Dövlət Pedaqoji Universitetində araşdırmalar başlanılıb; rüşvət ADPU-da at oynadır

Təhsil Nazirliyi Azərbaycan Dövlət Pedaqoji Universitetində yoxlamalar aparır. “Gündəm xəbər”ə verilən məlumata görə, nazirlik ADPU-də imtahan cədvəllərinin qiymətləndirilməsi, maddi-texniki vəziyyət, dərslərə davamiyyətlə bağlı təftişə başlayıb.

Yoxlamalar həm əsas binada, həm də Bakıxanov küçəsində yerləşən filialda həyata keçirilir. Bir müddət əvvəl bu ali məktəbin tələbələri yazılı imtahan keçirilməsinə qarşı çıxaraq, imtahanların testlə təşkilini tələb edirdi.

Azərbaycan Dövlət Pedaqoji Universitetinin tələbələri isə (ADPU) qış imtahanlarını test üsulu ilə veriblər. Amma, yuxarı kurs tələbələri imtahanları yazılı şəkildə verdiklərindən müəllimlərə rüşvət verməli olurlar. Tarix fakültəsinin adının çəkilməsini istəməyən tələbəsinin sözlərinə görə, tələbələr semestr imtahanlarına kimi çox sıxışdırılır.

Test üsuluna keçilsə də, imtahana kimi keçid balı toplamaq üçün tələbəyə çox tapşırıq verilir. Bal yığa bilməyənlər müəllimə pul verib, qiymət yazdırır. Dövlət başçısı İlham Əliyevin rüşvətxorluğa qarşı mübarizədə sərt tədbirlərinə, ciddi xəbərdarlıqlarına baxmayaraq, ADPU-da at oynadır.

İllərdir ki, tüğyan edən rüşvət epidemiyası artıq ölkə təhsilini məhvə sürükləmişdi. Hətta keçmiş təhsil naziri Misir Mərdanov da çıxışlarında rüşvətin olmasını etiraf etmişdi. Onun vəzifəsindən kənarlaşdırılmasından sonra rüşvətə qarşı mübarizə istiqamətində müəyyən hərəkətlilik müşahidə olunduğu iddia edilir.

Azərbaycanın təhsil sistemini cənginə alan rüşvətlə bağlı yeni bir dövr başlanıb. Mikayıl Cabbarovun bu sahəyə nazir təyin olunduğu vaxtdan etibarən orta və ali məktəblərdə rüşvət yığımına fasilə verilib. Əksər universitetlərdə prorektor, dekan və müəllimlər qismən “rüşvət məzuniyyətinə” çıxıblar.