Binəqədi rayon İcra Hakimiyyətinin başçısı Xaləddin İsgəndərovun rüşvətxorluq və korrupsiya əməlləri ilə bağlı “Gündəm Xəbər”ə daxil olan jurnalist müraciətini olduğu kimi çoxsaylı oxucuların diqqətinə çatdırırıq.
"Əziz həmkarlar, hörmətli millət vəkilləri,dəyərli dostlar! Xahiş edirəm ki, üzləşdiyim problemin həllində mənə köməklik edin! Bu gün ölkə başçısı cənab İlham Əliyev Azərbaycanda məmur özbaşınalığı və korrupsiyaya qarşı ciddi mübarizə aparır. Azərbaycan Respublikası Əmlak Məsələləri Dövlət Komitəsi Yanında Daşınmaz Əmlakın Dövlət Reyestri Xidməti Hüquqların Dövlət qeydiyyatı haqqında daşınmaz əmlakın Dövlət Reyestri tərəfindən verilmiş 31.01.2015-ci tarixli 1115005208 qeydiyyat nömrəli çıxarışla, Daşınmaz Əmlakın Dövlət Reyestri Xidmətinin Bakı Şəhər Ərazi İdarəsi tərəfindən 29.01.2015-ci ildə 001013008894 reyestr nömrəli torpaq sahəsinin planı və ölçüsü (Texniki pasport) ilə ailəmə məxsus, Binəqədi rayonu Goradil kəndindəki torpaq sahəsində kirayə yaşamaqdan canımı qurtarmaq üçün, birmərtəbəli ev tikmək məqsədilə Binəqədi İcra Hakimiyətinə rəsmi qaydada müraciət etdim. Evin lisenziyalı şirkət tərəfindən hazırlanmış 3 nüsxədən ibarət eskiz layihəsini İH-in təsərrüfatı şöbəsinə, baş memar Şahin Musayevə təqdim etdim. Layihədə 5 dəfə xırda dəyişiklik edilməsinin vacibliyini vurğuladılar və məni get-gələ salmağa başladılar. Hər dəfə layihəni dəyişmək mənə maddi zərər bahasına başa gəldi. Nəhayət 5-ci dəfə edilən dəyişiklikdən sonra, heç bir problem olmadığını bildirərək layihəni və rəsmi müraciəti qəbul etdilər. Bir ay keçdikdən sonra ev tikməklə bağlı müraciətimə verilən cavabda qeyd olundu ki, evin dam örtüyü müvafiq qanunvericiliyə uyğun tərtib edilməyib. Məlum oldu ki, baş memar Xaləddin İsgəndərovun göstərişi ilə bu addımı atıb. Çünki, Binəqədi rayonu ərazisində sənədinin olub-olmamasından asılı olmayaraq, ev tikməyin “haqq-hesab”ı 8000-15000 manat arasında dəyişir. Bunu ərazidəki sakinlərin dilindən eşitmişik. Hətta, qonşuluqda olan bir nəfərin evini rüşvət vermədiyi üçün buldozerlə dağıtdılar.Yəni, verilən rüşvət birbaşa Xaləddin isgəndərovun cibinə gedir. Mətbuatda yazılanlara görə, başçı bu işlə bağlı xüsusi dəstə saxlayır. Dəfələrlə icra hakimiyyətinə müraicət etmişəm. Mənə bildirdilər ki, əgər ev tiksən, buldozerlə dağıdılacaq. Onu da bildirdilər ki, Xaləddin İsgəndərov heç kimə güzəşt etmir. Əlbəttə, bütün bu deyilənləri icra başçısı qəbul etməyə bilər. Lakin sual olunur: Hansı səbəbdən layihəyə 5 dəfə dəyişiklik edilməsi məqsədilə vətəndaş süründürməçiliyə məruz qalır? Sonda isə qeyd olunur ki, evin dam örtüyü qanunverciliyə uyğun tərtib edilməyib. Əgər belə bir hal var idisə, nə üçün baş memar layihəyə 5 dəfə baxan zaman iradını bildirməyib. Deməli, ortada başqa məqsədlər var. Hörmətli millət vəkilləri, əziz həmkarlar! İlk olaraq bunula bağlı sizlərə müraciət edirəm. Dövlət başçımız cənab İlham Əliyev hər zaman çıxışlarında icra başçılarına vətəndaşlara xidmət etmək üçün tapşırıqlarını verir. Dəfələrlə sərt şəkildə özbaşınlıq edən, vətəndaşları incidən icra başçılarına, məmurlara xəbərdarlıq edib. Təəssüflər olsun ki, Binəqədi rayon İH-nin başçısı Xaləddin İsgəndərov hələ də öz çirkin əməllərindən əl çəkmək istəmir. Özünün rüşvət piramidasını genişləndirməkdə qərarlıdır. Bütün bu çirkin əməlləri ilə cənab Prezidentin apardığı siyasətə, dövlət maraqlarımıza zərbə vurmaq, icra başçısının təxribatçı niyyətlərindən xəbər verir. Xahiş edirəm həmrəylik göstərib üzləşdiyim problemin ictiamiləşməsində mənə yardımçı olasınız. Hörmətlə, jurnalist Həsən Elbrusoğlu Babayev

gundemxeber.az