Bu barədə qəzetimizin ötən saylarında yazı dərc olunmuşdu. Kənd təsərrüfatı naziri Heydər Əsədov fermer Akif Rzayevin harayına çatacağını düşünürdük. Eşitdiyimizə görə, fermerə qarşı təzyiqlər daha da artmışdır. Əgər respublikanın ilk fermeri Akif Rzayevə dayaq durmaq istəyənlər yoxdursa, deməli, mövcud olan monopoliya sahibkarlığın inkişafına çox maneələr yaradacaqdır. Axı, iqtisadi böhrandan qeyri-neft sektorunun inkişafı ilə çıxa biləcəyimiz barədə aidiyyəti orqanlar daha dərindən düşünməlidirlər.

Odur ki, çətinliklə olsa da, fermer Akif Rzayevlə həmsöhbət ola bildik. Müsahibəni olduğu kimi dərc edirik:

-Akif kişi, nə vaxtdan sahibkarlıqla məşğulsunuz?

-Atam Nağı kişi də heyvandarlıqla məşğul olub. Gözümü açandan heyvandarlıqla məşğul olduğumuzu görmüşəm. Atamın yolunu davam etdirirəm. Əlimin zəhməti ilə “Hacı-Tağı” kəndli fermer təsərrüfatını qurmuşam. Hazırda təsərrüfatımda 3250 baş qoyun var. 2001-ci ildə də təsərrüfatımı çökdürməyə cəhd edənlər peyda olmuşdu. 2002-ci ildə aprelin 25-də Ulu öndərin qəbulunda oldum. O, mənə dayaq oldu, lazımi göstərişlər verdi. Mən daha da ruhlanıb təsərrüfatı genişləndirdim. Öz yanımdan dövlətçilik naminə könüllü bütün tədbirlərin fəalı oldum. Onlarla yoxsul ailəni himayəyə götürdüm. Hər prezident seçiləndə yüzlərlə xırda buynuzlu heyvan qurban kəsdim. Hər an da kəsəcəyəm.

Bəs belə olduğu halda, rayon rəhbərliyi sizi niyə sevmir?

-Əhəd Abıyev Daşkəsən rayon İH-nin başçısı təyin olunanda ilk təbrik edən də mən olmuşam. Hər bayramlarda, hər tədbirlərdə 30-50 qoyun kəsirdim. İH-nin başçısı hər tədbirdə birinci mənə söz verirdi. Məni digərlərinə misal çəkirdi. Meydanda qol-qola gəzirdik. İlham Əliyevə qarşı əvəzsiz vurğunluğumun bir hissəsini ona bəxş edirdim. Çünki prezidentimin yerli nümayəndəsidir.

-Deməli, icra hakimiyyətinin başçısı dostluğu bacarmayıb?

-Bacarırdı. Son zamanlar onu sabiq Torpaq və Xəritəçəkmə Komitəsinin Daşkəsəndəki kadrı Şahbaz Mehdiyev insanlardan ayrı saldı. Bunu hiss edirdim. Amma heç nə demirdim. Çünki kökümüzdə ara qarışdıran olmayıb.

-Şahbaz Mehdiyevlə aranızda nələrsə olmuşdumu?

-Şahbaz Mehdiyev DT və XK-nin rayon şöbəsinin müdiri işləyirdi. Hər an mənə əmi deyə müraciət edirdi. Hətta, qohum olmaq fikrinə də düşmüşdüm. Yaxından tanıyanda fikrimdən daşındım. Çünki yalançı şəxslə qohum olmaq istəməzdim.

-Axı, Şahbaz sizə “əmi” deyirdisə, necə oldu yalançı oldu?

-Bir torpaq sahəsini bir neçə nəfərə satıb qarşıdurmalar yaradırdı. Bir neçə dəfə məsləhət etmişdim ki, belə etməsin. O da üzümə demişdi ki, vəzifə ömürlük deyil. Zamanında pul yığmaq lazımdır. Başa düşdüm ki, Şahbaz pulu hər şeydən uca tutur. Ona görə qohum olmaq istəmədim.

- Bu barədə icra hakimiyyətinin başçısı Əhəd Abıyevlə söhbət etmisinizmi?

- Təxmini bilirdi. İnana bilməzdim ki, Şahbaz məndən qisas almağa cəsarət etsin. Həm də Ə. Abıyevin “saqqızını” Şahbazın oğurlaya biləcəyinə inanmırdım. Çünki İH-nin başçısı ilə əsl dostluq edirdim.

