Təqsirləndirilən şəxs: “Ayaqlarımı dəmirə bağlayaraq məni döyürdülər”

Bakı Ağır Cinayətlər məhkəməsində əvvəllər 4 dəfə məhkum olunan və azadlığa çıxandan sonra oğurluq hadisəsi törətməkdə təqsirli bilinən Eldəniz Vəliyevin cinayət işi üzrə məhkəmə prosesi başlayıb.

Hakim Azad Məcidovun sədrliyi ilə keçirilən prosesdə prokuror ittiham aktını elan edib. İttihama görə, Bakı şəhər sakini, əvvəllər məhkum olunmuş Eldəniz Vəliyev ötən ilin martın 21-də Fəxrəddin Bağırova məxsus dəmir sexindən 1 ton mis oğurlayıb. O, Sabunçu rayon Polis İdarəsinin 13-cü polis bölməsinin əməkdaşları tərəfindən həbs edilib.

Məhkəmədə ifadə verən Eldəniz Vəliyev elan olunmuş ittiham üzrə özünü təqsirli bilməyib. O, qeyd edib ki, 13-cü polis bölməsində dəhşətli işgəncəyə məruz qalıb. Onun sözlərinə görə, qanunsuz yerə həbs edilməsi ilə bağlı müvafiq qurumlara müraciət etsə də, bu günə kimi ona cavab verilməyib. O, qeyd edib ki, martın 18-də 13-cü polis bölməsinə gətirilib: “Məni üç gün polis bölməsində saxladılar. Orada

Sadiq, Kamran adlı polis əməkdaşları mənə dəhşətli işgəncələr verdilər. Martın 21-də 13-cü polis bölməsindən qaçdım və Respublika Xəstəxanasına gəldim. İşgəncələr nəticəsində aldığım xəsarətdən orada müalicə aldım. Həkimlərə gözümə toz dolduğu üçün binadan yaxıldığımı bildirdim. Əgər polisdən qaçdığını desəydim məni həbs edəcəkdilər”.

O, bildirib ki, heç bir oğurluq hadisəsi törətməyib: “Düzdü, mənim həyətimdə dəmir, mis saxlanılıb. Onları Ramin adlı tanışım gətirib. Onların oğurluq olduğunu bilməmişəm. Həmin dəmir məmulatlar həyətimdə qaldığı üçün, Ramin mənə hər gün üçün 10 manat verib. Bundan başqa heç nədən xəbərim olmayıb”.

Eldəniz Vəliyevin sözlərinə görə, martın 26-na kimi Bakı şəhərində müxtəlif yerlərdə gizlənib. O, qeyd edib ki, həmin günü başqa bir nəfərdən telefon taparaq ailəsi ilə danışıb: “Yoldaşımla danışandan sonra həmin telefona zəng gəldi. Telefon sahibi dedi ki, zəng edən səni soruşur. Zəngə cavab verəndə həmin şəxsin 13-cü polis bölməsinin rəis müavini Tərxan müəllim idi. Tərxan müəllim dedi ki, harada olduğunu bilirik, gəl, təslim ol. Ona dedim ki, təslim olacam. Martın 28-də evdə olanda Tərxan müəllimə zəng etdim və evdə olduğumu bildirdim. Bir qədər keçəndən sonra polislər gəldilər və həmin vaxt Tərxan müəllimin özü də gəlmişdi. Ehtiyat üçün özümdə butulkada benzin götürmüşdüm, qanunsuz hərəkət ediləcəyi halda özümü yandıracaqdım. Tərxan müəllimə dedim ki, Sabunçu rayon Polis İdarəsinə məni aparın. Bilirdim ki, orada kamera çəkir, bu qədər də haqsızlıq olmaz. Amma Tərxan müəllim məni 13-cü polis bölməsinə gətirdi, maşından düşmədim, məni baş idarəyə aparmalarını tələb etdim. Bundan sonra məni baş idarəyə apardılar və iki gün saxladıqdan sonra hadisə yerinə apardılar. Orada mənə işgəncə altında ifadə verməyə məcbur etdilər. Ayaqlarımı dəmirə bağlayırdılar, sonra da mənə ifadə verməyə məcbur edirdilər. Mən də insanam, məcbur olaraq onların dedikləri ilə razılaşdım”.

Məhkəmə iclası iyulun 2-də davam etdiriləcək.