02 mart 2015-ci il tarixdə Qusar rayon Məhkəməsində hakim Hüseynov Ələkbər Məmmədtağı oğlunun sədrliyi ilə keçirilən prosesdə çıxarılmış qərar, hansısa maraqlar çərçivəsində çıxarılmış qərardır

Bəzi məhkəmələrdə ədalət prinsipinin təmin edilməməsi adi hala çevrildikcə, vətəndaşların ayrı-ayrı mətbu orqanlara, bir çox media qurumlarına və.s ünvanladıqları şikayətlərin də ardı-arası kəsilmir. Bu sırada Qusar rayon Məhkəməsindən redaksiyamıza daxil olan ərizələr çoxluq təşkil etdikcə, əksər hallarda nəzər-diqqət də, çıxarılmış ədalətsiz məhkəmə qərarlarının mahiyyətinə yönəlir. Məsələn, bu dəfə redaksiyamıza Qusar rayon Məhkəməsinin hakimi Ələkbər Hüseynovun 02 mart 2015-ci il tarixdə çıxardığı qərarla bağlı, Qusar şəhəri, Müqtədir küçəsi 208 saylı ünvanında yaşayan Orucov Mahir Mayıs oğlu tərəfindən şikayət ərizəsi daxil olmuşdur. O, yazdığı şikayət ərizəsində bildirir ki, “mən 1999-cu ildə rəsmi nigaha daxil olmadan Çələbiyeva Elnurə Nazir qızı ilə ailə həyatı qurmuşdum. Bir müddət nigahsız yaşasaq da, nigahımızı sonradan rəsmiləşdirdik. 21 noyabr 2004-cü il tarixdə birgə

nigahımızdan övladımız Orucova Albina Mahir qızı dünyaya gəldi. Ailə münasibətlərimiz uyğun gəlmədiyi üçün, sonradan Elnarə Çələbiyeva ilə nigahımız məhkəmə qaydasında ləğv olundu. Həmin vaxt azyaşlı Albina anasının yanında qaldığından uşağın saxlanması üçün çıxarılmış məhkəmə qərarırına əsasən, verəcəyim alimenti vaxtlı-vaxtında çatdırırdım və uşağımla da tez-tez ünsiyyətdə olurdum.

Əldə etdiyim məlumatlara görə Elnurə Çələbiyeva mənimlə nigahdan ayrıldıqdan sonra, Rusiya Federasiyasında yaşayan bir şəxslə evlənmiş və belə bir səbəb üzündəndə o, bu gün RF-na getmək istəyir. Amma o, tək getmək istəmir və istəyi odur ki, 18 yaşa çatmamış Albinanı da RF-da yaşayan qohumlarının yanına apara bilsin. Mən isə buna razı olmadığımı bildirirəm”.

Azərbaycan Respublikası Qanunun 2-ci maddəsinin 2-ci və 3-cü hissəsində bildirilir ki, 18 yaşa çatmamış uşaqların ölkədən getməsi, yaxud da ölkəyə gəlmələri yalnız və yalnız valideyinlərinin razılığı əsasında, yaxud da onların nümayəndələrinə notariat kontorlarında təsdiq edib verdikləri rəsmi sənəd əsasında baş tuta bilər. Əgər valideyinlərdən birinin razılığı olmazsa, o halda problemin həlli üçün yalnız məhkəməyə müraciət olunmalıdır.

Ümumiyyətlə, qanunvericilik onu da təsbit edir ki, həddi-büluğa çatmayan uşaqların valideyinlərdən birinin razılığı olmadan, onların ölkədən aparılmaları, yaxud da ölkəyə gəlmələri istisna hallarda baş tuta bilər. Məsələn, tutaq ki, uşağın səhhətində ciddi problem əmələ gəlib və onun müalicəsi xarici ölkələrdən birində həyata keçirilməlidir. Bu zaman qanunvericilik valideyinlərdən birinin razılığı olmadan, uşaqların ölkədən getməsi, yaxud da ölkəyə gəlmələrinə ixtiyar verir.

Amma bütün bunlara baxmayaraq, Orucov Mahir Mayis oğlu 2004-cü il təvəllüdlü Albina Orucovanın anası Elnurə Çələbiyeva ilə RF-na getməsinə razı olmadıqda, qarşı tərəf Qusar rayon Məhkəməsinə müraciət etmək zorunda qalır və 02 mart 2015-ci il tarixdə əsassız məhkəmə qərarının çıxarılmasına

da nail ola bilir. Belə ki, məhkəmə zamanı iş üçün əhəmiyyət kəsb edən hallar lazımınca araşdırılmır, yəni lazımi faktlara və işə əlavə edilmiş sənədlərə obyektiv hüquqi qiymət verilmir, yalnız iddiaçının şifahi mülahizələrinə əsaslanaraq belə bir qərar çıxarılır.

Təəssüf doğuran hal odur ki, proses zamanı məhkəmə heyyəti guya Mahir Orucovun həmin vaxtadək uşağın mənafeyinə qalmadığını, tərbiyəsində iştirak etmədiyini və.s əsas tutaraq, Orucova Albina Mahir qızının atasının razılığı olmasa belə, anası Çələbiyeva Elnurə Nazir qızı ilə RF-na getməsi məqsədəuyğun hal hesab edir. O, halda sual oluna bilər ki, axı Mahir Orucov həyat yoldaşından məhkəmənin qərarı ilə ayrılsa da, o, uşağın saxlanması və böyüməsi üçün lazım olan alimenti vaxtlı-vaxtında vermiş, tez-tez də onunla da görüşmüşdür. Belə bir halın varlığı onu sübut etməyə əsas vermirmi ki, atası gündəlik Albina Orucovanın yanında olmasa da, onu heç vaxt unutmamışdır. Deməli, məhkəmədə Mahir Orucovla bağlı sadalanan iradların heç bir əsası yoxdur.

Bütün bunlar onu sübut etməyə əsas verir ki, Qusar rayon Məhkəməsində 02 mart 2015-ci il tarixdə hakim Hüseynov Ələkbər Məmmədtağı oğlunun sədrliyi ilə keçirilən məhkəmə prosesində çıxarılmış qərar, hansısa maraqlar çərçivəsində çıxarılmış qərardır. Birinci instansiya məhkəməsinin çıxardığı ədalətsiz qərardan narazı qalan Mahir Orucov, Sumqayıt Apellyasiya Məhkəməsinə apelliyasiya şikayəti ünvanlasa da, o, yenə də haqsızlıqla üz-üzə qalmalı olur. Yəni, hakim Azər Hüseynovun sədrliyi ilə keçirilən məhkəmə prosesində, ikinci instansiya məhkəməsi də, Qusar rayon Məhkəməsinin çıxarmış olduğu ədalətsiz qərarı qüvvədə saxlayır.

Bu gün belə bir ədalətsizliklərlə üz-üzə qalan və çıxarılacaq ədalətli qərarın arzusunda olan Mahir Orucov, üzləşdiyi problemin ictimailəşməsinə çalışır ki, bəlkə nə vaxtsa ədalətə qovuşa bildi.