- Şahbaz Mehdiyev sizdən necə qisas ala bildi?

-O, bir neçə kənd sakinlərinə vədlər verməklə İH-nə gəlməsini təşkil etmişdi. Onlar icra hakimiyyətinə gəlib bildirdilər ki, mənim qoyun sürüm kənd ərazisindən yaylağa köçəndə sahələri otlayır, guya onların heyvanlarının örüş sahəsindən istifadə edirəm.

- Bəs İH-nin başçısı kənd sakinlərinə nə cavab verdi?

- Qurma olduğunu anlayırdı. Əhəd Abıyev şikayətlərdən təngə gəlib. Məndən xahiş etdi ki, “Birsultan” yaylağındakı örüş sahəsini kənd sakinlərinə verim. “Tatlar dərəsi”nə köçüm. Aradakı xətir-hörmət naminə razılaşdım. Siz deməyin, mənə vəd verilən ərazini də Şahbaz başqa şəxslərə satıbmış. Buraxılış vəsiqəsi ilə sürüm yaylağa çıxdı. Burada da Şahbazın dəstəsi yolları bağlamışdı. Şahbaza telefon açdım ki, bu nə oyundu? Nə etmək fikrindəsən?

O, mənə bildirdi ki, gəlim birlikdə hadisə yerinə gedək. Artıq mənə qarşı qurğu qurulduğunu hiss etmişdim. Bu barədə icra hakimiyyətinin başçısına da məlumat verdim. Şahbaz Mehdiyev qoçularına deyibmiş ki, məni möhkəm əzişdirsinlər. Lakin kənd sakinlərinin köməyi ilə aradan çıxarıldım. Rayona çatanda Şahbaz Mehdiyev mənə bildirdi ki, xəsarətim barədə şikayət edim. O, belə deməklə özünü sığortalayıbmış...

-Bu nə deməkdir?

-Mən polis şöbəsinə şikayət verdim. Həkim-ekspert rəy də verdi ki, bu hadisə olub 2013-cü ilin yayında.

- Şikayətin sonu nə oldu?

- Rayon prokurorluğunda dəfələrlə oldum. Oldu ki, Şahbaz Mehdiyevin xahişçisi olduğundan hələlik işə baxılmır. Şahbaz mənə də xahiş etdi ki, şikayətimdən imtina edim.

- Şikayətinizdən imtina etdinizmi?

-İmtina etməmişəm. Bu qədər müddətdə heç məni belə dəvət etməyiblər.

-İndi Şahbaz Mehdiyev qisaçılığından çəkilibmi?

- Mənə məxsus 550 hektar yaylaq örüş sahəsini 3 yerə bölüb. Sürümün həmin sahələrə getməsi üçün özgələrin sahəsindən keçməlidir. Bu da mümkün deyil. Yaylaq örüş sahəsinin ara məsafəsi 15 km-dir. Belə çıxır ki, təsərrüfatımı 3 yerə bölməliyəm. Məcbur olub təsərrüfatımı dağıtmalıyam.

- Bu barədə müraciətlər etmisinizmi?

- Etmişəm. Hələlik heç bir səs-soraq yoxdur.

- İcra hakimiyyətinin başçısı yenə dostunuzdurmu?

- Mən dost olaraq qalmışam. Şahbaz Mehdiyevin qurması ilə gülməli məzmunlu sərəncamlar imzalayanda dostluq, münasibət niyə Ə.Abıyevin gözünün önünə gəlməyib, bilmirəm. Yaxşı olardı ki, Ə.Abıyev 02.03. 2014-cü il tarixli, 122 saylı, 30.04. 2014-cü il tarixli 62 saylı sərəncamlarına nəzər salıb dostluğa qiymət versin.

Haşiyə: Daşkəsən Rayon Polis Şöbəsində öyrəndik ki, doğurdan da, 2013-cü ilin yayında Akif Rzayev şikayət verib. Göndərişlə ekspertdən xəsarət rəyi alınıb. Təhqiqat qanunauyğun aparılıb. Nəticəsi rayon prokuroru Elman Süleymanovdan soruşulsa yaxşıdır. Biz soruşa bilməsək də, yəqin qanunlar soruşacaq.

Vəkil Rüstəm