediada və sosial şəbəkələrdə yayılan məlumatlara münasibət bildirib.
İcra başçısı “Qafqazinfo”ya açıqlamasında bildirib ki, saytlarda aksiyanı əks etdirdiyi deyilən fotolar və oradakı bina ümumiyyətlə İmişli rayonunda yoxdur: “İndiyə qədər rayonda o qədər insan bir yerə yığışmayıb. Mən hər həftə kəndlərdə görüşlər keçirirəm. Rayonda o cür hadisə baş verməyib”.

Hadisə yerində olan Azadliqnews.tv- nin əməkdaşı və digər yerli mənbələr aksiyanın keçirildiyini və aksiya ilə bağlı çəkilən video və foto görüntülərin həmin aksiyadan çəkildiyini və həmin süjetlərdə əks olunan binanın həqiqətən İmişlidə olduğunu bildiriblər. İmişlidə fəaliyyət göstərən müstəqil jurnalist Azər Əli isə aksiyanın keçirildiyi ərazinin və sözü gedən binanın şəkilini çəkərək redaksiyamıza göndərib. Bu şəkil bir daha İmişlidə bu günkü aksiyanın rayondakı “Çobanlar evi”- nin qarşısında keçirildiyini təsdiq edir. İcra başçısı Vilyam Hacıyev və deputat Çingiz Qənizadə görəsən bu fotofakta nə deyəcək? Əslində onların bu cənfaşanlığı son günlər ölkədə genişlənən xalq etirazlarının qarşısını almaq və hər şeyin çox normal olduğu görüntüsünü yaratmağa xidmət edir. Amma onların dediklərinə heç özləri də inanmır, nəinki başqaları...