Şəhərin “Müşviqavad”, “Aşurbəy” və “Qaraçuxur” ibadət evlərinin nəzarətə götürülməsi ilə 26 radikalın həbsi İŞİD-ə qoşulanların sayını azaldıb; Suriyaya ailəvi gedənlər qayıda biləcəkmi? - “Gündəm-xəbər”də

Ölkəmizdən “İslam xilafəti”nə qoşulanların sayında kəskin azalma müşahidə olunur. Azərbaycanın xüsusi xidmət orqanları tərəfindən Suriyada və İraqda qanunsuz hərbi birləşmələrdə iştirak etməyə gedənlərin qarşısı alınmaqdadır.

“Gündəm-xəbər”n əldə etdiyi məlumata görə, bir neçə ay əvvəl müşahidə olunan tendensiya nisbətən səngiyib. Hüquq-mühafizə orqanlarının keçirdiyi ardıcıl əməliyyatlar, “Müşviqavad”, “Aşurbəy” ibadət evlərinin nəzarətə götürülməsi, “Qaraçuxur” məscidində təhlükəsizlik tədbirlərinin gücləndirilməsi prosesin qabağını kəsməyə kömək edib. Bundan əlavə, MTN-nin keçirdiyi uğurlu əməliyyatlar nəticəsində 26 İŞİD üzvünün, ardınca daha 10 belə radikal təriqətçinin həbsi axının qarşısını almaqda mühüm rol oynadı.

Eyni zamanda, sərhədi keçənlərin ciddi şəkildə yoxlanılması bu prosesin qarşısını əhəmiyyətli dərəcədə alıb. İraq və Suriyanın bir neçə şəhərlərini zəbt edərək özünü “İslam dövləti” elan edən terror təşkilatında yüzlərlə azərbaycanlının döyüşdüyü bildirilir.

Onların arasında xeyli sayda həlak olanlar var. Son aylarda isə ailəvi şəkildə İŞİD-ə qatılanların olması xüsusi xidmət orqanlarını hərəkətə keçirib. Sonuncu dəfə Şəkidən üç uşağı ilə birlikdə Suriyaya gedən ananın hadisəsi ciddi siqnal olub.

Terror qruplaşmalarına qoşulan azərbaycanlı radikal təriqət üzvlərinin sayının azalması son çıxışlardan sonra müşahidə edilib. Dini Qurumlarla İş üzrə Dövlət Komitəsinin rəhbəri Mübariz Qurbanlının bu mövzuda ardıcıl bəyanatları, radikal qüvvələrin iqtisadi bazalarının məhv ediləcəyi haqda çıxışları icra olunmaqdadır.

Komitə sədri son açıqlamasında Azərbaycandan İŞİD-ə qoşulanların sayının sıfıra endiyini açıqlayıb. M.Qurbanlı son müşavirədə bildirib ki, radikalizm ideyalarının yayılmasına qarşı Dövlət Komitəsi tərəfindən həyata keçirilən maarifləndirmə tədbirləri öz bəhrəsini verməkdədir.

Xatırladaq ki, Azərbaycandan İŞİD-ə qoşulan ailələrin sayı durmadan artırdı. Şəkinin Daşüz kənd sakini İbrahim Məmmədovun Rusiyadan evinə qayıdanda ailəsinin Suriyaya getdiyini öyrənməsi şok effekti doğuran son hadisə idi.

İ.Məmmədovun sözlərinə görə, onun qayınları artıq bir neçə ildir Suriyada döyüşlərdə iştirak edir: “Qayınanam Şahbanova Qərinə Sədi qızı, bacanağım Alxasov Daşqın Abid oğlu və baldızım Alxasova Bahar Beydullah qızı mənim övladlarımı da özləri ilə aparıblar.

Amma onlar bunu necə edib, hələ də bilmirəm. Çünki mən 18 aprel 2013-cü ildə Rusiyaya işləməyə getmişəm. Orada işləyərək ailəmin dolanması üçün pul göndərirdim. Ölkəmizə isə bu il dekabrın 27-də qayıtmışam.

