Rayonun M.Müşfiq küçəsi ev-66 ünvanında yaşayan, gözündən və ayaqlarından əlil olan 70 yaşlı qocanı, bələdiyyə sədri ilə bərabər, digər vəzifə sahibləri də gözümçıxdıya salıblar

Ötən saylarımızın birində Beyləqanın sosial-iqtisadi həyatında baş verənlərdən, xüsusilə rayonun mərkəzi yollarının bərbad olmasından, sosial problemlərin aşıb-daşmasından, sadə vətəndaşlara qənim kəsilən vəzifə sahiblərinin hikkələrindən və.s bəhs etmişdik. Düzdür, ilk əvvəl inana bilməzdik ki, məqalənin dərcindən sonra çoxsaylı oxucular, sosial problemlər məngənəsində boğulan əksər beyləqanlılar bizimlə əlaqə saxlayıb, üz-üzə qaldıqları problemlərin varlığını redaksiyamıza çatdıracaqlar. Nə emək olar? Görünür sadə beyləqanlılar nə qədər zinhara gəliblər ki, mətbuata üz tuturlar, dərdlərini bölüşməyə sanki bir ünvan axtarırlar.

Belə sakinlərdən biri də, rayonun M.Müşfiq küçəsi ev-66 ünvanında yaşayan Abdullayev Balaoğlan Nuruş oğludur. O, redaksiyamıza ünvanladığı şikayət ərizəsində bildirir ki, “mənim 70 yaşım var, gözümdən və ayaqlarımdan əlil olmaqla bərabər, həm şəkər, həm də əsəb xəstəsiyəm. 1960-cı ildən yuxarıda qeyd olunan ünvanda ailə üzvlərimlə birlikdə yaşayıram. Səhhətimdə əmələ gələn problemlərdən istifadə edən rayon bələdiyyəsinin sədri Bakir Balakişiyev və DTXÇK Beyləqan rayon şöbəsinin sabiq müdiri Rəfayel Pəsiyev, vaxtilə ailə üzvlərimizə verilmiş həyətyanı torpaq sahəsinin tən yarısını, 2014-cü ildə başqa bir şəxsdən 5 min manat pul almaqla ona satmışlar. Hər iki vəzifə sahibinin heç bir əndazəyə sığmayan əməllərindən, dəfələrlə Beyləqan rayon İcra Hakimiyyətinin başçısına şikayətlər ünvanlasam da, qarşı tərəfdən nə bir səs çıxdı, nə də ki, bir soraq eşidildi. Son anda rayon prokurorluğuna, polis şöbəsinə, rayon bələdiyyəsinin və sabiq torpaq şöbəsi müdirinin özünə yazılı müraciətlər ünvanlasam da, heç bir qurumdan cavab belə vermədilər. Belə bir halın varlığı bir daha onu sübut etməyə əsas verir ki, Beyləqanda qanun işləmir, yerli padşahlar qanunun funksiyasını lazımınca yerinə yetirirlər. Yəni, əksər qurumların fəaliyyəti fəaliyyətsizliyə söykəndiyindən, onların işi yalnız saxta sənədlərə möhür vurmaqdan ibarət olur”.

Bir faktı da qeyd edək ki, bələdiyyələr haqqında qəbul olunmuş qanuna edilmiş dəyişikliklərə əsasən, 2007-ci ilin oktyabr ayından bələdiyyə torpaqları hərrac yolu ilə vətəndaşlara verilə bilər. Qanunun belə bir tələbinin olmasına baxmayaraq, nə bələdiyyə sədri, nə də ki, DTXÇK Beyləqan rayon şöbəsinin sabiq müdiri hərrac keçirilmədən, Baloğlan Abdullayevin ailəsinə məxsus həyətyanı torpaq sahəsinin tən yarısını, başqa bir şəxsə satırlar.

Diqqəti cəlb edən hal odur ki, DTXÇK Beyləqan rayon şöbəsinin sabiq müdiri Rəfayel Pəsiyev, elə ki, qol qoyduğu qanunsuzluqlarla ittiham olunur, bu zaman o bildirir ki, “mən YAP Beyləqan rayon təşkilatının sədriyəm və elə bu səbəbdən də,

nə istəsəm onu da edərəm. Kim məni daşıdığım vəzifəmdən uzaqlaşdıra bilər?” deyir.

Çox maraqlı cavab, diqqəti cəlb edən açıqlamadır. Necə bəyəm! Görəsən, qanun YAP-nın yerli təşkilatına rəhbərlik edən şəxsə müstəsna səlahiyyət verirmi ki, R.Pəsiyev belə bir iddialarla çıxış edir? Axı, 08 avqust 2014-cü il tarixdə Beyləqan şəhəri üzrə Ərazi Nümayəndəsinin imzası ilə təsdiq olunaraq verilmiş arayışda bildirilir ki, Dövlət Torpaq Kadastrı kitabında A-295980 nömrə ilə uçota alınmış torpaq sahəsi (0,06 hektar) Abdullayev Baloğlan Nuruş oğluna məxsusdur. Bu belə olduğu halda, hər iki vəzifə sahibinin atdıqları addıma nə ad vermək olar?

