Hadı Rəcəbli yenidən obyektləri ilə mətbuatın gündəminə gəlib; onun təkcə “Palıdlı sahil”i yox imiş...

Deputatın Lənkərandakı biznesi yenidən gündəmə gəlib. Hadı Rəcəbli ona aid biznes obyektləri olmadığını desə də, mətbuatda barəsində yeni məlumatlar dolaşmaqdadır. “Gündəm xəbər”in əldə etdiyi məlumata görə, H.Rəcəblinin Lənkəranda “Xan” restoranı fəaliyyət göstərir.

Həmçinin, “Dalğa” restoranı da deputata aiddir. Mənbə iddia edir ki, H.Rəcəbli keçmiş uşaq xəstəxanasının binasında da restoran açır. Binanın alt qatı isə “Zaminbank”a aiddir. Deputatın ən məşhur obyekti isə “Palıdlı sahil” istirahət mərkəzidir.

Lənkəranın “Palıdlı sahil” İstirahət Mərkəzində əməliyyat keçirilməsi və 5 nəfər gəncin həbs olunduğu haqda məlumat vermişdik. Həbs edilənlərdən birinin adını da yazmışdıq. Bu şəxs 2004-cü ildə “Ginnesin Rekordlar Kitabı”na adı düşmüş Lənkəranın Aşağı Nüvədi kəndinin sakini, 18 yaşlı Ələsgər Rəhim oğlu Həsənzadə olduğu müəyyənləşib. Ə.Həsənzadə 1 saat 45 dəqiqə ərzində barmaqlarının ucu ilə sinəsini yerə vurmamaq şərti ilə 3 min dəfə qalxıb-enib.

Onun 7 yaşında göstərdiyi bu rekord “Ginnesin Rekordlar Kitabına” düşüb. Çünki Həsənzadəyə qədər dünyada 7 yaşdan aşağı heç kim belə bir rekorda imza atmayıb. Mənbəmiz “Palıdlı sahil” İstirahət Mərkəzinin sahibinin Milli Məclisin Sosial-siyasət komitəsinin sədri Hadi Rəcəbli olduğunu da qeyd etmişdi. Hadı Rəcəbli isə obyektin ona aidiyyəti olmadığını bildirib:

“Hadi Musa oğlu Rəcəblinin mülkiyyətində heç bir sahibkarlıq obyekti yoxdur. Buna qədər də olmayıb, indi də yoxdur. Dünən gecə mətbuatdan bu barədə xəbər oxudum. Doğrudur, Lənkəranda cinayətkarlığa qarşı ardıcıl mübarizə aparılır.

Mən tərəfdən bunlar alqışlanır, müdafiə olunur. Lənkəranda yüzlərlə yer var. Onlarla mehmanxana var. Bunun Hadi Rəcəbliyə nə dəxli var? Mən onların nə özünü, nə də ailələrini tanıyıram. Hadi Rəcəbli işlədiyi dövrdə daxili işlərin Lənkəran Polis Şöbəsinə bir dəfə də olsun zəng etməyib. Bunu inzibati orqanlardan hər kəs soruşa bilər”.

Maraqlıdır ki, ümumdünya elektron axtarış sistemi (google, yandex) vasitəsilə “Hadı Rəcəbli ”Palıdlı Sahil" sözləri yazıb “axtar” düyməsini vurmaqla Lənkənrandakı obyektlə bağlı məlumat əldə etmək olar.