Əhməd Muxtarov rayonu abadlıq adı altında bərbad günə salıb

Azərbaycanın artan iqtisadi qüdrətinin məntiqi nəticəsi olaraq son illər regionların sosial-iqtisadi inkişafı məqsədilə iri məbləğli ayırmalar həyata keçirilib. Bütün ölkə boyu aparılan abadlıq-quruculuq işləri nəticəsində şəhərlərin, kəndlərin siması dəyişir, yenilənir. Lakin, bütün bu inkişaf dinamikasına baxmayaraq Hacıqabul rayonu hələ də müasir Azərbaycan reallıqlarından kənarda qalıb. Adi sosial problemlər, məişət qayğıları rayon üçün aktuallığını saxlayır.

Rayonun bərbad durumda olan yolları sakinlərin gününü cəhənnəmə çevirib. Əvvəlki ayırmaları nəzərə almasaq, təkcə son il Hacıqabul rayonuna prezidentin ehtiyat fondundan 2 milyon manat vəsait ayrılıb. Ancaq bu vəsaitin taleyi barəsində yeganə məlumatlı adam varsa, o da rayon icra hakimiyyətinin başçısı Əhməd Muxtarovdur.

Bura rayonun daxili imkanları-büdcə vəsaitlərini də əlavə etsək, deməli, ən azı rayonun daxilindəki əsas küçələr bərbad vəziyyətdə olmamalıdır. Amma vəziyyət çox pisdir. Halbuki Hacıqabul rayon mərkəzində cəmi iki küçə var. Onların da vəziyyətini bilmək üçün bir traktora minib bazarın qarşısından üzü məhkəmənin inzibati binasına tərəf, sonra isə həmin əsas yolla təxminən bir neçə yüz metr irəli getmək lazımdır.

Ancaq yolların yəmiri üçün sənədlərdə heç də xəsislik edilmir. Bu məqsədlə “xərclənən” vəsaitin məbləği isə ancaq heyrət doğurur.

İcra başçısı Əhməd Muxtarov rayon yollarının təmirini özünə yaxın bir şirkətə həvalə edib ki, nəticədə dövlətdən ayrılan yüzminlərlə manat vəsait mənimsənilib. Bildirilir ki, rayonun bəzi yollarının təmiri üçün “Muğan-1” adlı müəssisənin hesabına 500 manat vəsait köçürülüb.İcra başçısının köməkliyi ilə tenderi udan “Muğan-1” MMC çəkdiyi yollarda ciddi şəkildə yeyintiyə yol verib. Təsəvvür edin ki, asfaltın qalınlığı layihədə 10 sm göstərilsə də, Əhməd Muxtarovun nəzarətindəki firma bu qalınlığı 4-5 sm-ə qədər ixtisar edib. Bu da yeni cəkilən yolun davamlılığını yariya qədər azaldır.

Daha bir məlumatda isə bildirilir ki, Əhməd Muxtarov kənd yollarından başqa Hacıqabul şəhərinin abadlaşdırılmasını isə “İnşaatçı-S” MMC yə həvalə edib. Adı çəkilən şirkətə abadlıq işləri üçün iki dəfə üst-üstə 2,3 milyon manat vəsait ayrılıb. Məlumata görə, kənd yolları həm də ensiz çəkilib. Hər tərəfdən 15 sm qısaldırılıb ki, bu da 100 min manatlarla pulun mənimsənilməsi və qəza hallarının çoxalmasıdır.

Ayrılan vəsaitlərin mənimsənilməsi, talanmasının səfasını başqaları çəksə də cəfasını hacıqabullular çəkirlər. Onlara talanan milyonlardan qalan dağılan yollar, palçıqlı küçələr olub.

Rayonda aparılan kosmetik təmir işlərinin böyük qismi isə yerli sahibkarların vəsaiti hesabına görülür. Ümumiyyətlə, rayonda fəaliyyət göstərən sahibkarlar həmişə icra başçısının “qayğısını” hiss edirlər. Belə ki, rayon mərkəzində görülən quruculuq işləri zamanı sahibkarlardan pul toplanılır,görülən işlər isə başçının adına çıxılır.

Hacıqabuldan daxil olan məlumata görə, rayon icra başçısı Əhməd Muxtarov təkcə sahibkarları deyil, həmçinin büdcə təşkilatlarını da öz “qayğısından” kənar saxlamır. Verilən məlumatlarda bildirilir ki, Əhməd Muxtarov hər ay rayon Təhsil Şöbəsi, Səhiyyə idarəsi, Mədəniyyət və Turizm şöbəsi, Suvarma Sistemləri İdarəsi, Pirsaat Qış Otlaqlarının Su Təchizatı Sistemləri İdarəsi, Kür Su Kəmərləri İdarəsi, Rayon Telefon Qovşaq idarəsi, 2 saylı Yol Yaşıllaşdırma MMC və digər təşkilat rəhbərlərindən hesab alır.

Rayondan daxil olan məlumatlar belə düşünməyə əsas verir ki, Əhməd Muxtarov fəaliyyətindən ən çox narazılıq edilən icra başçılarının sırasında qərarlaşıb. Bunun səbəbləri isə kifayət qədərdir. Hər halda ölkə boyunca müşahidə edilən inkişaf fonunfa Hacıqabul rayonunun hələ də problemlər girdabında çabalaması ən böyük faktdır. Rayonda işsizlik səviyyəsinin yüksək olması, abadlıq-quruculuq işlərinin yarıtmaz şəkildə həyata keçirilməsi, ayrılan büdcə pullarının mənimsənilməsinə dair şübhələrin yayğın olması – bütün bunlar müasir Hacıqabulu

səciyyələndirən əsas kriteriyalara çevrilib. Əsas vəzifəsi xalqa xidmət etmək, onun problemlərinin həllinə yardımçı olmaq olan məmurar özləri xalq üçün ən böyük problemə çevrilirsə onda haqqı tapdalanan, talanan milyonlar neyləməlidirlər? Hacıqabulu çətin duruma salan, əvəzində böyük sərvət və mövqe sahibi olanlar bunu düşünsələr daha yaxşı olardı. Bu gün Hacıqabulda hökm sürən məmur özbaşınalıqları rayonun 1 nömrəli problemidir. Bu problemi kökündən həll etməyin zamanı çoxdan çatıb.

Mərdan