Dələduzluqda təqsirli bilinən məhkum işinə baxan hakimləri ittiham etdi

Şirvan Apelyasiya Məhkəməsində dələduzluqda təqsirli bilinən Ağcabədi şəhər sakini, 1985-ci il təvəllüdlü Vasif Əliyevin cinayət işi üzrə məhkəmə prosesi başa çatıb.

İttihama görə, Vasif Əliyev əvvəllər talama cinayəti törətdiyi üçün, Ağır Cinayətlərə Dair İşlər Üzrə Məhkəmənin 05 dekabr 2003-cü il tarixli hökmü ilə, CM-nin 181.2.2 və 181.2.5-ci (quldurluq) maddələri ilə təqsirli bilinib və 9 il müddətə azadlıqdan mərhumetmə cəzasına məhkum olunub. 9 ildən sonra azadlığa çıxan Vasif Əliyev iş tapa bilmədiyi üçün, yenidən dələduzluq etməyə başlayıb. O, dələduzluq etdiyi üçün Zərdab rayon Məhkəməsinin 13 iyun 2013-cü il tarixli hökmü ilə, yenidən 1 il 6 ay müddətə azadlıqdan mərhumetmə cəzasına məhkum olunsa da, Şirvan Apelyasiya Məhkəməsinin 26 sentyabr 2013-cü il tarixli qərarı ilə cəzası 6 aya endirilir.

Satıcıya qarşı dələduzluq

Vasif Əliyev cəzaçəkmə müəssisəsindən 03 oktyabr 2013-cü il tarixdə cəzasının başa vuraraq azadlığa çıxır və çox keçmir ki, yenidən dələduzluq əməlləri törətməyə başlayır. O, 2013-cü ilin noyabr ayının ortalarında Ağcabədi rayonunun Hindarx qəsəbəsində yerləşən yanacaqdoldurma məntəqəsinə gedərək, orada satıcı işləyən Tural Süleymanova qarşı dələduzluq törədir. Və həmin vaxt Turala şəxsiyyət vəsiqəsini verərək, onun etimadını qazanır .Vasif xəstə uşağını həkimə aparacağı adı ilə onu aldadıb və bir saat müddətinə qaytaracağını vəd etməklə Turaldan 35 manat pul alır. Bir neçə dəqiqədən sonra yenidən Tural Süleymanovun yanına qayıdan Vasif Əliyev, ona bir ədəd “Bluetooth D1530 FM” markalı istifadəyə yararsız mobil telefon aparatı verir və pasportunu geri alır.

Vasif Əliyev 28 dekabr 2013-cü il tarixdə gecə saat 21 radələrində Ağcabədi şəhəri, Ü.Hacıbəyli prospekt-217 ünvanında yerləşən və əvvəllər tanımadığı İbadət Abdullayevin ət mağazasına gedir və özünü ona Ağcabədi şəhərində yerləşən “Ayılar” adlı yeməkxananın işçisi kimi təqdim edətrək, onu aldad bilir.

Qəssabın 200 manatını ələ keçirir

O, şəxsiyyət vəsiqəsini Abdullayevə təqdim edərək, aldığı ətin pulunu ödədikdən sonra onu geri götürəcəyini bildirir. Vasif İbadət Abdullayevin etibarından sui-istifadə etməklə, hətta onun 50 manat dəyərində 5,8 kiloqram quzu ətini də ələ keçirə bilir.

Daha sonra həmin gün saat 24 radələrində yenidən İbadət Abdullayevin ət mağazasına qayıdı və işlədiyi yeməkxanaya ərzaq alacağı adı ilə onu təkrar aldada bilir. Hətta ondan 50 manat pul da ala bilir.

Vasif Əliyev həmin ilin 29 dekabrında, saat 10 radələrində yenidən İbadət Abdullayevə məxsus mağazaya gəlir və mağaza sahibini restorana ərzaq alacağı adı ilə aldadaraq, ondan da 70 manat pul alır.. Vasif həmin gün saat 17 radələrində yenidən İbadət Abdullayevin mağazasına qayıdır və taksi sürücüsünə pul verəcəyi adı ilə onu yenidən aldadıb 30 manatını ala bilir. İbadətə verdiyi pasportu Bakı şəhərindən “Kapital Bank”ın Ağcabədi filialına, guya onun adına göndərilmiş pul vəsaitini götürərək aldığı pulları ona qaytaracağı adı ilə aldadır və pasportunu almağa çalışır. Bununla da o, İbadət Abdullayevə üst-üstə 200 manat ziyan vurur.