Maraq kəsb edən hal isə, rayon rəhbərliyinin susqunluğudur. Bu da onu söyləməyə əsas verir ki, icra hakimiyyətinin başçısı digər vəzifə sahibləri ilə əlbir olaraq, sadə vətəndaşları minbir hoqqalara, sağalmaz dərdə düçar edirlər.

Hörmətli oxucular! Ümumiyyətlə, Beyləqan rayonunda yaşanan sosial problemlərin varlığını daim diqqət mərkəzində saxlayacağıq. Odur ki, bizimlə də əməkdaşlıq etməyə çalışın.

Qarşı tərəfi də dinləməyə hazırıq.

Mirzə

Beyləqan rayon sakini ölkə rəhbərindən kömək istəyir

Kamal Cəfərovun üz-üzə qaldığı problemə səbəb, 03 iyul 2012-ci il tarixdə rayon rəhbərliyi tərəfindən imzalanmış 77 saylı sərəncamın varlığı bildirilir

Son aylar Beyləqandan redaksiyamızın poçtuna daxil olan şikayətlərin ardı-arası kəsilmir. Buna səbəb o olur ki, rayonda idarəetməni həyata keçirən vəzifə sahibləri, o qədər də imkanı olmayan sadə vətəndaşların çoxunu müxtəlif yollarla gözümçıxdıya salırlar, onları minbir müsibətlərə düçar edirlər. Nəticədə o hal baş verir ki, sadə vətəndaşlar üzləşdikləri problemlərin həlli naminə məhkəmələrə üz tutmaq məcburiyyətində qalırlar. Çox təəssüflər olsun ki, yerlərdəki məhkəmələr sanki icra hakimiyyətlərinin bir qolu olaraq qanunları deyil, verilmiş şifahi tapşırıqları əsas tutub ədalətsiz qərarlar çıxarırlar. Daha ədalətsiz hal isə o olur ki, çıxarılmış ədalətsiz qərarlardan yuxarı instansiya məhkəmələrinə ünvanlanan təkrar şikayətlər də, əksər hallarda qüvvədə saxlanılır. Belə olan təqdirdə sadə vətəndaşların dövlət orqanlarından bəzilərinə inamsızlığı artır və onlar məcbur olurlar ki, üzləşdikləri problemlərin həlli naminə ölkə rəhbərinə müraciətlərini ünvanlasınlar. Nə qədər acı olsa da, sadalanan amillər bu gün cəmiyyətimizdə yaşanan ab-havanın görünən tərəfidir.

Bir-iki gün bundan əvvəl, redaksiyamıza ürəkyanğısı ilə şikayət ərizəsini ünvanlayan Beyləqan şəhəri H.Cavid küçəsi ev-1 ünvanında yaşayan Səfərov Kamal Hüseyn oğlu da, belə sakinlərdən biridir. O, yazdığı şikayət ərizəsində başına gətirilən müsibətləri bizimlə belə bölüşür ki, “29 aprel 1994-cü il tarixdə Beyləqan rayon Xalq Deputatları Sovetinin 15 nömrəli qərarı ilə, Beyləqan Kəbirli asfalt yolu ilə yeni çəkilmiş Orconokidze kanalı arasındakı boş torpaq sahəsindən 1.42 ha torpaq sahəsi, şəxsi istifadəm üçün mənə verilmişdi. Ötən illər ərzində həmin torpaq sahəsinə ailəmizlə birlikdə sərmayə qoyduq və orada müxtəlif uzunömürlü xan çinarı, digər ağac növləri əkib becərərək, qeyd olunan torpaq sahəsini 20 il müddətinə mühafizə də etdik. Və torpaqdan istifadəyə görə, müəyyən olunmuş dövlət rüsumunu da ödədik. Onu da qeyd edim ki, bizə ayrılmış 1.42 ha torpaq sahəsinin xəritəsi, plan-ölçüsü çəkilmiş, həmin sahənin bizə verilməsi barədə XDS-nin memarlıq şöbəsinin rəyi də verilmişdir.

Elə ki, 2001-ci ildə Beyləqanda bələdiyyələr fəaliyyət göstərməyə başladılar, çox keçmədi ki, 27 iyul 2001-ci il tarixdə Beyləqan şəhər bələdiyyəsinin keçirilən iclasının 2 saylı qərarı ilə, istifadəmdə olan torpaq sahəsindən 30kv.m torpaq sahəsi, xırda ticarətlə məşğul olmaq üçün Cəfərov Famil Ramazan oğlu adlı şəxsə verildi. Bu zaman lazım olan sənədləri bələdiyyə rəhbərliyinə təqdim etdim, çox keçmədi ki, həmin qurum vermiş olduğu sərəncamı ləğv etdi və tərəf olaraq mənimlə müqavilə bağladı. 2013-cü ilə qədər bələdiyyənin büdcəsinə rüsum da ödədik.

