YAP MNTK sədri 20 milyonluq yeyintini qapada bilmir; Baş direktor naziri “qara kitab”la susdurub, ancaq hakim dairələrdə 11 ildə mənimsənilən pulların taleyi gərginliyi artırıb

«Aztelekom» İstehsalat Birliyinin baş direktoru, eyni zamanda, YAP Mərkəzi Nəzarət-Təftiş Komissiyasının sədri Məhəmməd Məmmədovun az əvvəl Hesablama Palatasının açıqladığı korrupsiya faktlarından “saxta dosye” ilə yayınmağa çalışdığı bildirilir. Ancaq onun bu istəyinin həyata keçmədiyi də iddia olunur.

Xatırladaq ki, az öncə Hesablama Palatasının 2014-cü ildəki fəaliyyətinə dair yayılan hesabatında əks olunan məlumatda bildirilir ki, “Aztelekom”da nəzarət tədbiri zamanı audit dövründə qanunvericilik aktlarının tələblərinə əməl edilməməsi nəticəsində ƏDV-nin və yol vergisinin azaldılmasına, vergi ödəyicisinə verilmiş elektron vergi hesab fakturası üzrə alınmış malların dəyəri ödənilən gündən gec ƏDV-nin ödənilməsinə və vergi tutulan əməliyyatların vaxtının dəqiq müəyyən edilməməsi səbəbindən hesabat dövrləri üzrə büdcəyə ödənilməli olan ƏDV məbləğlərinin hesablanmasında kənarlaşmalara yol verilməsi müəyyən edilib.

Audit dövründə məlum olub ki, Birliyin idarə aparatı tərəfindən digər struktur vahidlərinə köçürülmüş pul vəsaitlərinin təyinatları üzrə istifadəsinə nəzarət edilməyib, Birliyin strukturuna daxil edilmiş telekommunikasiya qovşaqlarının əksəriyyəti zərərlə fəaliyyət fəaliyyət göstərib, 01 yanvar 2014-cü il tarixə təqdim edilmiş iş və xidmətlərə görə 45158,2 min manat debitor borcu, xarici kontraktlar üzrə iş və xidmətlərə, eləcə də, əsasən rayonların telekommunikasiya qovşaqlarında quraşdırılmaq üçün alınmış telekommunikasiya avadanlıqlarına görə 18187217,2 ABŞ dolları, alınmış mallara (iş və xidmətlərə) görə Azərbaycan Respublikasının rezidentləri üzrə 29945,22 manat kreditor borcları yaranıb.

Hesablama Palatasının Kollegiyası bu auditin nəticələrini müzakirə edərək, aşkar olunmuş nöqsan və çatışmazlıqların aradan qaldırılması istiqamətində qanunvericiliyə uyğun zəruri tədbirlərin həyata keçirilməsi və görülmüş işlərə dair Palataya məlumatın təqdim edilməsi barədə qərar qəbul edilib. Həmin qərar icra üçün Rabitə və Yüksək Texnologiyalar Nazirliyinə, o cümlədən “Aztelekom” İstehsalat Birliyinə, eyni zamanda Vergilər Nazirliyinə göndərilib.

Bununla bağlı Vergilər Nazirliyindən təqdim edilmiş məlumata görə, nazirlik yanında Xüsusi Rejimli Vergi Xidməti Departamenti tərəfindən Birliyə 5313,9 min manat əlavə vergi məbləğinin hesablandığı və 2018,3 min manat maliyyə sanksiyasının tətbiq edildiyi, hesablanmış əlavə vəsait və maliyyə sanksiyasının dövlət büdcəsinə ödənilməsinin təmin olunduğu bildirilib.

“GündəmXəbər”in məlumatına görə, məlum faktların yayılmasından sonra Məhəmməd Məmmədov dərin narahatlıq keçirməyə başlayıb. Çünki təkcə bir nazirliyin iri müəssisəsinin rəhbərindən daha çox, həm də iqtidarda olan bir partiyanın - Yeni Azərbaycan Partiyasının MTNK-nın sədri statusundan yol verdiyi korrupsiya faktları cəmiyyətdə ciddi etiraz doğurub. Bundan əlavə, kimsə təminat verə bilməz ki, bu faktlar nə vaxtsa bəzi xarici qüvvələr tərəfindən Azərbaycana və onun iqtidarına qarşı silah kimi istifadə olunmayacaq:

«Elə bu məqamlar da nazir Əli Abbasovla YAP rəhbərliyini, hətta hakim dairələri də düşündürməyə başlayıb. Buna görə Məhəmməd Məmmədovla yolları ayırmaq qərarı üzərində dartışma güclənib».

Məlumatlı şəxs deyir ki, Məhəmməd Məmmədov əlində olan ciddi kompormatlarla Əli Abbasovu susdurmağı bacarsa da, siyasi rəqibləri ilə bacara bilmir: «Mənim bildiyimə görə, Məhəmməd Məmmədov 20 milyonluq çatışmazlığı “qara kitabı”nda olan “dəlillər”lə nazirə təqdim edib. Həmin “dəlillər”in arasında YAP-ın deputatlarına edilən maliyyə və yanacaq dəstəyindən tutmuş, elə Əli Abbasovun özünün yaxın ətrafına verilən pulların da qeyd olunduğu bildirilir. Görünür, elə bu dosye səbəbindəndir ki, Əli Abbasov Məhəmməd Məmmədovla çəkingən davranır. Ancaq YAP-da bəzi funksionerlər və hakim elitə fərqli düşünür, fərli addımlar atırlar. Onlar Məhəmməd Məmmədovun üzərinə qoyulan bəzi tədbirlərin maliyyələşmə tələblərindən sui-istifadə etdiyini düşünülər. Yəni yuxarıdan verilən tapşırıqlardan sui-istifadə edən «Aztelekom»un baş direktoru fürsətcil davranaraq, xeyli maliyyəni gizli yolla öz hesabına keçirib. Bir sözlə, yuxarı dairələr YAP-ın deputatlarına və bəzi tədbirlərə 20 milyonluq pulun xərclənməsinə inanmırlar və hesab edirlər ki, Məhəmməd Məmmədov vəzifədən və statusdan istifadə edərək, partiyanın da adına ləkə vurubdur».

Mənbə bildirir ki, Məhəmməd Məmmədov həmin vəsaitin bir hissəsi ilə internet və digər avadanlıqlar sifariş verildiyini desə də, buna da inanlar yoxdur: «Çünki o, ən azı 2 il əvvəl həmin avadanlığı sifariş versə də, hələ də pulunu ödəmədiyi üçün gətirib, təhvil verməyiblər. Ona görə də “Aztelekom”in provayderində kəsinti və yüklənmələr həddi-hüdudu aşıbdır. Bundan əlavə, palatanın hələ üzdən getdiyi yoxlama ilə aşkarlanan 20

milyonluq çatışmazlıq 2014-cü ili əhatə edir. Yəni bir il ərzində mənimsənilən pul bu qədər olub. Məhəmməd Məmmədovun «Aztelekom»a 11 il rəhərlik etdiyini düşünəndə isə, bu vəsaitin 200 milyonu aşdığını da iddia etmək olar. Elə bu şübhələr və ictimailəşən digər faktlar da YAP rəhbərliyini əndişələndirir. Ona görə də Məhəmməd Məmmədovun korrupsiya faktını tam qapadıb, «düz yol»a çıxdığını deyənlər, yanılır. Tam əksinə, YAP-da bu yeyintilərin bəzi qüvvələr tərəfindən partiya və dövlətə yönəldiləcəyi haqda narahatçılıq getdikcə güclənir...»

İsmayıl