Xırdalanda poçtalyonlar Heydər Əliyev prospektini tanımır

Bəs rabitə sisteminə rəhbərlik edən vəzifəli şəxslərin bundan və əhalidən internet xidmətinə görə “mənimsənilən” pullardan xəbərləri varmı?

Poçt xidməti lap qədim zamanlardan və bütün ölkələrdə şərəfli peşə olmaqla hörmətlə qarşılanıb. Bir növ bələdçilik sisteminə müvafiq olan bu sahə ən çox əhalini məlumatlandırmaq, kiçik həcmli daşımaları ünvana ən tez çatdırmaq missiyasını yerinə yetirib. Ərazini ən yaxşı tanıyanlar da poçt işçiləri arasından çıxıb ki, onları poçtalyon adlandırırlar.

Amma bu hər yerdə belə deyildir. Poçt sahəsində həyata keçirilən islahatlar bu xidmətdə çalışan insanların passivliyini artırıb. Belə ki, internet, mobil telefon əlaqələri, bəzi yükdaşıma xidmətləri yarandıqdan sonra poçtun vəzifə borcları xeyli azalıb. İstənilən halda bu məsələlər heç kimə haqq vermir ki, vəzifə borclarının icrasına səhlənkar yanaşsın və nəticədə vətəndaşların haqlı narazılıqlarına səbəb olsun.

Abşeron rayonu Xırdalan şəhər Mərkəzi Poçt şöbəsi işçilərinin məhz Heydər Əliyev prospektini tanımaması barədə vətəndaşların müraciətini ilk əvvəl ciddiliyə almasaq da sonradan mövzuya müraciət etmək məcburiyyətində qaldıq. Araşdırma zamanı bəlli oldu ki, məsələ ilə bağlı vətənndaşlar dəfələrlə Mərkəzi Poçtun rəhbərliyinə müraciət etmişlər. Hətta məktub gətirməli olan poçtalyon vətəndaşlar tərəfindən əraziyə gətirilərək Xırdalan dairəsi adlanan yerə yaxın olan prospektin dalanları və prospektə bitişik olan Mirzə Ələkbər küçəsi ilə tanış edilmişdir. Amma eyni hal yenidən təkrarlanmış və poçtalyon özünə haqq qazandırmışdır ki, bu dolaşığı o, deyil, poçtun məktub bölüşdürən işçiləri törətmişlər. Hətta poçtun müdirinin iki poçtalyonu işdən azad etdiyi xəbəri də vətəndaşların nəzərinə çatdırılmışdır.

Bununla belə vəziyyət hələ də öz həllini tapmayıb. Bu ərazidə yaşayan vətəndaşlara ünvanlanan məktublar ya it-bata düşür, ya “ünvanda yaşamır” qeydiyyatı ilə geri qaytarılır, ya da dəfələrlə müvafiq poçt filialına zəng olunandan sonra gətirilərək çatdırılır.

Araşdırma zamanı bəlli olub ki, Azərbaycan Respublikasının Prezidenti cənab İlham Əliyevin müvafiq sərəncamı ilə Xırdalana şəhər statusu verildikdən dərhal sonra, yəni 2007-ci ilin ilk günlərində şəhərin mərkəzindən keçməklə iki hissəyə ayıran Zeynalabdin Tağıyevin adını daşıyan küçəyə Heydər Əliyev prospekti adı verilmiş və yenidənqurma, abadlıq işləri aparılmışdır.

Xırdalanda iki poçt filialı fəaliyyət göstərir. 1 saylı poçt şöbəsi şəhərin 28-ci məhəlləsində yerləşir və şəhərin prospektdən sağ hissəsinə, 2 saylı poçt şöbəsi isə Quşçuluq yaşayış massivində yerləşməklə şəhərin prospektdən sol hissəsinə xidmət göstərir. Nəzərə alsaq ki, Xırdalan şəhərinin uzunluğu Xırdalan dairəsindən başlamaqla Ceyranbatan gölü dairəsinədək beş kilometrdən uzundur və ərazidə bir neçə poçtalyonun fəaliyyəti kifayət etməz. Odur ki, ilk əvvəl vəzifəli şəxslərin ərazini yaxşı tanıması və düzgün bölgü aparması vacibdir.

Bu sahədə internet xidmətinin yarıtmaz olmasını da vurğulayan vətəndaşlar günahı məhz Abşeron rayon Telekommunikasiya Qovşağının işçilərində görür. “Zəng edib tələblərimizi bildirəndən iki-üç gün sonra internet olur, qalan günlər isə o qədər zəif fəaliyyət göstərir ki, olmaması ondan yaxşıdır” deyə açıqlama verən istifadəçi ATS işçilərinin bütün bəhanələrini aradan qaldırdığını bildirdi. Onun sözlərinə görə ATS işçiləri ilk əvvəl telefon xəttinin yararsız olduğunu bəhanə gətiriblər. Xətlər dəyişdirildikdən, hətta optik kabellə dəyişdirildikdən sonra da müxtəlif bəhanələr tapan işçilər bu ilin aprel ayından vəziyyətin düzələcəyini vəd ediblər. Onlara görə, ərazidə aparılan tikinti işləri o vaxta qədər başa çatdırılmalıdır ki, kommunikasiya kabellərinin çəkilişi yekunlaşdırılsın.

O vaxta qədər isə vətəndaşlar gözləməli, hər ay ödədikləri 20 manat müqabilində aldıqları 5 manatlıq internetlə kifayətlənməlidirlər.

Yeri gəlmişkən, onu da qeyd etmək lazımdır ki, internet xidmət hər yerdə, paytaxtda və bölgələrdə yarıtmazdır və aradan qaldırılması üçün hələ ki, ən yüksək səviyyədə belə tədbir görmək fikrində deyillər. Azərbaycan Respublikası İnternet Forumunun Prezidenti Osman Gündüzün qeyd etdiyinə görə internetin zəif olmasına baxmayaraq ən baha xidmət də bizdədir. Acınacaqlı vəziyyətdir ki, müharibənin acısını dadan, ərazisi üç hissəyə parçalanan Ukraynada 4Mbit internet xidməti 6 manat civarında olduğu halda Azərbaycanda müxtəlif bölgələrə uyğun olaraq 30-40 manat arası dəyişir.

Əli bəy Azəri