Son vaxtlar Bakının Binəqədi Rayon İcra Hakimiyyətinin başçısı Xaləddin İsgəndərov haqda məqalələr böyük rezonans doğurur. Buna səbəb onun qanunsuz fəaliyyəti,rayonda rüşvətxorluğun baş alıb getməsidir.

Mətbuatda Binəqədi Rayon İcra Hakimiyyətinin başçısı Xaləddin İsgəndərovun xərac yığması haqqında yazılar dərc olunur. Bu yazılarda iddia olunur ki, Binəqədi rayonunun icra başçısı özündən qabaqkı icra başçılarının dövründə satılan torpaqların təftişinə göstəriş verib. Və artıq neçə vaxtdır həmin torpaqlarda məskunlaşan sakinlər və iş adamları üçün ciddi problemlər yaranıb. Torpaqlar öz sahiblərinə yenidən satılır, bununla yanaşı, yeni ev və ya obyekt tikməyə başlayanlardan xərac toplanır.

Bu barədə yuxarı instansiyalara saysız-hesabsız şikayətlər edilsə də, icra başçısı “xərac” yığımından nəinki əl çəkmir, əksinə, getdikcə “xəracların” səviyyəsi artır. Binəqədi rayon ərazisində istənilən tikinti işini görmək üçün konkret “məzənnə” müəyyənləşib. Təkcə hasarın çəkilməsi üçün 2000 manat pul tələb olunur. Evlərin tikilməsi üçün isə qiymətlər əraziyə uyğun olaraq dəyişir. Xocəhəsəndə bu qiymətlər 2000-3500 manat, Biləcəridə 3500-4000 manat, Rəsulzadə qəsəbəsində 5000-10000 manat civarındadır.

Xəbəri verən mənbə iddia edir ki, X.İsgəndərovun “xərac” yığanları hər axşam Sumqayıt yolundakı “Neapol” restoranına yığışaraq başçıya hesabat verirlər. Bəzi məlumatlara görə, “Neapol” da X.İsgəndərovundur.

Onu da vurğulayaq ki, icra hakimiyyətinin başçısı postuna Vergilər Nazirliyindən gətirilən X.İsgəndərov vergilər naziri, son vaxtlar hakim elitanın önəmli simalarından birinə çevrilmiş Fazil Məmmədovun yaxın qohumudur. Binəqədidə “xərac”ların vergilər nazirinin göstərişi ilə yığılması barədə də məlumatlar dolaşır.

Redaksiyamıza şikayət edən sakinlər isə başqa rüşvət faktlarından danışıblar. Adının çəkilməsini istəməyən rayon sakini bidirib ki,

Sulutəpə və Çiçək qəsəbələrində 1 mərtəbənin tikintisi üçün 4500-5000 AZN, 2 mərtəbənin tikintisi üçün isə 8-9 min AZN tələb olunur: “Real faktlar var. Mirpaşa və Rövşən adlı şəxslər Xaləddin İsgəndərovun adından at oynadır”.

Başqa bir şikayətçimiz isə bildiri ki

, Rəsulzadə qəsəbəsində bir evin tikintisi üçün icazə evin bir mərtəbəsi yerindən asılı olaraq 10-20 min manat arasında dəyişir: “Vətəndaşları ciddi narahat edən mövzunu işıqlandırdığınız üçün təşəkkür edirəm. Amma rəqəmlərdə bəzi yanlışlıqlar var. Konkret olaraq Rəsulzadə qəsəbəsində birmərtəbəli ev tikmək üçün 15, ikimərtəbəli ev tikmək üçün 25 min manat rüşvət tələb olunur. Bu cür qaydalar Azərbaycanda ancaq Binəqədi rayonunda var. Vətəndaşların pulu ilə abadlıq işləri görülürsə, bunu niyə icra başçısının adına yazırlar? Camaat 15 min manata ev tikir, bu isə həmin məbləğdə rüşvət tələb edir”.

Rayon sakinləri hesab edir ki, Binəqədi Xaləddin İsgəndərovun sayəsində “ən rüşvətxor” rayona çevrilib: “Biləcəri-Rəsulzadə qəsəbələri arasındakı ərazilərdə birmərtəbəli ev tikmək üçün 8 min manat, ikimərtəbəli ev tikmək üçün 15 min manat rüşvət tələb edirlər. Haradasan ay antikorrupsiya idarəsi. Adını da qoyub ki, hamısı yuxarı gedir. Əhsən belə dövlətə, belə idarəetməyə!”

Son olaraq iki Qarabağ əlilinin Binəqədidə, polis bölməsinin inzibati binası qarşısında intihara cəhd etmələri hakimiyyətin yuxarı instansiyasında səbr kasasını doldurub.