8 il cəza

Vasif Əliyev Cinayət Məcəlləsinin 178.3.3-cü (təkrar dələduzluq törətmək) maddəsi ilə təqsirli bilinir və Lənkəran Ağır Cinayətlər Məhkəməsinin hökmü ilə 8 il müddətinə azadlıqdan məhrum edilir. Hökmdən narazı qalan Vasif Əliyev apelyasiya şikayəti verərək, barəsində bəraət hökmünün çıxarılmasını istəyir.

“Dəri alveri edənin Bakirin xalası oğlu olduğunu bildirdim”

Hakim Amil Dosiyevin sədrliyi ilə keçirilən prosesdə ifadə verən Vasif Əliyev elan olunmuş ittiham üzrə özünü təqsirli bilməyib. O, bildirib ki, Ağcabədi şəhərində himayəsində işləməyən həyat yoldaşı və bir azyaşlı uşağı ilə birgə yaşayıb: “Əvvəllər iki dəfə məhkum olunmuşam, heç bir yerdə işləməmişəm. Zərərçəkmiş şəxslər - İbadət Abdullayevi və Tural Süleymanovu hadisəyə kimi tanımamışam, onlarla heç bir münasibəti olmayıb. 2013-cü ilin dekabr ayının 28-də qohumum Asəfin idarə etdiyi “VAZ 2106” markalı avtomobillə Ağcabədi şəhəri, H.Əliyev adına parkın yaxınlığında yerləşən çay evinə gedərkən, yolun sağ kənarında ət dükanının açıq olduğunu gördüm. Həmin vaxt avtomobildən düşüb ət dükanına girdim. Əvvəllər tanımadığım ət satan qəssab İbadətə 5-6 kiloqram ət lazım olduğunu, lakin ət almağa pulum olmadığını dedim. İbadət kimlərin qohumu olduğumu soruşdu. Ona dəri alveri edən Bakirin xalası oğlu olduğunu bildirdim. İbadət Bakiri yaxşı tanıdığını, Bakirdən daima dəri almasını dedi. Cibimdə olan özümə məxsus pasportu İbadətə verərək etibar üçün pasportunu saxlamasını, aldığım ətin pulunu səhəri gün verəndə pasportunu geri alacağımı dedim. Ondan bir kiloqramı 9 manata olmaqla ümumi dəyəri 50 manatlıq 6 kiloqram ət aldım. Geri qayıdarkən bazarın yanındakı ərzaq mağazasına girdim və aldığım ətin kiloqramını 7 manata mağazada işləyən qadına satdım”.

“Borcu qaytara bilməmişəm”

Təqsirləndirilən şəxsin sözlərinə görə, həmin gün yenidən saat 24 radələrində ət mağazasına gəlir: “Mağazanın bağlı olduğunu gördüm və İbadətin evinə gedərək 50 manat pul lazım olduğunu ona bildirdim. Səhəri qaytarmaq şərti ilə ondan 50 manat istədim. İbadət problem olmadığını deyərək mənə 50 manat pul verdi. İki gün ərzində İbadətdən aldığım ətin pulu ilə birlikdə ondan 200 manat borc almışam, qaytaracağıma söz versəm də, imkanı olmadığından borcumu qaytara bilməmişəm”.

O, qeyd edir ki, Tural Süleymanova özünə məxsus pasportu, eləcə də mobil telefon aparatı verməyib və Turaldan 35 manat məbləğində pul almayıb: “Mobil telefonu Turala həmin vaxt mənim yanımda olan Rəhman adlı şəxs verib. İbadət Abdullayevdən aldığım 200 manatı dələduzluq etməklə ələ keçirməmişəm, yalnız ondan borc kimi almışam. Hazırda əməlimdən peşmançılıq hissi keçirirəm. Himayəmdə heç bir yerdə işləməyən həyat yoldaşımın və bir azyaşlı uşağımı olmasını, əldə etdiyim pulu dələduzluq etməklə deyil, borc kimi almağımı və maddi ziyanın ödənildiyini nəzərə alınmasını xahiş edirəm”.

