“Çudo-Peçka” restoranlarında zay məhsullar sırınır, köhnəlmiş yeməklər qızıdırılıb satılır; vaxtı keçmiş tortlar saxlanır; nə maliyyə gəlirləri açıqlanır, nə hesabat, gənclərin isə əməyi istismar olunur

Azərbaycanın qənnadı mağazaları və ayaqüstü yeməkxanalarında rüsvayçı şərait hökm sürür. Xüsusilə də sabiq nazirin restoranlar şəbəkəsi əhaliyə zay məhsullar sırıyır. “Gündəm-xəbər”ə müraciət edən bir qrup vətəndaş şikayət edir ki, iqtisadi inkişaf naziri olmuş Heydər Babayevin “Çudo Peçka” restoranları köhnəlmiş, qalmış, xarab yeməkləri qızdırıb isatır. Peraşki, qutab, şirniyyatlar köhnə qalan məmulatlar olur.

Artıq dəfələrlə şikayət olunmasına baxmayaraq, şəraitin yaxşılaşdırılması üçün bir iş görülmür. Standartlaşdırma, Metrologiya və Patent üzrə Dövlət Komitəsi yanında Texniki Tənzimləmə və Standartlaşdırma üzrə Dövlət Nəzarəti Xidməti "Çudo Peçka" MMC-yə məxsus istehsal sexlərində bir sıra ciddi nöqsanlar aşkarlamışdı.

"Çudo Peçka"nın "hədəfləri" 80 faizə kökləndiyindən keyfiyyət, müştəriyə yüksək xidmət kimi məsələlər arxa plana keçib. İstehlakçının sağlamlığı üçün vacib məqamlardan sayılan yararlılıq müddəti şəbəkədə "sirr" kimi qorunur.

Xüsusilə isti yay günlərində kremli məhsulların yararlılıq müddəti vacib hesab edildiyindən tortlarla bağlı vəziyyət daha acınacaqlıdır. Tortların istehsal tarixi, yararlılıq müddəti, tərkibi məhsulun üzərində göstərilmir. Halbuki, tortların saxlanma müddəti 36 saatdan artıq olmamalıdır. “Çudo Peçka” şirniyyat, qənnadı mağaza-kafelər şəbəkəsinin mağazalarında isə tortlar 10 gündən artıq saxlanılır.

Onu da deyək ki, Bakıda “Çudo Peçka” restoranlar şəbəkəsi əvvəlki fəallığı ilə diqqəti cəlb etmir. Şəhərdə bir vaxtlar dəbdə olan və müştəri izdihamı müşahidə edilən bu restoranların fəaliyyəti çox zəifləyib.

Müğənni Röyanın keçmiş qayınatası Çingiz Cəlilovdan “Çudo Peçka”nın alınması ilə müəssisələrin işində başlanan geriləmə KFC restoranlarının açılması ilə daha da dərinləşib.

“Çudo Peçka”da aparılan araşdırmalar və ciyər kökəsində (peraşki) qurd aşkarlanması müəssisənin fəaliyyət imkanlarını bir qədər də daraldıb.

İndi bu restoranlarda canlanmanın şahidi olmaq mümkün deyil. Mənbə bilddirir ki, kökədə qurd aşkarlanması faktının efirdə ictimailəşdirilməsivətəndaşların “Çudo Peçka”ya olan münasibətini və inamını yerə vurdu. Ardınca KFC restoranlarının şəhərin müxtəlif yerlərində sürətlə açılması rəqabətdə uduzmaqla nəticələndi. Artıq ciyər kökəsi çoxdandır menyüdən çıxarılıb.

Şirniyyat qida rasionunun əsasını təşkil etdiyindən bu sektor gəlirli sahədir. Lakin bu günə qədər sektorda əsas istehsalçı hesab olunan “Çudo Peçka” nə maliyyə gəlirlərinin, nə də xərclərinin strukturunu açıqlamayıb.

Əslində şəbəkənin Məhdud Məsuliyyətli Müəssisə təşkilati-hüquqi formasının seçməsi də əbəs deyil. Çünki bu cür cəmiyyətin sahibləri üçün əsas üstünlüklər cəmiyyətin öhdəlikləri üçün cavabdeh olmamalarından, itkilərinin onların qoyduqları mayalarla məhdudlaşdırılmasından, səhmdar cəmiyyətlərindən daha az qaydalara və hesabat tələblərinə tabe olmalarından ibarətdir. Digər tərəfdən,

adətən böyük dövriyyəyə malik müəssisələrin gəlir və xərcləri, sosial proqramları onların veb səhfələrində əksini tapır. “Çudo Peçka” isə yalnız “facebook” sosial şəbəkəsində səhifəyə malikdir. Bu səhifədə də ancaq müəssisənin məhsullarının reklamı əksini tapıb. “Çudo Peçka” üçün ucuz reklam daha sərfəlidir, nəinki Korporativ Sosial Məsuliyyət.

Müasir dövrdə şirkətlərin istehlakçıları qarşısında etimadının formalaşması, beləliklə, satışın artması reklamdan daha çox həmin şirkətin KSM sahəsindəki fəaliyyətindən qaynaqlanır. Reklam müəssisənin hər hansı məhsulunun imicini formalaşdırırsa, KSM fəaliyyətləri ümumilikdə şirkətin özünün müsbət imicini yaradır.

Düzdür, KSM Azərbaycanda şirkətlərin fəaliyyətinə son 5 ildə daxil edilib. Bəzi şirkətlər daxili KSM qaydaları formalaşdırıblar. Lakin “Çudo Peçka” ötən 11 ildə sosial sərmayə proqramlarına açıq olmayıb. Şirkətin bununla bağlı daxili qaydaları da yoxdur.

Eyni zamanda, “Çudo Peçka” bu gün əmək hüquqlarının daha çox tapdandığı müəssisələr sırasındadır. Yəni müəssisədə Azərbaycan Respublikasının Əmək Məcəlləsinin bir sıra maddələri kobud şəkildə tapdanır. Şəbəkənin mağazalarında əsasən gənclərin, tələbələrin əməyindən istifadə edilir ki, gərgin iş rejiminin müqabilində onlara minimum əmək haqqından bir qədər artıq məvacib - 150 manat verilir.

Xatırladaq ki, Standartlaşdırma, Metrologiya və Patent üzrə Dövlət Komitəsi yanında Texniki Tənzimləmə və Standartlaşdırma üzrə Dövlət Nəzarəti Xidməti “Çudo Peçka” MMC-yə məxsus istehsal sexlərində bir sıra ciddi nöqsanlar aşkar etmişdi.

Bakı şəhəri Binəqədi rayonu, C.Xəndan 36 ünvanında fəaliyyət göstərən “Çudo Peçka” MMC-də tort məhsullarının qablaşdırılmasında sanitar normaların pozulduğu, tozlu qablaşdırma materiallarından istifadə olunduğu üzə çıxarılmışdı.

Məlum olmuşdu ki, anbarda xammalın saxlanma rejiminə, tortların hazırlanmasında normalara əməl olunmur. Kulinar məmulatların hazırlandığı sexdə xammallar antisanitar vəziyyətdə saxlanılır. Peraşki istehsalı üçün alınan iribuynuzlu heyvanın ağ və qaraciyərinin qəbulu zamanı xidmət əməkdaşları orqonoleptik baxış keçirərkən ağciyərin üzərində qurd aşkar edilmişdi.