Üzləşdiyi problemin həllinə hələ də nail ola bilməyən Zirəddin Dılışov, bu gün ümidini KİV nümayəndələrinə, bir də ki, ədalətli qərarlar verə biləcək vəzifə sahiblərinə dikir

Son illər bölgələrdə baş alıb gedən qanunsuzluqların, əndazəni aşan həngamələrin, daha çox isə sıravi sakinlərin aylar, illər uzunu get-gələ salınmaları və.s, bu gün əksəriyyətin müzakirə etdiyi mövzulardandır. Belə bir amillərin əmələ gəlməsinə səbəb, çox zaman əksər vəzifə sahiblərinin qol qoyduqları maxinasiyalar, minbir hoqqalar olur. Məsələn, bir neçə gün bundan əvvəl redaksiyamıza Qazax rayonu İkinci Şıxlı kənd sakini Dılışov Zirəddin Əmiraslan oğlu yazdığı şikayət ərizəsində bildirir ki, “bizim ailəyə 1997-ci ildə Qazax rayon Aqrar İslahat Komissiyasının qərarı ilə, rayonun Qırmızı Körpü Buraxlış Məntəqəsinə gedən yolunun üstündə 63 sot pay torpaq sahəsi verildi. 1998-ci ildə verilmiş pay torpaq sahəsi ilə bağlı sənədləşmə işi də aparıldı”. O, onu da bildirir ki, “elə ki 1998-ci ilin yazında əkin-səpin kampaniyasına başlanıldı, bu zaman yaxınlıqda fəaliyyət göstərən “Qozluq” restoranının sahibi Hidayət Məmmədov mənə bildirdi ki, “bu ərazi mənimdir, ona görə də sən buradan çıx get” dedi. Dərhal problemin ciddiliyini dərk edib, həmin vaxt İkinci Şıxlı kənd icra nümayəndəsi vəzifəsini daşıyan Arif Məmmədova çatdırdım ki, mənim pay torpağımı əlimdən alırlar. Sağ olsun Arif müəllimi də, o isə problemin həllinə köməklik göstərmək əvəzinə məndən 1000 dollar pul istədi. Və bildirdi ki, “sən həmin pulu ver, mən də sənin problemini qaydaya salım” dedi. İmkanım olmadığı üçün, icra nümayəndəsinin istədiyi pulu həmin vaxt ona verə bilmədim”.

Şikayətçi Z.Dılışov onu da bildirir ki, “bizim ailəyə Torpağa Mülkiyyət Hüququna Dair 4 nömrəli Dövlət Aktı əsasında verilmiş 63 sot pay torpaq sahəsi, 2004-cü ildə “Qozluq” restoranının sahibi Hidayət Məmmədov tərəfindən, rayonun İkinci Şıxlı kənd sakini Yusifov Pərviz Cavanşir oğluna heç bir sənəd-sübut olmadan satılır. O da, həmin sahədən təqribən bir-iki il müddətinə otlaq sahəsi kimi istifadə edir”. Diqqəti cəlb edən hal odur ki, hələ 2003-cü ildə kənd bələdiyyəsinin sədri olmuş Məhət Süleymanov, Z.Dılışova bildirir ki, “gəl sən razılığını ver, həmin yeri Hidayət Məmmədova baha qiymətə sataq”. O, belə bir təklifə razı olmadığını açıqlayır.

Maraqlı hal o olur ki, Z.Dılışova və onun ailə üzvlərinə verilmiş 63 sot pay torpaq sahəsinin Pərviz Yusifova satılmasına baxmayaraq, pay torpaq sahəsinin

onun adına olmasına dair heç bir sənəd-sübut olmadığından, həmin torpaq sahəsi 2008-ci ildə Pərviz Yusifovdan geri qaytarılır. Və həmin il də, 63 sotluq torpaq sahəsi İkinci Şıxlı kənd icra nümayəndəsi İsa Tanrıverdiyevin və bələdiyyə sədri Fikrət Talıbovun planları əsasında satılır. Belə ki, hər iki vəzifə sahibi əlbir olaraq 63 sotluq pay torpaq sahəsini əvvəlcə kənd bələdiyyəsində müavin vəzifəsini daşıyan Telman Nuriyevin adına saxta yolla sənədləşdirirlər. Bir müddət keçdikdən sonra isə, onun adına Torpağa Mülkiyyət Hüququna Dair 371 saylı Dövlət Aktı çıxarıb, qeyd olunan torpaq sahəsinin satışını da həyata keçirirlər.

