“Sovetski”də söküntünün dayanmasının müdhiş sirri…

Manatın devalvasiyası və 180 milyon kompensasiyanın müəmmalı sərfi suallar doğurub

Bakının “Sovetski” məhəlləsi adlanan yaşayış massivində söküntü işlərinə ara verilib. “Gündəm xəbər” əməkdaşının verdiyi xəbərə görə, evlərin sökülməsində fasilənin yaranması mövsümi xarakter daşıyır.

Hava şəraitinə uyğun olaraq plana düşən evlərin söküntüsü aparılmır. Digər bir səbəb isə manatın ucuzlaşması ilə əlaqədar daşınmaz əmlak bazarında vəziyyətin dəyişəcəyi ehtimalıdır.

Müxbirimizə deyilənə görə, baş nazirin müavini Abid Şərifovun ilk gündən bəyan etdiyi qayda tətbiq olunmaqdadır. Sakinlərin heç birinə evindən köçmək barədə məcburiyyət yoxdur.

Mülkünə görə kompensasiya almaq istəyən müraciət edir və evindən çıxır. Hazırda planda Bəşir Səfəroğlu, Vidadi, Mirzağa Əliyev, Murtuza Muxtarov, Abdulla Şaiq və Zərgərpalan küçələri var.

Yasamal Rayon İcra Hakimiyyəti bildirir ki, Bakı merinin 12 dekabr 2013-cü il tarixli sərəncamına əsasən söküntü ərazisinə düşən 10 min 500-dək yaşayış və qeyri-yaşayış sahəsi söküləcək.

Sərəncamda Bakı şəhərinin Baş Planının icrası və yol infrastrukturunun təkmilləşdirilməsini təmin etmək nəzərdə tutulub. Məlumatda bu günə qədər 2300 ailənin köçürüldüyü və 2280 evin söküldüyü bildirilir.

“Sovetski" hazırda xarabalığı xatırladır. Söküntü nəticəsində su və kanalizasiya xətləri yararsız vəziyyətə düşüb. Ərazidə üfunətdən və çirkabdan hərəkət etmək mümkünsüz hala gəlib.

Yerli icra hakimiyyətinin söküntü gedən sahədən zibil qutularını götürməsi sökülmüş evlərin yerini zibilliyə çevirib. Burada sahibsiz heyvanlar üçün əlverişli şərait yaranıb və nəticədə onlar "Sovetski"yə üz tutublar.

Sakinlər gileylənir ki, "Sovetski"də söküntü prosesi başlayandan sonra qarşılaşdıqları problemlərlə bağlı aidiyyatı dövlət qurumlarına etdikləri müraciətə biganə yanaşılır. Məlumata görə, 2015-ci ilin dövlət büdcəsindən "Sovetski"nin köçürülməsinə 180 milyon manat vəsait ayrılıb.

Ekspert bu vəsaitin xərclənib, xərclənməyəcəyinin yaxın aylarda məlum olacağını qeyd edilir. Köçürmə Komissiyasının sədri Səməd İslamov bildirib ki, qurum hazırda əsas diqqəti ölçü və inventarlaşdırma işlərinə yönəldib.

O, bunun səbəbini də açıqlayıb. Bildirib ki, ölçü və inventarlaşdırma işlərinin tam yekunlaşdırılması nəticəsində bizim əlimizdə tam, komplektləşdirilmiş sənəd olacaq ki, nəzərdə tutulan bütün yaşayış və qeyri-yaşayış sahələri ölçülüb.