Görəsən, “Maral” restoranına “Maral” əxlaqsızlıq yuvası adının verilməsi daha məqsədəuyğun hal olmazmı ki, restoran sözüylə bağlı bütün tərəddüdlər, əksəriyyət tərəfindən aradan qaldırıla bilsin

Suraxanı rayonu ərazisində fəaliyyət göstərən “Maral” restoranının fəaliyyəti ilə məlumatlı olan hər kəs bilir ki, həmin ünvan restoran kimi deyil, birbaşa əxlaqsızlıq ünvanı olaraq fəaliyyət göstərməkdədir. Buna səbəb olan əsas amil odur ki, restoranın hələ inşaası həyata keçirilən zaman, onun sahibi restoranı elə bir cizgilər əsasında inşaa etdirib ki, bu gün də “Maral”a məxsus hər bir otaqda qadınların cinsi istismarını həyata keçirmək mümkündür. Məsələn, ikimərtəbəli və təqribən 20-yə qədər otaqdan ibarət olan “Maral”da, cütlüklər üçün lazım olan hər cür şərait yaradılıb. Yəni, otaqlarda yemək-içmək otağı, televizor, hamam, yataq dəsti və digər avadanlıqlar olduğundan, cütlüklər hər şeydən geninə-boluna istifadə edə bilirlər.

Qeyd olunan ünvana cütlüklərin daha çox üz tutmasının bir səbəbi var ki, “Maral” restoranı Suraxanı rayonunun xəlvəti bir ərazisində fəaliyyət göstərir. Belə bir halın varlığı hər kəsi bəzi dedi-qodudan uzaq olmağa, hətta müəyyən söz-söhbətlərdən kənar qalmalarına da səbəb olur. Tutaq ki, bir kimsə “istirahət etmək” üçün ünvan axtarır və o, çox keçmir ki, “Maral”ı seçmək məcburiyyətində qalır. Buna da səbəb, yuxarıda qeyd etdiyimiz halın varlığıdır.

Təəccüf doğuran hal odur ki, “Maral” restoran adını daşıyır. Axı, bu gün insanların düşüncə tərzində restoran adını daşıyan ünvanlar, yalnız xeyir işləri həyata keçirmək və digər xoşməramlı tədbirləri yola vermək üçün nəzərdə tutulur. Əslində “Maral”a restoran adının verilməsi və həmin ünvanın da hal-hazırda Bakı şəhərində ən “xod” gedən əxlaqsızlıq ünvanlarından biri olaraq fəaliyyət göstərməsi, yəqin ki, hər kəsdə restoran adıyla bağlı müəyyən tərəddüdlərin əmələ gəlməsinə səbəb olur. Görəsən, həmin ünvana “Maral” əxlaqsızlıq yuvası adının verilməsi daha yaxşı hal olmazmı ki, restoran sözüylə bağlı bütün tərəddüdlər aradan qaldırıla bilsin.

Diqqəti bir məqama da yönəldək ki, əksər ünvanlardan fərqli olaraq qeyd olunan ünvanda müştərilərə gün ərzində lazımi səviyyədə xidmət də göstərilir. Yəni, əldə etdiyimiz məlumatlara görə istər yemək-içmək süfrələrinin hazırlanmasında, istər yataq dəstlərinin dəyişdirilməsində, istərsə də digər xidmətlərin göstərilməsində, restoranın hər bir işçisinə rəhbərlik tərəfindən lazımi tapşırıqlar verilir. Adicə kənar bir şəxs restoranın həyətinə daxil olan kimi, restoran əməkdaşları müştəri hüzurunda“sərasər” dayanıb ilk sualını verirlər? “Sizə hansı qiymətə otaq lazımdır?” Bu zaman bəlli olur ki, təqribən 20-yə qədər olan hər bir otağın öz qiyməti var. Diqqəti cəlb edən digər hal da o olur ki, gün

ərzində dövriyyəsi bir neçə min manat olan restoranda, adicə bir ədəd olsun belə kassa aparatı olmadığından, bir kimsəyə qəbz də verilmir. Cütlüklər otaqlara daxil olarkən, onların nigahda olub-olmadıqları yoxlanılmır. Restoranda fəaliyyət göstərən əməkdaşlarla əmək müqaviləsi bağlanmır, bağlansa da formal xarakter daşıyır.

Bir məqama da toxunaq ki, “Maral” restoranında qol qoyulan əməllər barədə, bu günədək əksər KİV silsilə tənqidi məqalələr işıq üzü görüb, problemləri daim qabardılıb. Və bildirilib ki, qeyd olunan ünvanda yaş həddindən asılı olmayaraq qadınlar cinsi istismara məruz qalırlar. Onların belə bir aqibətlə üz-üzə qalmalarına səbəb də, restoran sahibinin yaratmış olduğu şərait əsas gətirilir.

Ümumiyyətlə, bu cür ünvanların fəaliyyət göstərərək qadınların cinsi istismarına şəraitin yaratmaları qanunla qadağan olunsa da, nədənsə nə qanuna, nə də ki, irəli sürülən tələblərə məhəl qoyan bir kimsə tapılmır. Bir sözlə, problemin varlığının qarşısını almağa cavabdehlik daşıyan vəzifə sahibləri, xüsusilə də hüquq-mühafizə orqanı əməkdaşları, baş verənləri görsələr də, hələlik susmağa üstünlük verirlər. Deməli torbada “qara pişik” var ki, ...

“Maral”da yaşanan problemlərin varlığını, daim diqqət mərkəzində saxlayacağıq.

Mirzə