Qeyd etdiymiz kimi, artıq uzun müddətdir mətbuatda Binəqədi İcra hakimiyyətinin başçısı Xaləddin İsgəndərovun rayonda yaratdığı gərgin ab-hava ilə bağlı yazılar dərc olunur. Başçı bir müddət əvvəl mətbuatda gedən yazıların qarşısını almağa nail olsa da, hazırda vəziyyət başqa istiqamətə dəyişib. Qeyd edək ki, yazılanların əksəriyyəti vətəndaşların narazılıqlarını özündə ehtiva edir. Belə ki, əllərində torpaq sənədi olan insanlardan ev tikintisinə icazə

almaq üçün külli miqdarda rüşvət tələb olunur. Vətəndaş məbləği vermədiyi təqdirdə, icra hakimiyyətinin qeyri-rəsmi əməkdaşlarının - mütəşşəkil qoçu dəstəsinin müdaxiləsi ilə üzləşir.

Mətbuatda yer alan məlumatlara əsasən bir çox vətəndaşların tikililəri məhkəmə qərarı olmadan dağıdılaraq onlara külli miqdarda ziyan vurulub. Bütün bunlar narazı vətəndaş kütləsinin yaranmasına və böyüməsinə şərait yaradır. Xatırladaq ki, prezident İlham Əliyev çıxışlarında icra başçılarına, dövlət məmurlarına vətəndaşlara xidmət etmələri, problemlərini çözmələri, onları incitməmələri barədə tapşırıq verməsi haqqında fikirlər səsləndirir. Ancaq bəzi məmurlar ölkə başçısının bu tapşırıqlarını qulaqardına vururlar. Aparılan müşahidələr onu göstərir ki, bu tip məmurların axırı heç də yaxşı sonluqla bitmir. Vergilər naziri Fazil Məmmədovun yaxın qohumu olan Xaləddin İsgəndərov da həmin məmurlar sırasındadır.

Redaksiyamıza daxil olan məlumata görə qohumunun rayonda yaratdığı özbaşınalıq nazirə də başağrısı olub. Məlumata əsasən bu barədə ona xəbərdarlıq edilib.

Həmçinin daxil olan məlumatda göstərilir ki, hazırda Xaləddin İsgəndərovun rayonda yaratdığı vəziyyət qarşısı çətin alına biləcək sosial partlayışa səbəb ola bilər. Belə ki, rayonda narazı vətəndaşların sayı günbəgün artır. Bu isə baş verə biləcək qarşıdurmalar baxımından olduqca təhlükəli tendensiyadır. Bildirilir ki, icra başçısının özünün birbaşa rəhbərlik etdtiyi mütəşşəkil dəstəninin sakinlərdən reket yolu ilə pul toplaması haqqında istər yuxarı dairələrə, istərsə də mətbuata edilən şikayətlərin ardı arası kəsilmir.

Əldə etdiyimiz məlumata görə bir müddət əvvəl iki Qarabağ əlili Binəqədidə, polis bölməsinin inzibati binası qarşısında intihara cəhd ediblər. Soyuq silahla özlərinə xətər yetirən həmin Qarabağ əlillləri xəstəxanada yerləşdiriblər və sonradan səs-küy yaranmasın deyə intihara cəhdin üstü ört-basdır edilib. Əlillər ev tikdiklərinə görə icra başçısının qoçularının onlardan qanunsuz şəkildə pul tələb etmələrinə etiraz ediblər. Həmin əlillərə söz verilib ki, onların problemi

həll olunacaq. Yəni ev tikmək üçün onlardan qanunsuz pul tələb olunmayacaq.

Redaksiyamızın etibarlı mənbələrdən əldə etdiyi məlumatlara görə, yaxın günlərdə Xaləddin İsgəndərovla bağlı konkret qərar verilə bilər. Belə ki, artıq Hesablama Palatasının Binəqədi İcra Hakimiyyətini yoxlayacağı bildirilir. Eyni zamanda X.İsgəndərov haqqında mətbuatda gedən yazılardan ibarət dosye aidiyayatı qurumlar tərəfindən araşdırılmağa başlanılıb. Artıq ortada konkret faktların olduğu və Xaləddin İcgəndərov üçün heç də ürəkaçan olmayan qərarın veriləcəyi qeyd olunur. Sadəcə olaraq, Avropa Oyunlarının yekunlaşması gözlənilir.

Qeyd edək ki, bir çox mətbu orqanlarda Xaləddin İsgəndərov haqqında ilginc məlumatların dərc olunmasına start verilib. Bu isə yuxarıda qeyd etdiklərimizin real olduğuna bir işarədir.

Bu günlərdə isə jurnalist Həsən Babayev Binəqədi rayon icra hakimiyyətinin başçısı Xaləddin İsgəndərovun özbaşınalığı ilə bağlı müraciət yayıb.

Həmin müraciətdə deylir:

“Əziz jurnalist həmkarlar, hörmətli millət vəkilləri,dəyərli dostlarım!

Xahiş edirəm kömək edin!

Bu gün ölkə başçısı cənab prezident İlham Əliyev Azərbaycanda məmur özbaşınalığı və korrupsiyaya qarşı sərt mübarizə elan edib.

