Efirdə söyüş söymək olarmı?

Efirdə söyüş söydüyü ehtimal olunan millət vəkilini gənclər üzr istəməyə çağırıb və ona qarşı kampaniya başlayacaqları ilə hədələyərək deputata üç gün vaxt verdiklərini deyiblər.
Ekspertlər isə efirdə təhqiramiz ifadə işlədildiyinə görə, televiziyaya da xəbərdarlıq edilmə ehtimalını irəli sürür. “TV və radio yayımı barədə qanunundan irəli gələn tələblərə uyğun olaraq, Milli Televiziya və Radio Şurası yayımçıya xəbərdarlıq və tövsiyyə verə bilər”, Media Hüquq İnstitutunun rəhbəri Rəşid Hacılı BBC Azərbaycancaya deyir. Onun fikrincə, efirdə təhqiramiz sözlərin işlədilməsi medianın etik qaydalarını da pozur.
“Televiziya və radio yayımı haqqında” Qanunun 32-ci maddəsində deyilir ki, insanların şərəf və ləyaqətinin alçaldılmasına, işgüzar nüfuzunun ləkələnməsinə yol verilməməli, şəxslərin Azərbaycan Respublikasının Konstitusiyası ilə müəyyənləşdirilmiş hüquq və azadlıqlarına hörmətlə yanaşılmalıdır.
Facebook sosial şəbəkəsində yazılıb ki, deputatın üzr istəməyə çağırma kampaniyasını aparmaq təklifini keçmiş deputatlığa namizəd və fəal Bəxtiyar Hacıyev verib.“Üç günün tamamında üzr istəməsə, onun telefon nömrələrini yayıb, 1 sözlük ("Özünsən") SMS kampaniyasına başlayacağıq”, Facebook sosial şəbəkəsində kampaniya başladılması haqqında statusunda Həbib Müntəzir yazıb.
Bir neçə həftə öncə, AzTV-nin “Günün nəbzi” verilişində söyüş işlədilməsi barədə video yayıldıqdan sonra həmin sözlərin sahibinin kim olması barədə spekulyasiyalar yayıldı. Həmin verilişdə deputatlar Hadi Rəcəbli, Mübariz Qurbanlı və Ziyad Səmədzadə, eləcə də Azərbaycan Tələbə Gənclər Təşkilatları İttifaqlarının sədri Şahin İsmayılov iştirak edib.
Ötən həftə isə İsmayıllıdakı iğtişaşlar zamanı ora gedən deputat Mübariz Qurbanlı və “Günün nəbzi” proqramının aparıçısı İbrahim Məmmədovla söhbət zamanı Qurbanlı, “mikrofonları söndür, Hadı müəllim söyüş söyəndir”, deyib.
“Orada söyüş olub. Bu söz də cəm halında deyil, tək halda ifadə olunub. Söyüşün də ünvanı erməni gənci olub. Ermənidən üzr istəyərlər?”, moderator.az saytının yazdığına görə bu sözləri verilişdə iştirak etmiş deputatlardan biri Hadı Rəcəbli bildirib.