Keşlədəki ATS binasının tikintisində müamma; Beytulla Hüseynov daşınmaz əmlaklarını və vəzifəsini nazirlərdən birinə güvənərək, qoruyacağını düşünür, Məhəmməd Məmmədov isə YAP-a və onun ayrı-ayrı deputatlarının aylıq xərclərini ödəməsinə arxayındır

Rabitə və yüksək informasiya texnologiyalar naziri Əli Abbasovun yanvarda keçirilən kollegiya iclasında nazirliyin tabeliyində olan iki mühim qurumun - “Aztelekom” İB və BTRİB-ın rəhbərlərinə xəbərdarlıq etməsi və bundan sonra fəaliyyəti ancaq və ancaq sorğu keçirməkdən ibarət olan işçi qrupu yaratması haqqında yazdıqlarımıza rabitəçilər tərəfindən ciddi reaksiyalar verilir.

Xatırladaq ki, həmin müşavirədə nazir Əli Abbasov Məhəmməd Məmmədovun baş direktoru olduğu "Aztelekom”la, Beytulla Hüseynovun rəhbərlik etdiyi Bakı Telefon Rabitə İstehsalat Birliyinin fəaliyyətində rüşvət və korrupsiya faktlarının olmasını açıq etiraf edərək, onlara «özünüzü yığışdırın» ultimatimunu verib: «Nazir açıq şəkildə bu iki qurumda korrupsiya halının olduğunu dedi və tezliklə komissiya yaradaraq, bunların araşdırılacağını bildirdi. Amma nazir bu iki qurumda korrupsiyanın konkret hansı sahələri əhatə etdiyini demədi. Başqa sözlə desək, nazir «Aztelekom» və BTRİB-in nəzarətində olan internet provayderlərinin rəqiblərinin sıxışdırılmasından söz açdı. Lakin nazirliyin sıravi işçiləri də bilir ki, son iki-üç ildir nazirin qeyd etdiyi problem yoxdur. Yəni istənilən provayder istənilən ATS üzərindən abonentə internet xidməti göstərməkdə sərbəst və rahatdır. O səbəbdən nazir Əli Abbasovun bu sahədə 2-3 il əvvələ qədər mövcud olan problemləri nədən indi qabartması isə maraqlıdır. Görünür, Əli Abbasovun ya nazirlikdən xəbəri yoxdur, ya da o, nə danışdığının fərqində deyil».

«Gündəm Xəbər»ə verilən məlumata görə, aprel ayının əvvəlində sözügedən işçi qrupunun topladığı materiallar nazirliyə hesabat şəkildə təqdim ediləcək:

«Bəribaşdan deyə bilərəm ki, həmin hesabat nə Məhəmməd Məmmədovun, nə də Beytulla Hüseynovun maraqlarına toxunacaq. Çünki işçi qrupuna tapşırılan konkret sahələr hər iki məmurun problem yaratdığı sahələri əhatə etmir. Yaxşı olardı ki, nazir belə ucuz şoularla məşğul olmaqdansa, daha ciddi problemlərin həlli ilə məşğul olsun. Məsələn, Beytulla Hüseynovdan soruşsun ki, Bakının Nizami rayonu Keşlə qəsəbəsində tikilmiş yeni ATS binasının tamamlanma işlərini niyə bu qədər ləngidib».

Keşlə qəsəbəsindəki ATS binasının tamamlanma işlərinin Beytulla Hüseynovdan da tam aslı olmadığını deyən mənbənin sözlərinə görə, bu məsələdə Fövqəladə Hallar Nazirliyinin rolu var: «Adıçəkilən nazirlik ATS binasının tamamlanma işlərini dayandırıb. Səbəb isə binaya texniki şərt verilməməsidir. Fövqəladə Hallar Nazirliyi binanın yararsız olduğunu və texniki təhlükəsizlik qaydalarına əməl edilmədiyini iddia edir. Hətta bildiyimə görə, yararsız tikintiyə göz yummaq üçün tərəflər arasında bəzi xoşagəlməz söhbətlər də var. Bu barədə təfərrütlara toxunmaq istəmirəm. Amma yaxşı olardı Əli Abbasov özü məsələyə müdaxilə eləsin. O zaman Beytulla Hüseynovun FHN adıyla nazirə kələk gəlib-gəlməməsi də üzə çıxacaq»

Müsahibimizin sözlərinə görə, hazırda Beytulla Hüseynovla Məhəmməd Məmmədov qarşıda gözlənilən strtuktur islahatlarında yeni vəzifələrə təyinat almaq üçün bütün güclərini ortaya qoyublar: «Yanlış anlamayın, güc deyəndə vəzifə öhdəliyindən söhbət getmir. Hər iki məmur nazirin «qılığı»na girib, kənarda qalmamağa çalışırlar. Amma onlar paralel olaraq, öz əməllərindən də əl çəkmirlər. Hər iki şəxs şəxsi qazanclarını artırmaq üçün hər varianta əl atırlar. Araşdırsanız, hər ikisinin Bakı və rayonlarda qısa müddətdə hər birinin dəyəri böyük məbləğlərlə ölçülən nə qədər daşınmaz əmlaka sahibləndiyini də öyrənə bilərsiniz. Əgər Beytulla Hüseynov bu əmlaklarını və vəzifəsini nazirlərdən birinə güvənərək, qoruyacağını düşünürsə, Məhəmməd Məmmədov isə YAP-a və onun ayrı-ayrı deputatlarının aylıq xərclərini ödəməsinə arxayındır».

CƏFƏR