Azərbaycan Respublikası Əmlak Məsələləri Dövlət Komitəsi Yanında Daşınmaz Əmlakın Dövlət Reyestri Xidməti Hüquqların Dövlət qeydiyyatı haqqında daşınmaz əmlakın Dövlət Reyestri tərəfindən verilmiş 31.01.2015-ci tarixli 1115005208 qeydiyyat nömrəli Çıxarışla, Daşınmaz Əmlakın Dövlət Reyestri Xidmətinin Bakı Şəhər Ərazi İdarəsi tərəfindən 29.01.2015-ci ildə 001013008894 Reyestr nömrəli Torpaq sahəsinin planı və ölçüsü (Texniki pasport) ilə ailəmə məxsus olan Binəqədi rayonu Goradil kəndindəki torpaq sahəsində kirayə yaşamaqdan canımı qurtarmaq üçün birmərtəbəli ev tikmək məqsədilə Binəqədi İcra Hakimiyətinə rəsmi olaraq müraciət etdim. Evin lisenziyalı şirkət tərəfindən hazırlanmış 3 nüsxədən ibarət eskiz layihəsini İH-nin Rayon Təsərrüfatı şöbəsinə, baş memar Şahin Musayevə təqdim etdim. 5 dəfə ayrı-ayrılıqda layihədə xirda dəyişiklik edilməsinin vacibliyini vurğulayaraq məni get-gələ saldı. Hər dəfə layihəni

dəyişmək mənə maddi zərər bahasına başa gəlirdi. Nəhayət 5-ci dəfə dəyişiklikdən sonra heç bir problem olmadığını deyərək layihəni və rəsmi müraciəti qəbul etdi. Bir ay keçdikdən sonra ev tikməklə bağlı müraciətimə verilən cavabda qeyd olundu ki, evin dam örtüyü müvafiq qanunvericiliyə uyğun tərtib edilməyib.

Məlum oldu ki, baş memar Xaləddin İsgəndərovun göstərişi ilə bu addımı atıb. Çünki Binəqədi rayonu ərazisində sənədinin olub-olmamasından asılı olmayaraq ev tikməyin rüşvəti 8000-15000 manat arasında dəyişir. Bunu da torpaq sahəmiz olan ərazidəki sakinlərin dilindən eşitmişik. Hətta həmin ərazidə bizim qonşuluqda olan bir nəfərin evini rüşvət vermədiyi üçün buldozerlə dağırdıblar.Yəni bu rüşvət birbaşa Xaləddin isgəndərovun cibinə gedir. Mətbuatda yazılanlara görə, başçı bu işlə bağlı xüsusi dəstə saxlayır.

Dəfələrlə icra hakimiyətinə müraicət etdim. Mənə bildirdilər ki, əgər ev tiksən, buldozerlə dağıdılacaq. Onu da bildirdilər ki, Xaləddin İsgəndərov heç kimə güzəşt etmir. Əlbəttə, bütün bu deyilənləri icra başçısı qəbul etməyə bilər. Lakin sual olunur:

Hansı səbəbdən layihəyə 5 dəfə dəyişiklik edilməsi məqsədilə vətəndaş süründürməçiliyə məruz qalır? Sonda isə qeyd olunur ki, evin dam örtüyü qanunverciliyə uyğun

tərtib edilməyib. Əgər belə bir hal var idisə, nə üçün baş memar layihəyə 5dəfə baxan zaman iradını bildirməyib. Deməli, ortada başqa məqsədlər var.

Hörmətli millət vəkilləri, əziz jurnalist həmkarlar!

İlk olaraq bunula bağlı sizlərə müraciət edirəm.

Dövlət başçımız cənab İlham Əliyev hər zaman çıxışlarında icra başçılarına vətəndaşlara xidmət etməkləri üçün tapşırıqlar verir. Dəfələrlə sərt şəkildə özbaşınlıq edən, vətəndaşları incidən icra başçılarına, məmurlara xəbərdarlıq edib.

Təəssüflər olsun ki, Binəqədi Rayon İH-nin başçısı Xaləddin İsgəndərov hələ də öz çirkin əməllərindən əl çəkmək istəmir. Özünün rüşvət piramidasını genişləndirməkdə qərarlıdır. Bütün bu çirkin əməlləri ilə cənab Prezidentin apardığı siyasətə, dövlət maraqlarımıza zərbə vurmaq icra başçısının təxribatçı niyyətlərindən xəbər verir.

Xahiş edirəm həmrəylik göstərib bu məsələnin ictiamiləşməsində mənə yardımçı olasınız”.

O da bildirilir ki, Binəqədi icra başçısı Xaləddin İsgəndərov müavinlərinə və şöbə müdirlərinə “paket” sistemi tətbiq edib. Bu barədə məlumat verən etibarlı mənbə bildirir ki, siyahıdakı şəxslərə rayondakı heç bir maliyyə məsələsinə qarışmamaq haqqından göstəriş verilib.

Son zamanlar Binəqədinin İcra başçısı Xaləddin İsgəndərov haqqında ilginc məlumatlar və ağır ittihamlar mətbuatda yer almaqda davam etməsinə baxmayaraq nə icra başçısı nədə Binəqədi rayon İcra Hakimiyyəti bu ittihamlara susqunluqla cavab verməklə əslində yayılan məlumatları dolayısı ilə təsdiqləmiş olurlar.

Samir