Korrupsiya yol verən və barəsində çoxsaylı şikayətlər yayılan rayon rəhbərləri haqda tədbirlər görüləcək; 10-a yaxın icra başçısının vəzifədən alınacağı gözlənilir

Prezident İlham Əliyevin son müşavirədə icra başçıları haqqında səsləndirdiyi ifadələrdən sonra Prezident Administrasiyası tərəfindən rayon icra hakimiyyətlərinə konkret tapşırıqlar verilib.

Bu barədə «Gündəm Xəbər»i məlumatlandıran mənbənin sözlərinə görə, həmin müşavirədən sonra kənd təsərrüfatı naziri Heydər Əsədovun rayonlarda sübsidiyaların verilməsi prosesinə nəzarəti artırmasının ardınca, Prezident Administrasiyasından qəfil gələn sərt xəbərdarlıq icra başçılarının «yuxusuna haram» qatıb:

«Xatırlayırsınızsa, Prezident İlham Əliyev son müşavirədə bir çox sahələr üzrə çıxış edərək, çatışmayan hallardan danışdı. Həmin çıxışdan sonra hər bir sahə üzrə rəhbər şəxslər fəaliyyətə keçiblər. Prezident Administrasiyasının müvafiq şöbələri isə prezident İlham Əliyevin “Bəzi hallarda yekəxanalıq müşahidə olunur, bəzi hallarda məmurlar özlərini çox təkəbbürlü aparırlar. Buna yol vermək olmaz. Siyasi mədəniyyət olmalıdır və insanlara hörmətlə yanaşmaq lazımdır. Deyə bilərəm ki, əksər hallarda biz müsbət mənzərə görürük. Ancaq mənfi mənzərə ilə üzləşəndə tədbir də görülür, məmurlar cəzalandırılır. Etimadı doğrultmayan məmurlar bundan sonra da cəzalandırılacaqlar. Hər dəfə icra başçılarını işə təyin edərkən mən onlara öz sözlərimi deyirəm: Gedin təmiz işləyin, xalqla bir yerdə olun, rüşvətxorluqla məşğul olmayın, dövlətə, müstəqilliyə sadiq olun. Budur mənim tələblərim, əsas tələblərim. Hər yerdə belə olmalıdır», - sözlərindən sonra hərəkətə keçiblər. Onlar prezidentin bu xəbərdarlığının sözdə deyil, əməldə olduğunu rayon rəhbərlərinin diqqətinə çatdırmaqla yanaşı, həm də konkret addımlar atıblar. Bildiyimə görə, əsasən fəaliyyətləri haqda çoxsaylı şikayətlər edilən icra başçılarına verilən tapşırıq isə çox sərt olub. Onların diqqətinə çatdırılıb ki, vətəndaşların fərdi şikayətləri ilə bağlı təxirəsalınmaz tədbirlər görülsün. Həmin şikayətçi vətəndaşların birbaşa qəbula dəvət edilərək, problemləri öyrənilməklə, həlli istiqamətində ciddi tədbirlərin görülməsi təmin olunsun. Eyni zamanda, artıq Prezident Administrasiyasının bölgələr üzrə

kuratorlarına da tapşırıq verilib. Onlara rayonlarla əlaqələrini daha da intensivləşdirməyin vacibliyi xatırladılıb. Elə bu səbəbdəndir ki, kuratorlar tez-tez rayonlara səfər edir, yerlərdəki vəziyyəti şəxsən araşdırmağa başlayıblar. Belə vəziyyət isə barələrində tez-tez şikayətlər edilən icra başçıları və idarə müdirləri üçün müsbət sonluq vəd eləmir».

Bizi məlumatlandıran informasiyalı şəxs deyir ki, hazırda barəsində çoxsaylı şikayətlər yayılan Masallı, Lerik, Qazax, Tovuz, Ağcabədi, Hacıqabul, Sabirabad, İmişli və digər bir neçə rayonun icra başçılarının vəziyyətləri ürəkaçan deyil:

«Adıçəkilən rayon icra başçılarının bəzilərinin çoxsaylı mənimsəmə hallarına yol vermələrindən tutmuş, kənd təsərrüfatı istehsalçılarına ayrılan yardımların mənimsənilməsinə «göz yummaları»da diqqətdən yayınmayıb. İş o yerə çatıb ki, torpaq islahatı zamanı pay torpağı ilə təmin edilməyən ayrı-ayrı şəxslərin adına da subsiydiya yardımı yazılıb. Bundan əlavə, icra başçılarının kəndlər üzrə icra nümayəndələri və bələdiyyə sədrlərinin öz yaxın qohum-əqrəbalarının adına dövlət büdcəsindən hər hektar üçün ayrılmış 40 manat məbləğindəki subsidiyanı necə talan etmələri, hakim dairələrdə də heyrət doğurur. Şübhəsiz ki, bu məsələ haqda yayılan xəbərlər də Prezident Administrasiyasını ciddi narahat edir».

Məlumatlı şəxsin sözlərinə görə, bütün bunlarla yanaşı, Prezident Administrasyiasından Hesablama Palatasına da rayon İcra Hakimiyyətlərində Dövlət büdcəsinin investisiya xərclərinin ciddi auditi tapşırığı verilib: «Diqqət edirsinizsə, həmin müşavirədən sonra Hesablama Palatası iki dəfə iclas keçirib, müavfiqbüdcə təşkkilatları və icra hakimiyyətlərinə ayrılan vəsaitlərin təftişini gücləndirib. Bunlar təsadüfi deyil. Əmin ola bilərsiniz ki, bu proses xeyli icra başçısının karyerasını bitirəcək» ».

Cəfər