Anam mənə məlumat verdi ki, həyat yoldaşım Məmmədova Elnurə Beydullah qızı anasının və bacısının təkidi ilə uşaqlarımı

da götürüb onlarla Suriyaya gedib. Böyük qızım - Məmmədova Günay İbrahim qızının 15, kiçik qızım - Məmmədova Ülkər İbrahim qızının 12, oğlum - Məmmədov Rüstəm İbrahim oğlunun isə 13 yaşı var”.

İ.Məmmədovun sözlərinə görə, Şəki şəhərinin Daşüz kəndində 20 nəfərdən artıq adam Suriyada döyüşür. Daha əvvəl isə 40-a yaxın azərbaycanlı vəhhabi ailə Suriyaya gedib. Füzulidən məcburi köçkün düşən Fərhadovlar ailəsi məlumat verib.

Hazırda sözügedən ailənin 3 oğlu xanımları ilə birgə Suriya ərazisindədirlər. Kişilər saqqalını qırxaraq, qadınlar isə hicablarını açıb kosmetikadan istifadə edərək Azərbaycandan çıxmağa nail olublar. Ailələrin böyük əksəriyyəti evlərini və əşyalarını sataraq Azərbaycanı birdəfəlik tərk ediblər.

Fərhadovlardan gedən ailə üzvlərinin adları bunlardır - Fərhadov Məhəmməd, Fərhadov Seymur, Fərhadova Rahidə, Fərhadova Şəfiqə, Fərhadova Cəmalə və Fərhadov Vüqar. İsmayıllı rayonundan isə Suriyaya gedən vəhhabi ailələri geri dönüb. Əsəd rejiminə qarşı döyüşməyə gedən vəhhabilərin arvadları geri qayıdıb.

Rayonda bərbər işləmiş Rahidin həyat yoldaşı əri döyüşlərdə öldürüldükdən sonra Azərbaycana çətinliklə də olsa, geri dönməyə müvəffəq olub. Bu ilin avqustunda Suriyaya gedən bərbərin sentyabrın 27-də ölüm xəbəri yayılmışdı. Artıq onun arvadı və övladı İsmayıllıdadır. Məlumata görə, güləşçi Rəşad Baxşəliyevin də xanımı geri dönüb.

Onlardan biri - Şəkidə Rahim Hacıyev olub. Həmyerlisi Samir Abdurrəhmanova qarşı dələduzluq edərək avtomobil satacağı adı

ilə onun 11 min manatını alıb, avtomobili isə başqa yerdə gizlədib. Daha sonra R.Hacıyev həyat yoldaşı Günellə birgə Suriyadakı terrorçu qruplara qoşulmaq niyyəti ilə ölkəni tərk etmək istəyib.

Bu zaman rayon polis şöbəsinin əməkdaşları tərəfindən saxlanılıb. R.Hacıyevin evinə baxış zamanı təbliği və yayılması qanunla qadağan edilmiş 12 ədəd dini məzmunlu kitab, 9 ədəd disk və digər maddi sübutlar aşkar edilərək götürülüb.

Anoloji hadisə bu günlərdə Xudatda qeydə alınıb. Ata və oğul Suriyaya getmək istəyərkən sərhəddə hüquq-mühafizə orqanları tərəfindən saxlanılıb. Xudat sakinləri Ramiz Şahbazi və oğlu Bəhruz Şahbazi Gürcüstanla sərhəddə yaxalanıblar.

Ata və oğul Gürcüstan vasitəsilə Türkiyəyə, oradan da Suriyaya getmək istəyiblər. Hər iki şəxs İŞİD tərəfdarıdır. R.Şabhazinin digər oğlunun Xudat xəvariclərinə rəhbərlik etdiyi bildirilir.

Qeyd edək ki, onlarla belə ailə Suriyaya gedib.

Səhifəni hazırladı: Rafiq Qara