Bu gün Kürdəmirdə baş verən hərc-mərclikdən yazacağıq. Redaksiyamıza ardı-arası kəsilməyən şikayətlər Kürdəmirin vəziyyətini işıqlandırmağımız gərəkdiyini sübut etdi. Əvvəla onu qeyd edək ki, bu icra başçılarının idarə üsulunda böyük qüsur var. Əks halda hərə bir ucundan dövlət maliyyəsinə zəli kimi yapışmazdılar. Adam lap mat-məəttəl qalır ki, hansı birinin korrupsiya əməlindən, hansı birinin qarət maxinasiyalarından yazıb ifşa etsin ki, bu qarətçilik üsul idarəsinə son qoyulsun. Dövlət strukturunda çalışanların etibarlarından sui-istifadə edənlərə qarşı görünür, sərt tədbirlər gərəkir. Yoxsa bu kimi üzdəniraq icra başçıları tərəfindən dövlət maliyyəsi hələ çox sovrulacaq...

Redaksiyaya Kürdəmir icra başçısı Ceyhun Cəfərovun korrupsiyya əməlləri ilə bağlı gələn ittihamlar, əfsuslar olsun ki, araşdırmalar zamanı belə təkzib olunmadı. Əksinə bunu sübuta yetirən bir çox məqamların açıq-aydın göründüyü də göz qabağındadır. Araşdırmnalar zamanı icra başçısının dövlət maliyyəsini sovurma üsullarından birinin yolçəkmə əməliyyatı olduğu aşkarlanıb.

Belə ki, sən demə, Ceyhun Cəfərov Kürdəmir rayonun yollarını dəfələrlə təmir olunması və əslində heç bir dəfə də təmir olunmaması sayəsində özünə yetəri qədər mal-mülk toplamağa müvəffəq olub. Adamı yandırıb tökən də odur ki, bu maliyyə maxinasiyalarına nəzarətin olmamasıdır. Adamın başı bir dəfə daşa dəyər, daha sonra düzələr deyiblər. Amma biz gəlin etiraf edək ki, birinci dəfə deyil icra başçılarının maliyyə

maxinasiyalarından sil-silə yazılar veririk. Demək olar ki, bir iki icra başçısını çıxmaq şərti ilə, bütün icra başçıları hərə bir yolla dövləti talan etməklə məşğuldur. Amma, bu sistem illərdir davam etdirilir. Həmin icralar yeniləri ilə əvəz olunur, lakin bu üsul idarə dəyişmir ki, dəyişmir.

Deməli, qüsur icra başçılarında deyil. Əks halda icra başçıları birinin cəzalandırıldığını görüb özlərinə az da olsa ibrət götürərdilər. Qüsur bu sistemə nəzarət edənlərdədir. Deməli, icra başçılarının maliyyə sovurmaları ilə əlbir olanlar mövcuddur. Bu isə olduqca acınacaqlı bir durumdur. Çünki etimad və etibarın sarsınması məqamı var burada. Bu isə dövlətin puluna əl uzatmaqdan daha ağır bir faciədir. Ceyhun Cəfərovun yol əməlinə gəlincə isə elə Kürdəmir yollarının təmirinə dəfələrlə külli miqdarda maliyyə ayrılsa da, Kürdəmirdə nəinki, təmir heç maliyyə ayrılmış yollara su belə səpilməyib. Əvəzində təmirə ayrılmış maliyyənin arxasından su içilib. Sübut olaraq, bu gün Kürdəmirin mərkəzi yolunun istismara yararasız olduğunu göstərmək olar. Kürdəmir yollarında şütüyən maşınların sürücüləri özlərini Mozambik çöllərində hiss edirlər. Yerdə daş, kəsək, palçıq, dağ, dərə, təpə... nəisə. Enişli-yoxuşlu Kürdəmirə yaxşı ki, bir xarici vətəndaş üz tutmur. Əks halda əməlli-başlı biabırçılıq olar.

Sonra biz o xarici vətəndaşa Kürdəmir icra başçısının tamahına yenik düşməsini və bu yolların təmirinə ayrılan pulları hara xərclədiyini necə anlatasan?... Xarici balası da elə biləcək dövlət regionlara baxmır. Dərd də orasındadır ki, dövlət regionların abadlığına diqqət və qayğı göstərir. Lakin dərd orasındadır ki, bizim hər işimiz quzunu qurda tapşırmağa bənzəyir... Daha düzələr də deyə bilmirik. Çünki artıq “qozbeli qəbir düzəldər” məsəlini əzbərə bilirik. Əslində Ceyhun Cəfərovun Kürdəmir yollarını düzəltməməsi Kürdəmirdə maşınların qayıq əvəzi istifadəsini reallaşdırıb. Yənir Ceyhun Cəfərovun tamahı sayəsində Kürdəmirdə maşınların benzinə ehtiyacı qalmır.

Çünki onlar yağışdan su basmış yollarda üzmək sorunda qalırlar. Adamın Allahı var bu icralar 10 yol təmirinin pulunu yeyirsə, onun birini yola xərcləyirlər. Amma necə xərcləyirlər? Bir lətifə vardı uşaqlıqda hər simic adamlar üçün çəkilərdi. Xatırlayırsınızsa, bir ata ilə oğulun yağ çörək məsəlində ata oğuldan, oğul da atadan simic olur.

Bir banka yağ qurtarmasın deyə, çörəyi yağ bankasına sürtüb yeyirlər. Sonra da o yağı bir qutuya, o qutunu bir dolaba qoyub kilidləyirlərmiş. Bir gün ata işdən gec gəlir. İşdə düşünür ki, dolabın açarı cibində qalıb: “ Uşaq görəsən nə yeyəcək?” Simic atanın oğlu da, atasından geri qalmır və bizim Kürdəmir icra başçısı kimi məcburən çörəyi dolabın qapısına sürtüb yeməli olur. Hə bu icraların bir dəfə yol yamaması da eynən bu yağ-çörək kimi həyata keçirilir. Biz bu yol əməliyyatının sizə əsas mahiyyətini el dili ilə anlatdıq. Elmi dildə, faktlarla açıqlaması olduqca dramatik hal daşıyır.

Ülkər