Aparılan araşdırmalardan və şikayətçinin danışdıqlarından o da bəlli olur ki, vaxtilə Telman Nuriyevə islahat komissiyasının qərarı ilə pay torpaq sahəsi verilmiş və onun adına Torpağa Mülkiyyət Hüququna Dair 301 saylı Dövlət Aktı da çıxarılmışdır. Bu belə olduğu halda, onun adına ikinci dəfə çıxarılmış 371 saylı Dövlət Aktının saxta olması, tam isbata yetirilmiş olur.

Diqqəti cəlb edən hal odur ki, elə ki, Z.Dılışov islahat komissiyasının qərarı ilə onlara verilmiş 63 sot pay torpağı sahəsinə aid Dövlət Aktını tələb edir, bu zaman hər iki vəzifə sahibi ona 4 saylı Dövlət Aktını vermək əvəzinə, saxta yolla düzüb-qoşduqları 371 saylı Dövlət Aktının surətini verirlər. Bu gün isə Z.Dılışova nə 4 saylı, nə də ki, 371 saylı Dövlət Aktının əsasını vermirlər. Vəziyyətin belə bir həddə gəlib çıxmasında DTXÇK, Qazax rayon şöbəsinin müdiri olmuş Sərxan Nəbiyevin və Tovuz Kadast İdarəsinin rəisi işləmiş Fərmayıl müəllimin də günahı çox olur.

Onu da qeyd edək ki, Z.Dılışov üzlışdiyi problemin həlli məqsədilə, hələ 3-4 il bundan əvvəl Qazax rayon Məhkəməsinə müraciət etmək zorunda qalır. Təəssüflər olsun ki, ünvanlanmış iddia əsasında laqeyd məhkəmə qərarı çıxarılır. Buna səbəb o olur ki, ədalətsiz məhkəmə qərarları çıxarmaqla xüsusi ad-san qazanan İlham Nuriyev, həmin vaxt Qazax rayon Məhkəməsinin idi. Və belə bir addımları ilə çox keçmədi ki, onun hakimlik fəaliyyətinə birdəfəlik xitam da verildi. Çıxarılmış ədalətsiz məhkəmə qərarından Gəncə Apelyasiya Məhkəməsinə kassasiya şikayəti verilsə də, çox təəssüflər olsun ki, ədalətsiz qərar həmin instansiya tərəfindən də qüvvədə saxlanılır.

Bu gün yerli vəzifə sahiblərinin əməllərindən zinhara gələn, ədalətsiz məhkəmə qərarlarından bezən, bir sözlə ümidini əksər vəzifə sahiblərinin hoqqalarından üzən Z.Dılışov, hal-hazırda üzləşdiyi probleminin ictimailəşməsinə çalışır. İstəyi yalnız ondan ibarətdir ki, onun və ailəsinin adına verilmiş 63 sotluq pay torpağına sahib ola bilsin. Və o, ona da inanır ki, gec-tez haqq-ədalət qalib gələcək. Belə bir səbəb üzündən də, hələ ümidini hər kəsdən tam üzməyən Z.Dılışov inanır ki, “Azərbaycan Respublikası Dövlət Torpaq və Xəritəçəkmə Komitəsinin ləğv

edilməsi haqqında” Azərbaycan Respublikası Prezidentinin 05 fevral 2015-ci il tarixli, 453 saylı Fərmanından irəli gələn məsələlərin həlli təmin edildikdən sonra, aidiyyəti qurumlar problemin həllinə diqqətlə yanaşıb ədalətli addımlarını atacaqlar. Məqalədə adları çəkilən şəxsləri də, dinləməyə hazırıq.

Problemin varlığını diqqətdə saxlayacağıq.

Mətləb