Bütün bunlara baxmayaraq Beyləqana yeni təyin edilmiş icra başçısı Vaqif Abdullayev, 20 il müddətinə istifadəmdə olan 1.42 ha torpaq sahəsindən 0.7 ha torpaq sahəsinin qanunsuz olaraq Əsədov Xaqani Əsgərxan oğluna verilməsi barədə, 03 iyul 2012-ci il tarixdə 77 saylı sərəncamını imzalayır. Diqqəti cəlb edən hal odur ki, icarəyə götürülmüş torpaq sahəsində əsaslı tikinti işlərinin aparılması qanunla qadağan olunduğu halda, Vaqf Abdullayev imzaladığı 77 saylı sərəncamla qeyd olunan torpaq sahəsində, əsaslı tikinti işlərinin aparılmasına dair bilərəkdən icazə verir. Belə bir halın varlığı da, çox ciddi qanun pozuntusunun varlığını ortaya çıxarır”.

Şikayətçi onu da qeyd edir ki, “mən 2012-ci ildə üzləşdiyim haqsızlıqlarla bağlı rayon rəhbərliyinə, rayon polis şöbəsinə, DTXÇK Beyləqan rayon şöbəsinin sabiq rəhbəri R.Pəsiyevə, DƏDRX Beyləqan Regional Şöbəsinin rəhbərliyinə, ETSN 7 saylı İmişli Regional Şöbəsinin müdirinə və digər aidiyyəti qurumlara dəfələrlə müraciətlər etsəm də, çox təəssüflər olsun ki, heç bir qurum rəhbərindən doğru-dürüst cavab əldə edə bilmədim. Üzləşdiyim ədalətsizlikdən, haqsızlıqdan zinhara gəldiyim üçün son anda məcbur olub, problemimin həlli ilə bağlı Beyləqan rayon Məhkəməsinə, Şirvan İnzibati-İqtisad Məhkəməsinə, 19 avqust 2013-cü il tarixdə isə, Şirvan Apellyasiya Məhkəməsinin İnzibati-İqtisadi Kollegiyasına müraciətlər etdim. Təəssüf doğuran hal o oldu ki, qeyd olunan məhkəmələrdə qanunun aliliyi deyil, vəzifəli şəxslərin mövqeyi müdafiə olundu və qanunsuz verilmiş sərəncama haqq qazandırıldı.

Hələ bunlar azmış kimi, ölkə rəhbərinin tapşırığı əsasında nazirlərin, komitə sədrlərinin və digər yüksək çinli vəzifə sahiblərinin bölgələrdə vətəndaşlarla görüşləri keçirilərkən, yazmış olduğum şikayət ərizələrimi onlara da təqdim etdim. Məsələn, 13 sentyabr 2013-cü il tarixdə Ağcabədidə Baş Prokuror Zakir Qaralova,

27 sentyabr 2013-cü il tarixdə Fövqəladə Hallar Naziri Kəmaləddin Heydərova, 26 dekabr 2013-cü il tarixdə İmişlidə Ədliyyə Naziri Fikrət Məmmədova çatdırdım. Bütün bunlara baxmayaraq, 17 noyabr 2014-cü il tarixdə Azərbaycan Respublikası Ali Məhkəməsinin hakimi Kəmaləddin Bədəlovun sədrliyi ilə keçirilən məhkəmə prosesində, 20 il müddətinə əziyyət çəkib mühafizə etdiyim, min ədəddən çox müxtəlif növ ağac əkib-becərdiyim torpaq sahəsinin, 0.70 ha sahəsinin Xaqani Əsgərova verilməsi barədə ədalətsiz qərar çıxarıldı. Çıxarılmış qərarla bağlı 16 yanvar 2015-ci il tarixdə Azərbaycan Respublikası Ali Məhkəməsinin Pleniumuna iddia da qaldırmışam”.

Belə bir haqsızlığın baş alıb getdiyi Beyləqan rayonunda Kamal Cəfərovun üz-üzə qaldığı problemə səbəb, 03 iyul 2012-ci il tarixdə rayon rəhbərliyi tərəfindən imzalanmış 77 saylı sərəncamın varlığı bildirilir. Bugünədək heç bir dövlət qurumundan, heç bir məhkəmə instansiyasından və digər yüksək çinli vəzifə sahiblərindən ədalətli yanaşmanın varlığını görməyən şikayətçi, artıq ölkə rəhbərinə müraciət etmək məcburiyyətində qalıb. Kamal Cəfərov ümid edir ki, ölkə rəhbəri cənab İlham Əliyevin, onun üz-üzə qaldığı problemin həllinə maneə olan vəzifə sahiblərinə barmaq silkələməsi, qısa zaman kəsiyində üzləşdiyi problemin həlli nəticələnəcək.

Hörmətli oxucular! Beyləqanda yaşanan sosial problemlərin varlığından, növbəti sayımızda da bəhs edəcəyik. Odur ki, bizi izləməyi unutmayın.