“Məhkəmə mötəbər sübuta söykənməyib”

O, deyib ki, birinci instansiya məhkəməsinin hökmü heç bir mötəbər sübuta söykənmədən barəsində hökm çıxarıb. Vasif Əliyev qeyd edib ki, ibtidadi istintaq orqanı və birinci instansiya məhkəməsi, onun əvvəllər başqa maddə ilə məhkum edildiyinə əsaslanaraq əməlini düzgün müəyyən etməyib və Cinayət Məcəlləsinin 178.3.3-cü maddəsi ilə tövsif edib. O, şikayətində birinci məhkəmə instansiyasının hökmünün ləğv edilməsini və barəsində bəraət hökmünün çıxarılmasını xahiş edib.

“Xəstə uşağına dərman almaq üçün 35 manat aldı”

Zərərçəkmiş Tural Süleymanovun sözlərinə görə, Ağcabədi rayonunun Hindarx qəsəbəsində yerləşən “Petrol” adlı yanacaqdoldurma məntəqəsində operator işləyir. O, qeyd edib ki, Vasif Əliyevi əvvəllər tanımayıb, onunla heç bir münasibəti olmayıb: “2013-cü ilin noyabr ayının ortalarında, axşam saat 20 radələrində iş yoldaşım Natiq Məmmədovla işdə olarkən, əvvəllər tanımadığım bir oğlan yanacaqdoldurma məntəqəsinə gələrək, iki saatdan sonra aldığı pulu qaytarmaq şərti ilə 35 manat istədi. O, öz xarici pasportunu mənə verdi və xəstə uşağına dərman almaq üçün 35 manat pul aldı. Təxminən 5-6 dəqiqədən sonra həmin şəxs qayıdaraq mənə “Bluetooth D 5130” markalı Çin istehsalı olan mobil telefon aparatı verdi və pasportunu götürdü. İki saatdan sonra aldığı 35 manat pulu qaytaracağını dedi. Ancaq həmin şəxs bir daha

qayıtmadı. Təxminən 2-3 gün sonra Vasifin gəlmədiyini görərək ona verdiyim telefonu açmaq istədim, lakin telefon açılmadı. Telefonun nömrə yerinə baxdım, telefonun üstündə nömrənin olmadığını, nömrə yerinin isə xarab olduğunu gördüm. Həmçinin telefonun heç bir düyməsi işləmirdi. Vasifin harada yaşamasını bilmədiyimə görə, əvvəlcə polisə şikayət etmədim. Sonradan həmin şəxsin Vasif olduğumu bildiyim üçün polisə şikayət etdim. O, məndən aldığı pul geri qaytarmayıb. Həmin pul yanacaqdoldurma məntəqəsinin pulu olduğu üçün, sonradan əmək haqqımdan tutulub”.

Tural Süleymanov şikayətçi olmadığını deyərək, Vasif Əliyevin apelyasiya şikayətinin təmin edilməsini, ona daha yüngül cəzanın təyin edilməsini xahiş edib. Dövlət ittihamçısı Səyavuş Sadıqov deyib ki, Vasif Əliyev Cinayət Məcəlləsinin 178.3.3-cü maddəsi ilə məhkum olunması barədə, Lənkəran Ağır Cinayətlər Məhkəməsinin hökmündən verdiyi apelyasiya şikayəti əsassızdır. Prokuror törədilmiş cinayət hadisəsinin iş materialları ilə tam sübuta yetirildiyini və birinci instansiya məhkəməsi tərəfindən qanuni, ədalətli və əsaslı hökmün çıxarıldığını bildirib. O, apelyasiya şikayətinin təmin edilməməsini istəyib. Tərəfləri dinləyən hakim heyəti apelyasiya şikayətinin təmin edilməməsi barədə qərar elan edib.