Elxan Babayev qanunsuz hökm çıxarıb, prezidentin təltif etdiyi şəxs ölkə başçısına və ədliyyə nazirinə üz tutdu

Azərbaycan məhkəmələrində sifarişli, qərəzli və ədalətsiz hökmlər artıq statistikaya çevrilib. Bəraət və yaxud ədalətli hökm istisna hallarda olur ki, mətbuatda təəccüblə qarşılanır. Çünki hakimlər ya yuxarıların tapşırığına əməl edir, ya da maddi maraqlara uyğun qərarların təmin edir. Belə bir hal Göyçayda olub.

Göyçayın Çərəkə kəndi sakini Ramiz Məmmədov “Gündəm xəbər” qəzetinə müraciət edib. O, Göyçay rayon Məhkəməsinin hakimi Elxan Babayevdən şikayətlənib. Şikayətçinin sözlərinə görə, hakim şəxsi və maddi maraqlarını dövlət qanunlarından ali tutub, qanunsuz hökm çıxarmaqla sağlamlığını ciddi təhlükə qarşısında qoyub.

“Buna görə mən həyatımı hər an itirə bilərəm. Belə ki, 01 noyabr 2014- cü il tarixdə Göyçay-Ucar yolunda baş vermiş yol nəqliyyat hadisəsi nəticəsində ağır dərəcəli xəsarət aldım. Dalağımı çıxardılar, qapalı kəllə-beyin travması, baş-beyin silkələnməsi, baş alın nahiyəsinin və sağ qulaq seyvanının yumşaq toxumalarının əzilmiş-sıyrılmış yaraları, sol böyrəyin zədələnməsi və sağ dizimin qapağının sınığı ilə nəticələnən həyat üçün təhlükəli olan sağlamlığıma ağır zərər vurulmaya aid xəsarət yetirilmişdir. Avtomobilim tamam yararsız vəziyyətə düşmüşdür və hazırda da həmin vəziyyətdə həyətimdə saxlayıram.

Yol nəqliyyat hadisəsinə görə açılmış cinayət işi üzrə təqsirləndirilən şəxs Əmirov Qəzənfər Şahlar oğlunun mənə, avtomobilimə vurduğu maddi və mənəvi zərərin ödənilməsi üçün məhkəməyə təqdim etdiyim mülki iddiamı hakim Elxan Babayev qanunsuz olaraq baxılmamış saxlamışdır ki, bu açıq-aşkar qanunsuzluq, özbaşınalıqdır”.

Şikayətçi əlavə edir: “Hakim aldığı rüşvət hesabına belə bir saxta, yaramaz hökm çıxartmaqla mənə sarsıdıcı zərbə vurmuşdur. Hələ də bu saxtakarlıqdan özümə gəlməmişəm. Bəlkə də Azərbaycan tarixində ikinci belə bir saxta, qanunsuz məhkəmə hökmü olmamışdır ki, bunu aldığı küllü miqdarda rüşvət hesabına hakim Elxan Babayev çıxartmışdır.

Nə qədər Allahsız, insafsız olasan ki, belə bir ədalətsiz hökm çıxarasan. Bu cinayət işi əvvəldən saxtakarlıqla aparılmışdır. Yol-nəqliyyat hadisəsi yerində baxış keçirib saxta akt tərtib ediblər ki, guya təqsirləndirilən şəxs avtomobilini saatda 70 km sürətlə hərəkət edirmiş.

Bu açıq-aşkar saxtakarlıqdır. Çünki belə sürətlə idarə edilən avtomobillə törədilən avtomobil qəzası zamanı ağır dərəcəli xəsarət alınması və avtomobilin tamamilə yararsız hala düşməsi qətiyyən mümkün deyil”.

R.Məmmədov qeyd edib: “Təqsirləndirilən şəxs Qəzənfər Əmirov avtomobilini həmin vaxt saatda 120 km sürətlə sürdüyü üçün qəza nəticəsində mən ağır dərəcəli xəsarət almışam və avtomobilim tamamilə yararsız hala düşmüşdür.

Aldığım xəsarətlərdən hələ də ağır əziyyət çəkirəm, əmək qabiliyyətimi 90% itirmişəm. Qəzadan sonra 11 gün reanimasiyada stasionar müalicə olunmuşam,

xəstəxanadakı şəraitsizliyə görə isə məcbur olub 2 ay 4 gün isə evdə yataq xəstəsi olub müalicə edilmişəm.

Hazırda da müalicə edilirəm. Mən Göyçay Televiziya verilişləri Yayım Stansiyasında uzun müddətdir ki, mühəndis vəzifəsində işləmişəm. 14 dekabr 2009-cu il tarixli sərəncamı ilə Prezident cənab İlham Əliyev məni tərəqqi medalı ilə təltif etmişdir.

Çünki mən məsuliyyətli, zəhmətkeş işçi olmuşam. Göyçay rayon Məhkəməsinin hakimi Elxan Babayev kimi maddi maraqlarımı dövlət qanunlarından ali tutmamışam, korrupsiyaya qurşanmamışam, saxtakarlıqla məşğul olmamışam.

Ekspertlərin qanuni sənədlə təsdiq etdikləri səhhətimə və avtomobilimə dəymiş maddi zərərin ödənilməsinə dair mülki iddiamı hakim Elxan Babayev baxılmamış saxlaması üçün aldığı külli miqdarda pul demək olar ki, mənim qan pulumdur.

Göyçay rayon Məhkəməsinin hakimi Elxan Babayevin bu korrupsiya əməli barədə Prezident cənab İlham Əliyevə, Ədliyyə Naziri, Məhkəmə-Hüquq Şurasının sədri cənab Fikrət Məmmədova şikayət ərizəsi ilə müraciət göndərmişəm.

Məsuliyyətli, qabaqcıl işçi kimi "Tərəqqi" medalı ilə təltif olunmuş şəxs olaraq mətbuat vasitəsi ilə Prezident cənab İlham Əliyevə və ədliyyə naziri cənab Fikrət Məmmədova müraciət edib xahiş edirəm, korrupsiyaya qurşanıb mənim qan pulumu mənimsəyən saxtakar, rüşvətxor hakim Elxan Babayevin barəsində ciddi, təsirli tədbirlər görəsiniz”.