“Ata yolu” qəzetinin əməkdaşlarından “Gündəm xəbər”ə verilən məlumata görə, qəzetin əməkdaşlarına məxsus avtomobil Sumqayıt DYP-nin cərimə meydançasına yerləşdirildikdən sonra, avtomobildən 3.500 manat pul oğurlanıb.

Aprel ayının 29-u saat 10-11 radələrində, qəzetin əməkdaşlarına məxsus avtomobil Sumqayıt ərazisində saxlanılıb. Qəzetin məsul katibi, sürücü İ.İbayevin hərəkətlərindən şübhələnən (avtomobili uzaq yol sürdüyündən yorğunluğu şübhələrə yol açıb) Sumqayıt DYP əməkdaşları onu Sumqayıtda sərxoşluğa qarşı testdən keçiriblər. Sərxoşluğa qarşı yoxlama aparatı işləmədiyindən İ.İbayev həkimə etirazını bildirib. DİN-in 102 qaynar xəttinə zəng edərək özbaşınalıq haqqında məlumat veriblər. Buna baxmayaraq, ona DYP əməkdaşları məcburən, sərxoşluq haqqında akta imza atdırmaq istəyiblər.

“Ata yol”çuların bildirdiyinə görə, qəzetin əməkdaşları bölgələrdə qarşıdan gələn böyük xərc və israfçılıqla müşayiət olunan “Gül bayramı”na hazırlıqla bağlı müsahibə və reportajlardan qayıdırmışlar.

Hadisədən bir gün sonra “Ata yol”çular Sumqayıt DYP-nin cərimə meydançasına yerləşdirilən avtomobildən əşyalarını götürmək qərarına gəlirlər. Avtomobilə baxış zamanı çantada olan möhür, qəzetə məxsus sənədlər yerində olsa da, 3.500 manat pulun oğulandığının şahidi olublar.

Əməkdaşlar Sumqayıt DYP-nin rəisi Bayram Zeynalovun qəbuluna israrla cəhd etsələr də, bu mümkün olmayıb. B. Zeynalovun köməkçisi (rəisin Masallıdan gətirdiyi xalası oğlu) əməkdaşların şikayətini dinlədikdən sonra rəis B.Zeynalovun yerində olmadığını bildirib. Bildirildiyinə görə, həmin ərəfədə rəisin qəbul otağından ayrı-ayrı vaxtlarda 3 nəfər çıxıb. Qəzetin məsul katibi İ.İbayev rəisin köməkçisinə şikayət edəcəyini bildirib.

Köməkçi cavabında: “hara istəyirsiniz, şikayət edə bilərsiniz”.

Artıq oğurluqla bağlı Sumqayıt Şəhər Prokurorluğuna şikayət verilib.

Keçilməz yollarla (2 km yolu) gedərək cərimə meydançasındakı oğurluqla bağlı Sumqayıt DYP-nin əməkdaşlarından hadisəyə münasibət öyrənməyə çalışsaq da, bizdən uzaqlaşdılar.

Xatırladaq ki, Sumqayıt DYP-nin rəisi, 29 yaşlı Zeynalov Bayram Ramazan oğlunun böyük addımlarla rəis pilləsinə yüksəlməsində hörmətli bütün Qafqazın Şeyxi, Hacı Allahşükür Paşazadənin rolu danılmazdır. B.Zeynalov şeyxin bacısı, qızının həyat yoldaşıdır. Şeyx həzrətlərinə güvənən rəis B.Zeynalov vətəndaşları qəbul etməyi özünə həqarət sayır. Bu baxımdan qəbula gələnləri “rəis yoxdur” kimi cavabla yola saldırır.

Kamil