12 mart 2015-ci il tarixdə açılışı həyata keçirilən Heydər Əliyev parkında yaşananlar, bu gün əksəriyyətin müzakirə etdiyi mövzulardan birinə çevrilib. Bəlkə də, kimlərəsə möcüzə gələr ki, niyə Heydər Əliyev parkında yaşananlar müzakirə olunmalıdır? Problemin mahiyyətinə diqqət yetirdikdə isə bəlli olur ki, əslində parkda yaşananların ciddi müzakirəyə ehtiyacı var.

Baş verən olaylar haqda məlumatları redaksiyamıza təqdim edən mənbə bildirir ki, Vidadi İsayevin rəhbərlik etdiyi rayonda Heydər

Əliyev parkının gəlir mənbəyinə çevrilməsi, əslində gözlənilən haldır. Buna səbəb odur ki, rayonun idarə, müəsssisə və təşkilatlarını, digər qurumlarını aylıq “hesaba” otuzduran rəhbərlik, bu gün iştahasını cilovlamağı bacara bilmədiyindən, qazanc əldə etməyin başqa bir yolunu da tapıb. Məsələn, rayonun mərkəzi ərazisində salınan və dövlət büdcəsindən ayrılan külli miqdarda vəsait hesabına inşası başa çatdırılan Heydər Əliyev parkına girişi o, pullu etdirib. Çox təəccüblü hal olduğu qədər, bir o qədər də diqqəti cəlb edən haldır.

Məlumatı verən mənbə bildirir ki, icra başçısı belə bir addım atmağı oğluna həvalə edib, oğlu da tələbə yoldaşına etibar edib. Elə bu səbəbdən də, bu gün parkdan yığılan pulları təqribən 40-50 yaş həndəvərində olan Sənan adlı şəxs yığdırır. Park rəhbərliyinin tapşırığı əsasında o, hər tərəfi lentlə əhatəyə aldırmış və parka daxil olmaq üçün yalnız bir keçid saxlamışdır. Parkın içəri hissəsində təqribən 7-10 ədəd uşaq əyləncə mərkəzləri var ki, hər birindən istifadəyə görə mütləq rüsum ödəmək tələb olunur. Belə ki, adicə bir uşağın parka daxil olması 50 qəpik, əyləncələrdən 5-7 dəqiqə istifadəyə görə, əlavə 50 qəpik də ödəmək tələb olunur. Hələ bunlar azmış kimi, mağazalarda satılan 20 qəpiklik sular parkda 40 qəpiyə, bir çaynik çay isə 3 manata satılır.

Yəni bunları qeyd etməkdə məqsədimiz odur ki, bu gün Bərdədəki Heydər Əliyev parkında belə bir addımlara qol qoymaqla, bir qrup insanlar sakinləri soyğunçuluqla üz-üzə qoyurlar. Səbəb nədir və nəyə əsasən də belə bir addım atılmalıdır? Axı, hər kəs, xüsusilə də azyaşlı uşaqlar ulu öndərin adını daşıyan parka daxil olarkən, istirahət etmək istəyərkən, rüsum ödəməliyik

düşüncəsi ilə yaşamamalıdır. Belə bir halın yaşadılması, əslində qəbul edilməyən hal olmalı və atılan addımlara da dərhal son qoyulmalıdır. Təəssüf ki, atılan addımlar hələ də yaşadılmaqdadır.

Problemin varlığını diqqətdə saxlayacağıq.

Anar